"Bizkaia Orekan Sakonduz" foru-estrategia jardunbide egokiaren adibide gisa aurkeztu da "Analisitik ekintzara: tokiko politikak baliatzea produktibitatea sustatzeko" nazioarteko topaketan. Topaketa hori ELGAren Tokiko Garapenerako Zentroak, Erresuma Batuko Produktibitate Institutuak eta Orkestrak antolatu dute Trenton (Italia). Europa osoko arduradun politikoak, adituak eta ordezkari instituzionalak bildu dira kongresuan atzo eta gaur, ekainak 5 eta 6, lurralde-garapen iraunkorraren eta lehiakorraren gakoak aztertzeko.

Bizkaiko Foru Aldundiaren ordezkari gisa, Lurralde Lehiakortasuneko eta Kanpo Sustapeneko zuzendari nagusi Cristina Múgicak parte hartu du jardunaldiaren saio batean. Saio horretan aztertu da zer egin behar den produktibitatearen onurak lurraldeetako eskualde guztien artean banatzen direla bermatzeko. Bere hitzaldian, "Bizkaia Orekan Sakonduz" estrategiaren zutabeak, ibilbidea eta emaitzak azaldu ditu. Politika estrategiko horrek lurraldearen lehiakortasuna indartzea du helburu, tokiko errealitateetara egokitutako ikuspegi deszentralizatu eta parte-hartzaile batetik abiatuta.

Bizkaia Orekan Sakonduz da Bizkaiko Foru Aldundiak lehiakortasuna modu orekatuan garatzeko duen estrategia, industrian eta zerbitzu aurreratuetan zentratua, horiek baitira kalitatezko enpleguaren, oparotasun ekonomikoaren eta pertsona guztientzako ongizatearen eragile nagusiak adierazi zuen atzo Múgicak. Halaber, tokiko garapeneko 23 agentzien sarearen eginkizuna nabarmendu zuen, baita politika ekonomikoen eraginkortasunerako elkarlaneko gobernantzaren garrantzia ere, mundu akademikoko ordezkariek, arduradun publikoek, nazioarteko erakundeetako adituek eta garapen ekonomikoko profesionalek osatutako nazioarteko audientziaren aurrean.

Lau zutabe: aniztasuna, tokiko agentziak, lankidetza eta lehiakortasun-esparrua

Bizkaiko lurralde-lehiakortasunaren estrategia 2016an jarri zen abian, eta 2019tik aurrera indartu egin da, esparru estrategiko eta lurralde-gobernantzaren eredu berri bat diseinatuz eta agentziei tresnak, laguntza teknikoa eta finantza-baliabideak emanez. Lau zutabetan oinarritzen da: lurralde-aniztasunaren aitorpena, tokiko agentzien ahalduntzea, maila anitzeko lankidetza-gobernantza eta ongizateari lotutako lehiakortasun-esparrua, Orkestrak diseinatua, estrategia orientatzeko eta monitorizatzeko aukera ematen duena. Azken aldiko bilakaerari esker, eskualde-lehiakortasunera bideratutako baliabide ekonomikoak biderkatu ahal izan dira, inpaktu handiko lankidetza-proiektu estrategikoak bultzatu dira eta 60 milioi euroko funtsa sortu da lurralde osoan enpresa-arlo berriak garatzeko.

Trentoko foroak espazio bat eskaini du politika ekonomikoa lurralde-kohesioarekin lotzen duten ikuspegi eraldatzaileak partekatzeko, trantsizio industrialen, jasangarritasunaren eta ekitatearen beharrak markatutako nazioarteko testuinguru batean. Bizkaiarekin batera, erakunde hauetako ordezkariek hartu dute parte, besteak beste: Europako Batzordea, Manchesterreko Unibertsitatea, London School of Economics, Brookings Institution, Basque Research and Technology Alliance, (BRTA), Ipar Irlandako Gobernua, Cambridgeko Unibertsitatea eta ELGA bera.

Bizkaiak foro horretan duen presentziak indartu egiten du bere posizionamendua lurralde berritzaile, konektatu eta konprometitu gisa, garapen ekonomiko kohesionatuan. Cristina Múgicak ondorioztatu duenez, gure esperientziak beste lurralde batzuk inspiratu ahal izatea espero dugu, Bizkaian ere nazioarteko esperientzietatik ikasten dugun bezala, eraikitzen jarraitzeko lehiakortasun-eredu propioa, tokian sustraitua eta bokazio globalarekin.