Bizkaiko Foru Aldundiak, Lantik teknologia- eta berrikuntza-sozietatearen bidez, Enpresentzako Bizkortze Kuantikoko Programaren lehen deialdia egin du, gaur, Biqain estrategiaren barruan (Bizkaia Quantum Advanced Industries). Ekimen aitzindari honek negozioaren arazo errealetara aplikatutako irtenbide kuantikoak sustatzen ditu, eta, hala, Bizkaiko enpresa-sarearen lehiakortasuna eta berrikuntza indartzeko helburuari erantzuten dio.

Hasiera batean 2 milioi euroko aurrekontua duela, bizkortze-programak laguntza emango du, doan, talentuko eta ezagutza adituko zerbitzu espezializatuen bidez, eta urtebetean proiektu errealak garatzeko azpiegitura eta plataforma teknologikoetarako sarbidea ere bai. Deialdia gaur, maiatzak 15, hasi eta 2025eko urriaren 31ra arte egongo da irekita; eskaerak, berriz, https://lantik.bizkaia.eus/es/biqain helbidearen bidez aurkeztu beharko dira.

Programa egoitza soziala edo fiskala Bizkaian duten edo proiektua lurraldean kokatutako lantoki batean garatzen duten plantillako gutxienez bost pertsona dituzten edozein sektoretako enpresei zuzenduta dago. Plantilla txikiagoa duten enpresek ere parte har dezakete, baldin eta sortu berriak badira eta bost urte baino gutxiago badituzte.

Produktuetan edo prozesuetan eragin handiko aurrerapenak sortzea epe laburrean

Ekimenaren bidez, Europar Batasunak eta nazioarteko beste erakunde batzuek lehiakortasunaren funtsezko palanka gisa identifikatutako eremu batean kokatu nahi da lurraldea. Teknologia kuantikoek (konputazioa eta simulazioa, komunikazioak eta zibersegurtasuna, eta sentsorika eta metrologia) zeharkako eragina izango dute beste teknologia disruptibo batzuetan (hala nola adimen artifiziala, bioteknologia edo erdieroaleak) eta sektore estrategikoetan (hala nola osasuna, energia, automozioa edo finantza-zerbitzuak).

Deialdi honetara aurkeztu ahal izango diren proiektuek produktuetan edo prozesuetan eragin handiko aurrerapenak sortzea izan beharko dute ardatz, eta horiek urtebeteko epean gauzatu beharko dira. Gutxienez, teknologia hauetako bat erabili beharko dute:

• Konputazioa eta simulazio kuantikoa; algoritmo kuantikoak, emuladoreak eta inspirazio kuantikoko irtenbideak barne.
• Komunikazio eta zibersegurtasun kuantikoak; zenbait teknologia barne, hala nola gakoen banaketa kuantikoa (QKD), kriptografia post-kuantikoa edo ausazko zenbakien sorkuntza kuantikoa.
• Sentsorika eta metrologia kuantikoak, negozioaren erabilera-kasuei aplikatuak, detektatze-gaitasun berriak hobetzeko edo garatzeko.

Enpresek teknologia kuantikoekin proiektuak probatu eta garatzera bideratutako aholkularitza kuantikoko zerbitzua osatzen du laguntzen lerro berri honek, zeinera dagoeneko 26 proiektu-kontsulta aurkeztu baitira, otsailaren amaieran interes-adierazpenak jasotzeko epea ireki zenetik.

Laguntza biak, aholkularitzakoa zein bizkortzekoa, Biqain estrategiaren parte dira. Haren bidez, Bizkaiko Foru Aldundiak lurraldean jarduera kuantikoko sektore berri bat sortzeko apustua indartu nahi du, ikerketa industriala, transferentzia teknologikoa eta talentu espezializatuaren garapena uztartzen dituen ikuspegiarekin. Biqain, Bizkaia Quantum Advanced Industries, Eusko Jaurlaritzak bultzatzen duen BasQ ekimenaren parte da.

Argibide gehiagotarako eta eskaera-formularioa eskuratzeko: https://lantik.bizkaia.eus/es/biqain