Bizkaiko Foru Aldundiak beste misio instituzional bat egin du Argentinara, herrialde hartako ekintzailetza eta berrikuntza ekosistemako eragile nagusiekin duen lankidetza sendotzeko. Ekainaren 30etik uztailaren 4ra bitartean, Joseba Mariezkurrena, Ekintzailetza, Talentua eta Enpresen Lehiakortasuna Bultzatzeko zuzendari nagusia buru duen ordezkaritza batek Buenos Aires eta Kordoba bisitatu ditu; bidaia honen xedea Bizkaia nazioarteko startupak ezartzeko lurralde erakargarri gisa posizonatzea da.

Misioan zehar hiru lankidetza-akordio sinatuko dira Argentinako ekosistemako funtsezko erakundeekin:

• Parque de Innovación de la Ciudad Autónoma de Buenos Aires-Buenos Aires Hiri Autonomoko Berrikuntza Parkea: erreferentziazko hub honek zientziaren, teknologiaren eta berrikuntzaren garapena sustatzen du ikuspegi publiko-pribatuarekin. Aliantzak alderantzizko misioa antolatzea ahalbidetuko du, azaroan Argentinako startupek Bizkaia bisita dezaten, bai eta proiektu teknologikoak nazioartekotzeko aukerak partekatzea ere.
• Incubando Salud: osasun-berrikuntzan espezializatutako inkubagailu hau, Argentinako osasun-sistemarentzat inpaktu handiko konponbideak bultzatzeagatik aintzatetsia, Bizkaiarekin aliatzen da jakintza-trukea errazteko eta sektoreko startupak Bizkaian zabaltzea laguntzeko.
• Agencia Córdoba Innovar y Emprender: ekintzailetza berritzaileari eta startupetan inbertitzeari laguntzeko programak antolatzen dituen erakunde publikoa. Akordioak atea irekitzen die etorkizuneko lankidetzei eta bi eskualdeetako ekintzaileen arteko konexio handiagoari.

Aliantza hauek Bizkaiak aspaldidanik Argentinako ekosistemako hainbat eragilerekin duen lankidetza-harremanari gehitzen zaizkio. Estrategia honi esker Amerikako herrialde horretako hainbat startupek Bizkaia aukeratu dute jada Europako merkatuan sartzeko ate izan gaitezen.

Hauek ere osatzen dute ordezkaritza: Olatz Goitia, Beaz ekintzailetza sustatzeko foru agentziako zuzendari nagusia; Eriz Sainz, BAT, B Accelerator Towerreko zuzendaria; eta Jose María Montiel, Beazeko enpresa proiektuen kudeatzailea. Misioan zehar lantaldeak bilerak egingo ditu lankidetza-aukera berriak aztertzeko interesa duten inkubagailuekin, azeleratzaileekin, fundazioekin eta inbertitzaileekin.

Ekintza hau Bizkaiko Foru Aldundiak lurraldearen garapen ekonomiko eta teknologikoan lagunduko duten talentua eta nazioarteko proiektuak erakartzeko egindako apustuaren barruan kokatzen da.