Bizkaiko Foru Aldundiaren Prebentzio, Suhiltzaile eta Salbamendu Zerbitzuak (PSSZ) 2024an 6.887 esku-hartze egin zituen. Egunero, batez beste, 19 abisu jaso ziren. Jarduketa-motaren arabera, iazko irteerak honela banatu ziren: 1.781 sute (% 25,86), 2.264 salbamendu (% 32,87) eta 2.842 laguntza tekniko (% 41,27), adibidez, eraikuntzetako saneamendu-lanak, zuhaitzak kentzea edo kimatzea, galtzadak garbitzea, prebentzio-operatiboak edo likidoen eta gasen jarioak.

2023rekin alderatuta, esku-hartzeak % 2,8 gutxiago izan ziren (2023ko datuekin konparatuta, egunean irteera bat baino zerbait gutxiago; 2023an 7.090 esku-hartze egin ziren). Suteak itzaltzeko irteerak % 8,9 murriztu ziren, salbamenduak % 3,3 eta laguntza teknikoak, ordea, % 1,6 gehitu ziren.

Zerbitzua osatzen duten zortzi parkeen artean, lehen erantzuna eman zuen lehen parke gisa irteera gehien erregistratu zituena Uriostekoa izan zen, Ortuellan (2.083 irteera, guztien % 30,25), gero Artatzakoa (1.351 irteera) eta, azkenik, Basaurikoa (1.148 irteera). Irteera gutxien egin zituen parkea Markina-Xemeingoa izan zen (261).

Udalerrietako esku-hartzeak

2024an, Bizkaiko Prebentzio, Suhiltzaile eta Salbamendu Zerbitzuak lurraldeko udalerri guztietan esku hartu zuen, Ereñon izan ezik. Barakaldo izan zen esku-hartze gehien izan zituen udalerria (376); ondoren, Getxo (341), Basauri (166), Leioa (143), Portugalete (142) eta Santurtzi (132). Aurrekoak dira, hain justu ere, Bizkaiko Lurralde Historikoko biztanle gehien dituzten sei udalerriak, Bilbo kenduta. Azken horretan suhiltzaileen udal-zerbitzu propioa dute. 100 esku-hartze baino gehiago izan zituzten beste udalerri batzuk Erandio, Sestao, Trapagaran, Galdakao eta Mungia izan ziren.

Udako hilabeteetan eta udazken hasieran (ekainetik urrira) esku-hartze gehien erregistratu ziren. Bestalde, urteko egunen % 44,26n (162 egunetan) Bizkaiko Foru Aldundiaren suhiltzaile-parkeek egunean 5 eta 10 zerbitzu inguru egin zituzten. Beste 148 egunetan (egun guztien % 40,44) 11 eta 20 esku-hartze artean egin zituzten egunero.

Esku-hartze gehien egin zituzten eguna urriaren 9a izan zen: guztira 69 irteera egin ziren, haize-bolada gogorrak gertatu zirelako. Egun hartan, nagusiki laguntza teknikoak egin zituzten, hala nola eraikuntzak saneatzeko eta zuhaitzak erretiratzeko lanak. Abenduaren 8an (58 esku-hartze), otsailaren 8an (50) eta azaroaren 24an (37) ere esku-hartze asko egin ziren, haizearen eraginez guztiak ere.

Halaber, zerbitzuko langileak Bizkaitik kanpo joan ziren 9 aldiz Gipuzkoara, hiru foru-aldundiek hurbilen dagoen parkeak berehalako arreta ematen duela bermatzeko sinatu zuten lankidetza-hitzarmena betez. Kantabrian eta Burgosen ere esku hartu zen, zehazki, lurralde-mugatik gertu dauden lekuetan.

Suteetako esku-hartzeak: kanpoko suteak, egiturazkoak, basokoak eta industrialak

Bizkaiko PSSZko langileek esku hartu zuten suteak lau mota hauetakoak dira: kanpokoak, egiturazkoak, industrialak eta basokoak.

• Kanpoko suteak Esku-hartze ohikoenak izan ziren. 2024an ia 500 egin zituzten (475), 2023an baino % 11 gutxiago. Gehienak (% 96) edukiontziak, ibilgailu arinak eta hiri-altzariak erretzearen ondorioz gertatu ziren.
• Egiturazko suteak: 366 esku-hartze egin ziren. Horietatik 52 3. mailakoak izan ziren (etxebizitzak, garajeak edo lonjak gauetan edo jaiegunetan edo arrisku bereziko egiturak). 2023koekin alderatuta, % 5,2 gehiago izan ziren. Ez zen 4. mailako suterik erregistratu (egiturazko sute handiak).
• Sute industrialak Suhiltzaileek 66 esku-hartze egin zituzten, 2023an baino % 20 gehiago. Zenbaitetan, parkeek aldi berean lan egin behar izan zuten. Adibidez, Ugao-Miraballesen elkarren ondoan zeuden enpresetara hedatu zen industrialde batean gertatutako sutean, baita ere Iurretako, Galdakaoko, Trapagarango, Arrigorriagako edo Alonsotegiko enpresetan gertatutakoetan.
• Baso-suteak: 103 baso-sutetan jardun zen, iaz baino % 18 gutxiago. Sute horietatik 88 lehen mailako suteak izan ziren (hiriko edo hiri-inguruko eremuetan isolatuta). Baso-zerbitzuak ez zuen esku hartu behar izan.

2024an hiru pertsona hil ziren Bizkaiko PSSZk esku hartu zuen suteetan.

Salbamenduak

Salbamenduetan pertsonen edota animalien bizitzak edo integritatea arriskuan egon daitezke, eta horiek Bizkaiko PSSZren esku-hartzeen ia heren bat osatzen dute. 2024an 1.012 zerbitzutan esku hartu zen. Zifra hori eta aurreko urtekoa antzekoak dira.

Kapitulu honetan, aldundiko suhiltzaileek 465 irekiera egin zituzten arriskuan zeuden pertsonen etxebizitzetara sartzeko. Halaber, 227 trafiko-istriputan esku hartu zuten, eta 114 bilaketa eta erreskate egin zituzten landa-eremuetan eta mendian, besteak beste.

Laguntza teknikoak

2024an, Bizkaiko Prebentzio, Suhiltzaile eta Salbamendu Zerbitzuak 2.134 laguntza tekniko egin zituen. Irteerarik ohikoenak erleak eta liztorrak neutralizatu edo kentzeko izan ziren. Guztira 909 esku-hartze izan ziren, hau da, urteko guztien % 21 baino gehiago.

Beste zerbitzu nabarmendu batzuk eraikuntzetako saneamendu-lanak (447), prebentzio-erretenak (270), zuhaitzak kentzea (238), gas-jarioengatiko esku-hartzeak (125) eta galtzadetako garbiketak (114) izan ziren, beste batzuen artean.

Valentzian egindako esku-hartzea DANAren ostean

Esku-hartzerik handiena Bizkaiko PSSZk Valentziako Erkidegoan egindakoa izan zen, urriaren 29an DANA gertatu ondoren. 4 txanda bidali ziren, guztira kategoria guztietako 68 langile, eta erreskate bereziak egiteko materiala ere bai. Bizkaiko suhiltzaileek Valentziako Alfafar, Massanassa eta Paiporta udalerrietan esku hartu zuten 12 egunetan zehar, Valentziako larrialdi-zerbitzuekin eta bertan lanean zeuden tokiko agintaritzekin koordinatuta.

Inbertsioak eta berrikuntza teknologikoa segurtasunaren zerbitzura

Herri Administraziorako eta Erakunde Harremanetarako Sailak 37,6 milioi euroko aurrekontua bideratu zuen 2024an, 2023an baino % 2 gehiago.  Beste batzuen artean, iaz PSSZko parkeetan maila ezberdineko hobekuntza-obrak gauzatu ziren eta inbertsio nabarmenduen artean daude hauek: sei ibilgailu berri eskuratzea (bi baso-ponpa astun eta lau ibilgailu elektriko arin), bilaketa teknikoak egiteko ekipoak, ateratzeko bateriadun tresnak, 100 maskara eta erregulatzaile, detektagailu sismikoak eta droneak, beste batzuen artean.

Halaber, Bizkaiko PSSZk Espainia osoko suteak itzaltzen laguntzeko funtzio anitzeko lehen robota eskuratu zuen. Robot horrek arrisku handiko lekuetan jarduten du, eta 2024ko irailetik aurrera, zerbitzuak beste foru-aldundiekin eta Eusko Jaurlaritzarekin partekatutako helikoptero bat ere badu baso-suteetan jarduteko eta, baldintza jakin batzuk betetzen direnean, industria-suteetan erabiltzeko ere bai.

Jasangarritasunarekin konprometituta

Bizkaiko Foru Aldundiaren suhiltzaile-zerbitzuak 2022-2024ko jasangarritasun-estrategian jasotako neurriak ezartzen jarraitu du. Beste batzuen artean, azpimarratzekoa da suhiltzaile-parkeen funtzionamendurako energia elektrikoaren % 55 sortzen duela. Estrategia hori 2025-2027rako estrategiak ordezkatu du eta lehentasunezko lerroak mantendu ditu, hala nola ingurumen-efizientzia, mugikortasun jasangarria, berrikuntza irekiko proiektuak edo herritarren sentsibilizazioa sustatzea.

2024ko memoria honen bitartez, Bizkaiko Foru Aldundiak segurtasunarekin, berrikuntzarekin eta jasangarritasunarekin duen konpromisoa berresten du. Prebentzio, Suhiltzaile eta Salbamendu Zerbitzuak etorkizuneko erronketara egokitzen jarraitzen du eta erreferentzia gisa finkatzen ari da herritarrak eta inguru naturala babesteko zereginetan.