Berriak

Gaur goizean Euskalduna Jauregian Herritarren eta Gizartearen Partaidetzari buruzko III. Topaketa egin da Bizkaiko udalerri eta mankomunitateekin. Hitzorduaren helburua partaidetzaren arloko esperientziak partekatzea izan da, gure Lurralde Historikoan herritarren parte-hartzea sustatzeko lan-ildo komunak identifikatuz.

Ekitaldia Bizkaiko Foru Aldundiak antolatu du eta, oraingoan, "eztabaida sustatzen duen partaidetza" izan du ardatz, politika publikoen diseinuan eta elkarlaneko gobernantzaren ereduan gero eta garrantzi handiagoa hartzen ari den joera. Topaketari esker Bilboko eta Tolosako udalen, Kantabriako Gobernuaren eta Bizkaiko Foru Aldundiaren beraren eztabaida-partaidetzako esperientziak ezagutu ahal izan dira. Gainera parte hartu duten udalek aukera izan dute partaidetzaren arloko proiektuak eta arlo horretan dituzten beharrak bateratzeko.

Hirugarren topaketa hau Herritarren eta Gizartearen Partaidetzari buruzko III. Foru Planaren, 2024-2027,  barruan kokatzen da, 1.600 pertsona eta gizarte-eragile baino gehiagoren ekarpenak biltzen dituen proiektua. Bizkaiko toki-erakundeetan partaidetza sustatzeko dirulaguntzen ildoari eusteaz gain, urteroko hitzordu hau erreferente gisa finkatu da lankidetzari eta ikaskuntza partekatuari dagokienez, lurraldeko toki-erakundeen arteko partaidetzaren esparruan.

Ager Izagirrek, Herri Administraziorako eta Erakunde Harremanetarako foru diputatuak,  zuzendu du ekitaldia eta nabarmendu du "gobernu ona gauzatzea metodoz entzutea eta erantzukizunez erabakitzea" dela. Era berean, azpimarratu du eztabaida-partaidetzarekin beste urrats bat ematen dela kalitatea irabazteko eta herritarrei aukera emateko deliberatzeko eta proposamen helduak egiteko, oso erabilgarriak baitira erakundeen kudeaketan erantzukizunak dituztenentzat.

Beste alde batetik, Josu Llanok, Gobernamendu Onaren, Herritarrenganako Laguntzaren eta Zerbitzu Digitalen foru-zuzendariak, eztabaida-partaidetzari buruzko testuinguru interesgarria garatu du, eta Imanol Landak, Udal Harremanen foru-zuzendariak, Aldundiak Bizkaiko udalerrietan Gobernu Irekia garatzen laguntzeko duen konpromisoa azpimarratu du.

Ekitaldian bertaratutako hogeita hamar udalei jakinarazi zaie berriz ere 400.000 euro bideratuko direla Bizkaiko udalerri eta mankomunitateentzako dirulaguntzetara 2026an herritarren eta gizartearen partaidetza sustatzeko. Bizkaiko Foru Aldundiak herritarren partaidetzarako 56 prozesu finantzatu ditu aurten Bizkaiko hainbat udalerri eta mankomunitatetan.