Bizkaiko Foru Aldundiak etxeTIC foru-zerbitzuaren hedapena amaitu du. EtxeTIC zerbitzu publikoa mendekotasuna edo desgaitasuna duten pertsonak eta zaintzaileak, batez ere, senideak, etxean egoten laguntzeko diseinatuta dago. Dagoeneko martxan daude 11 zentro komunitario, eta zerbitzua lurraldeko 1.959 etxetara iristen da; horrela, iraupen luzeko zainketetarako funtsezko baliabide gisa finkatzen da zerbitzua.

EtxeTICek aurrez aurreko arreta eta teknologia aurreratua erabiltzen ditu, eta etxe bakoitzaren beharrizanetara egokitzen da. Ikuspegi hibrido horri esker, zerbitzu pertsonalizatua eskaintzen da: jarraipena tablet bidez egin daiteke etxebizitza teknologikoetan, eta telefonoz etxebizitza analogikoetan.

Erabiltzaile bakoitzak zaintza-plan pertsonalizatu bat du, zaintzaileekin adostuta eta kasu bakoitzaren lehentasun eta premietara egokituta. Jarduera horien artean (presentzialak eta telematikoak), laguntza soziala, psikologikoa, fisikoa eta teknologikoa emateko jarduerak daude; gainera, bizi-kalitatea hobetzea eta laguntzako sare komunitarioak sendotzea sustatzen dute.

Hazkunde mailakatua baina etengabea

2020an hasi zenetik, etxeTIC zerbitzuak hedapen mailakatua izan du. Lehenengo zentroa Etxanizen (Bilbo) zabaldu zen, eta, ondoren, Etxebarrin eta Zalla-Enkarterrin (Karrantzako zentro deszentralizatua barne). Ondoren, lehendik zeuden sei eguneko zentro birmoldatu ziren: Ugao Gane, Estartetxe-Leioa, Bizigura-Abanto, Berria-Sestao, Karmelo (Santutxu, Bilbo) eta Ondarroa. Markina-Xemeingo zentroa gaitzen den bitartean, Ondarroakoa behin-behinekoa da.

Zentro berrienak Mungiakoa eta Basaurikoa dira; Mungiakoak bere eragin-eremuko bederatzi udalerriri ematen die zerbitzua, eta Basaurikoa hedapen-fasean dago. Bi zentro horiek badituzte etxe aktiboak, eta ahalik eta estaldura handiena bermatzeko, udaletako oinarrizko gizarte-zerbitzuekin eta tokiko erakundeekin koordinatuta lan egiten ari da.

Ereduaren eragin positiboa aitortua

Erabiltzaileek eta zaintzaileek etxeTIC ereduaren eraginkortasuna eta bizi-kalitatean duen eragin positiboa nabarmentzen dituzte; gainera, kasua koordinatzen duten profesionalen lana eta jasotzen duten laguntza integrala azpimarratzen dute. Bestalde, zerbitzuaren ebaluazioaren arabera, hartzaileak, oro har, pozik daude zerbitzuak maila pertsonalean eta laguntzako sare komunitarioak sendotzeko ematen dituen onurekin.

Gaur egun etxeTICek 11 zentro ditu, eta horrek esan nahi du Bizkaiko 5.000 etxebizitzatan laguntzeko gai dela. Beraz, berretsi egiten da baliabide berritzailea dela eta lurraldeko pertsonen benetako premietara egokituta dagoela.

Zerbitzua eskuratzea

EtxeTIC zerbitzua jaso ahal izateko, beharrezkoa da mendekotasun-gradua aitortuta edukitzea, familia-inguruan zaintzeko prestazio ekonomikoa (FIZPE) jasotzea eta erreferentziako zentroaren eraginpeko eremuan bizi izatea. Doakoa denez eta diseinu integrala duenez, funtsezko tresna da adinekoentzako eta haien familientzako bizitza duinagoa eta jasangarriagoa sustatzeko.

Horrela, Bizkaiko Foru Aldundiak gizarte-berrikuntzarekin eta iraupen luzeko zainketekin duen konpromisoa berresten du, eta pertsonen duintasuna, autonomia eta ongizatea lehenetsi eta lurraldearen benetako premiei erantzuten dien arreta-eredu bat finkatzen du.