Bizkaiko Foru Aldundiak 440.000 euro bideratuko ditu aurten tokiko saltoki txikien lehiakortasuna sustatzen duten proiektuak garatzeko, sektoreko hiru elkarte nagusi hauekiko lankidetzan: CECOBI, Bizkaidendak eta bilbaoDendak. Hitzarmen horiei esker lurraldeko ahalik eta saltoki gehienetara iritsi nahi du, hurbileko merkataritza dinamizatzeko foru-estrategiarekin bat datozen jarduketen bidez. Estrategia hori eredu profesionalizatuago, berritzaileago, digitalago eta jasangarriago baten aldeko apustua da, genero-ikuspegia barnean hartuta.

bilbaoDendak: berrikuntza, adimen artifiziala eta posizionamendua

Aurten, bilbaoDendak plataformak asmo handiko prestakuntza-programa bat abiarazi du. negozio-ereduen berrikuntzaren erabileran oinarrituta, eta, bide horretan, gai hauen gaineko eduki praktikoak eskainiko ditu: marka eta posizionamendua; bezeroen fidelizazioa; balio erantsia duten produktuak, eta merkataritza eralda dezaketen adimen artifizialeko tresnak.

Bizkaidendak: prestakuntza praktikoa eta mentoretza pertsonalizatua

Bizkaidendak federazioak -sektoreko 43 elkarte bildurik-, 2025ean, digitalizaziora, merkataritza-kudeaketara eta sektoreko legedi espezifikora bideratuko du bere prestakuntza-plana. Elementu berritzaile gisa, neurrira egindako mentoretza-programa bat jarriko du abian, eta, haren bidez, saltokiei eskaini ahal izango die saltokietan bertan tutoretzapeko prestakuntza izatea. Horrela, saltoki bakoitzaren benetako beharretara egokituko dira saio praktikoak: zalantzak argitu, tresna berriak aplikatu edo ataza aurreratuetan lagundu. Planak 600 pertsona baino gehiagorengana heldu nahi du, eta, horretaz gain, emakumeen parte-hartzea ere sustatu nahi du.

Cecobi: lurraldea diagnostikatzea eta kontsumo berrira egokitzea

Cecobik, bestalde, «Merkataritza Irekia Bizkaian» deritzon programa ezaguna daukanez, horretan jarraituko du. Hau da, tailerrak, hitzaldiak eta aholkularitza pertsonalizatua emango ditu transformazio digitalari, adimen artifizialari, berrikuntzari, merkataritza-desberdintzeari eta komunikazioari buruz. Berrikuntza gisa, 2025ean, ekimen pilotu berritzaile berri bat txertatuko du, sektoreari berari transformaziorako benetan irtenbideak emateko, eta protagonistekin zuzenean egingo du lan. Gainera, Bizkaiko Merkataritzaren Behatokia garatzen jarraituko du, eta, aurten, merkataritza-buru gisa jarduten duten funtsezko udalerrien informazio ekonomikoa eguneratuko du, sektorearen diagnostiko zehatza lortzeko xedez.

Bizkaiko Foru Aldundiaren konpromisoaren parte dira jarduketa horiek guztiak; izan ere, irmoki konprometituta dago tokiko merkataritza lehiakorrago, erakargarriago eta berritzaileago bat lortzearekin. Gainera, bat egiten dute tokiko saltoki txikien aldeko kanpaina honen bigarren olatuarekin: «Bizkaiko Merkataritza, OSO PRO: PROaktiboa, PROfesionala eta oso hurbila». Kanpaina horren helburu nagusia Bizkaiko merkataritzaren irudia berritzea da eta, horretarako, garai berrietara egokitzeko gaitasuna eta tokiko ekonomiaren garrantzia nabarmendu behar dira.