Laespada: "Bizkaiak Lanbide Heziketaren talentua eta ideia ekintzaileak behar ditu"

ENPRESARI programak XXIV. edizioa ospatu du, gaur. Ekitaldian, Bizkaiko Lanbide Heziketako ikasleek aurkeztutako enpresa-ideia eta -proiektu onenentzako sariak banatu dira. Bizkaiko Foru Aldundiko Enplegua, Gizarte Kohesioa eta Berdintasuna Sustatzeko Sailak bultzatzen du programa, DEMA Enplegu eta Ekintzailetza Foru Agentziaren bidez, eta, hari esker, indartu egiten da gazteen ekintzailetza jasangarritasun, berrikuntza eta inklusioaren ikuspegitik sustatzeko erakundeak duen konpromisoa.

Hitzaldian Teresa Laespada foru diputatuak azpimarratu duenez, ENPRESARI balioak dituen kultura ekintzailea ereiteko moduaren adibide argia da. Ikasgelan jaiotzen diren ideia eraldatzaileak benetako proiektu bihur daitezke, enplegua sortzen duten ideia eraldatzaileak, lurraldea zaintzen dutenak eta gure garaiko erronka sozial, ekologiko eta teknologikoei irtenbideak ematen dizkietenak. Gainera, nabarmendu du 2024 - 2029 Enplegu Planak argi eta garbi hurbileko ekintzailetzaren alde egiten duela enpleguaren sorrerarako, garapen ekonomikorako eta jasangarritasunerako motor gisa. DEMAk eta Bizkaia Mikro sozietate berriak babesten dute, besteak beste, plana.

Edizio honetan, 390 ideia ekintzaile aurkeztu dira, 33 ikastetxek bidaliak; haietatik 128 proposamen hautatu dira (erdi-mailako 45 proposamen, eta goi-mailako 83). Proposamen horiek guztiek prestakuntza-, aholkularitza- eta epaimahaiaren aurreko baliozkotze-ibilbide osoa egin dute, eta, hala, profesionalizatuta eta ingurunearekin konektatuta dagoen kultura ekintzaile bat sendotu dute.

Bere 24 edizioetan, ENPRESARIk 4.694 ideia jaso ditu, eta 1.272 enpresa-proiektu sortu. Proiektu horietako batzuk dagoeneko finkatu dira enpresa aktibo gisa Bizkaian. Aurtengo edizioan, 12 proiektu dagoeneko martxan dauden enpresa bihurtu dira, eta beste 7 proiektu sortzeko prozesuan daude.

Ekitaldian sari ekonomikoak eman zaizkie erdi-mailako dosier onenei, goi-mailako enpresa-proiektu onenei eta ikus-entzunezko aurkezpen onenei. Saritutako proiektuak beren ikuspegi berritzaileagatik, gizarte- edo ingurumen-konpromisoagatik eta benetan bideragarriak izateagatik nabarmendu behar dira. Besteak beste, honako hauek:

• "EarlyFire" AA bidez baso-suteak goiz detektatzeko plataformak 1.500 euroko saria jaso du.
• "EuskoEnergy" eta "Chiripa" proiektuek eraginkortasun energetikoa eta ehunaren diseinu ekologikoa dute ardatz, eta 1.200 eta 1.000 euro jaso dituzte, hurrenez hurren.
• Erdi-mailako proiektuetan, "24 Racks Cloud" proiektuak jaso du lehen saria azpiegitura birtual eskalagarriaren proposamen batengatik.

1.300 ikaslek eta 86 irakaslek baino gehiagok parte hartzeak eta aholkulari adituen akonpainamenduak, horrek guztiak indartu egin du programaren balio instituzionala. ENPRESARIk ideiak bultzatzeaz gainera, herritar ekonomiko konprometituak ereiten ditu, eta tokiko ekoizpen-sarea indartu.

Programa honen bidez, Bizkaiko Foru Aldundiak berretsi egiten du ekintzailetzaren aldeko apustua, ekintzailetza ongizatearen, inklusioaren eta aurrerapen partekatuaren zerbitzura dagoen tresna eraldatzailea den aldetik. Aurrerantzean ere, ENPRESARI funtsezko palanka izango da, Bizkaiarekin konprometituta dauden gazte ekintzaile eta trebatuen prestakuntzan.