Bizkaiko Foru Aldundiak errefortzu estrategiko multzo bat aurkeztu du Bizkaibus garraio publikoko zerbitzuan, eta datozen hilabeteetan aplikatuko da bost eskualde-emakidatan. Helburua da eskaintza egungo mugikortasun-beharretara egokitzea eta sistemaren funtzionamendu efizienteagoa bermatzea, 2028ko ekitaldirako aurreikusitako kontratu berriak indarrean jarri arte.

Errefortzuak, eskualde eta lineen arabera

• Busturialdea-Lea Artibai eskualdean, zerbitzu berri bat gehitu da larunbatetan, A3514 Bilbo - Amorebieta - Gernika linean. Aldaketa horri esker, A3515 linearekin batera, Gernika eta Bilbo artean baterako maiztasuna 20 minutukoa izatea lortuko da.
• Ezkerraldea-Meatzaldea eskualdean, A3340 linearen (Bilbo-Muskiz) trazadura aldatuko da, Muskiz, Ansioko Metro Bilbaoko geltokia eta Gurutzetako Ospitalea lotzearren; horrela, Muskiz eta Abanto-Zierbena udalerrietatik sarbide zuzena egotea lortu nahi da.
• Txorierri-Mungialdeko emakidan, larunbatetan A3516 linean (Bilbo-Mungia) errefortzuak sartzeaz gain, A3527 (Bilbo-Bermeo) eta A3518 (Bilbo-Bakio) lineen ordutegiak egokitu egin dira, Bilbo eta Mungia arteko maiztasuna 30 minutuko izan beharrean, 15 minutukoa izan dadin. Gainera, orain arte Mungian amaitzen diren zerbitzuak Bermeoraino helduko dira, eta sei errefortzu gehiago sartuko dira lanegunetan.
• Emakida horretan, halaber, A3247 lineak (Bilbo-Aireportua) 15 minutuko maiztasuna berreskuratuko du eskaera gutxien dagoen hilabeteetan (azarotik martxora), eta 12 minutuko maiztasunera igoko da udan. Horrez gain, orduko bi errefortzu gehigarri jarriko dira eskari handieneko tarteetan, Moyua eta aireportuaren artean.
• Enkarterrin, Bilbo-Balmaseda A0651 linearen maiztasuna hobetu egin da, eta 30 minutuan behin zerbitzu bat eskaintzetik, lanegunetan 20 minutuko maiztasuna ematera igaroko da; eta larunbatetan, 30 minutuko maiztasuna.
• Nerbioi - Arratia - Durangaldea emakidan, A3926 lineak (Bilbo - Eibar) lanegunetan errefortzuak izango ditu, eskari handiko ordu-tarteei erantzuteko. A3933 lineak (Bilbo - Durango) une honetan larunbatetan ez du zerbitzurik ematen, baina  oraindik aurrera orduko bidaia bat eskainiko du asteko egun horretan.

Bestalde, UPV/EHUren Leioako campuserako sarbidea jarriko da, beste garraiobide batzuek zerbitzua ematen ez duten eremuetatik. Zehazki, A3927 linearen (Bilbo - Zeanuri) lehen irteera 6: 30era aurreratuko da, eta horrek Leioarako zerbitzuekin lotzeko aukera emango du. Gainera, A3924 linea (Ermua - Durango - UPV/EHU) Elorrioraino iritsiko da, joan eta etorriko norabidean, eskola-aldian.

Errefortzuak modu mailakatuan aplikatuko dira, premia tekniko eta operatiboen arabera, eta Garraio, Mugikortasun eta Turismo Sailaren aurrekontu-plangintzaren barruan daude sartuta.

Zerbitzua eguneratzeak maiztasunak eta ibilbideak lurraldeko egungo mugikortasun-ereduetara egokitzeko beharrari erantzuten dio. Errefortzu horiei esker, eskualdeen arteko lotura hobetuko da, funtsezko zerbitzuetarako sarbide hobea bermatuko da eta etorkizuneko garraio-kontratuaren plangintzan aurrera egingo da, adierazi du Sonia Pérez Ezquerra Garraio, Mugikortasun eta Turismoko foru diputatuak.