Bizkaian, apirilera arte, 4.094,7 milioi euro bildu dira guztira tributu itunduetan, hau da, 2024ko bitarte berean baino 356,9 milioi euro gehiago; beraz, % 9,5eko igoera egon da. Era horretan, maiatzaren 31rako, 2025eko aurrekontu osoaren (10.182,3 milioi) % 40,2 bildu da dagoeneko.

Zuzeneko zergapetzea 1.983,0 milioi eurokoa izan da; beraz, iazko maiatzean baino 116,4 milioi gehiago bildu dira (+% 6,2). Ildo horretan, PFEZak, orotara, % 7,8 egin du gora (+113,8 milioi); horrenbestez, 1.566,8 milioi bildu dira kontzeptu horrengatik. Joan den apirilean bezala, nabarmengarria da sarien gaineko karga bereziaren gehikuntza (% 254,9koa), iazko maiatzean bildutako 11,7 milioietatik aurtengo 41,5 milioietara igarota; lan-atxikipenen bilakaera positiboa ere nabarmentzen da, 1.780,8 milioi bildu baitira, hau da, % 6,0ko hazkundea izan du (+101,5 milioi).

Sozietateen gaineko zergari dagokionez, 260,9 milioi bildu dira eta aurreko hilabetera arte izandako beherakada mantentzen da, lurralde erkideko araudiaren mendeko erakundeen konturako lehen ordainketa murriztearen ondorioz; murrizketa metatua % 19,4koa izan da, aurreko urteko maiatzarekin alderatuta (-63,0 milioi).

Kontzeptu esanguratsuen artean, nabarmentzekoak dira oinordetza eta dohaintzen gaineko zergaren 54,6 milioiko diru-bilketa (+% 61,3) eta ez-egoiliarren errentaren gaineko zergaren 69,2 milioiko diru-bilketa (% 36,5eko igoera). Bestalde, energia elektrikoaren ekoizpenaren gaineko zergaren diru-bilketa 26,5 milioi eurokoa izan da. 

Zeharkako zergapetzeari dagokionez, 1.824,6 milioi euro bildu dira maiatzean (% 10,0ko igoera), kudeaketa propioko BEZaren bilketan izandako gehikuntza dela-eta, zeinak 1.421,3 milioi euro bildu baititu maiatzaren amaierarako, 2024ko maiatzean baino 156,4 milioi gehiago (+% 12,4). Bestalde, hidrokarburoen gaineko zerga bereziak, apur bat jaitsiera arintzen badu ere, jaisten jarraitzen du, zehazki, % 3,0 iazko maiatzaren aldean, eta diru-bilketa 374,3 milioi eurokoa izan da.

Gainerako zeharkako zergapetzeari dagokionez, maiatzean, elektrizitatearen gaineko zerga % 138,4 igo da, ondare eskualdaketen gaineko zerga % 33,2 (45,8 milioi euro bildu dira), tabako laboreen gaineko zerga % 5,0, eta finantza transakzioen gaineko zerga % 65,2 (27,9 milioi euro bildu dira).

Behera egin dute, aldiz, garagardoaren gaineko zergak (-% 7,1), plastikozko ontzien gaineko zergak (-% 4,9) eta zenbait garraiobideren gaineko zerga bereziak (-% 8,0).

Tasak eta bestelako sarrerak direla eta, 30,8 milioi euro bildu dira, hau da, % 3,8 gutxiago, berandutze-interesen (-% 1,4) eta premiamendu-errekarguen (-% 28,8) beherakadaren ondorioz.