Bizkaiko Foru Aldundiak dirulaguntza-programa baterako deialdia onartu du lurraldeko industrialdeak modernizatu, egokitu eta hobetzeko, eta 2025erako 800.000 euro jarri ditu. Ekimen horren esparrua Ekonomia Sustatzeko Sailaren estrategia da, Bizkaian garapen orekatuago eta kohesionatuago bat lortzeko estrategia, alegia, enpresa-ingurune lehiakorragoak, jasangarriagoak eta erakargarriagoak sustatuta.

Programa horrek bi jardun-ildo dauzka: alde batetik, industrialde berean dauden enpresen arteko asoziazionismoa sustatzea, kudeaketa bateratuan laguntzeko eta hobekuntza-plan integralak egiteko; bestetik, industrialdeetako azpiegiturak eta zerbitzuak modernizatzeko inbertsioei zuzeneko laguntza ematea, inguruneko jarduera ekonomikoaren eta jasangarritasunaren onerako.

Eskabideak aurkezteko epea 2025eko maiatzaren 12an hasi eta ekainaren 6an amaituko da. Kudeaketa-planak egiteko laguntzak norgehiagokarik gabeko araubidean emango dira, eta hobekuntza-inbertsioetarako laguntzak, berriz, norgehiagoka-araubidean.

Deialdi honen azken helburua da lurralde osoko espazio produktiboen kalitatea hobetzea, eta arreta berezia jarri nahi du udalerri asko hartzen dituzten plan estrategikoak dauzkaten lehentasuneko esku-hartze eremutzat jotzen diren eskualdeetan (Enkarterri, Meatzaldea, Ezkerraldea, Aiaraldea, Busturialdea-Urdaibai eta Debabarrena), horrela, tokiko enpresen lehiakortasuna eta kalitateko enplegua sortzeko gaitasuna indartuko baitira.

Industrialdeak, garapen ekonomikorako estrategiaren giltza

Industrialdeak hobetzea funtsezkoa da Bizkaiko garapen ekonomikorako estrategian. Enpresagune horiek erronka berrietara egokitu behar dira, bertako enpresek berme osoz ekin diezaieten etorkizuneko proiektuei, bai eta beste inbertsio batzuk erakartzeko ere. Programaren edizio berri honen bidez, Bizkaiko industria-ekosistema indartzeko konpromisoa berresten du Aldundiak, eta apustua egiten du azpiegitura moderno eta iraunkorren alde, ekoizpen-sarea eraldatzeko eta berritzeko palanka izan daitezen.

2024an, guztira 17 enpresagunek hartu zituzten programa horretako laguntzak; hauek, hain zuzen: Abra Industrial enpresa-parkea (Ortuella eta Abanto Zierbena), San Martin industrialdea (Muskiz), Bakiola industrialdea (Arrankudiaga), Ugarte industrialdea (Trapagaran), Okamika industrialdea (Gizaburuaga), El Campillo industrialdea (Abanto Zierbena), Isasi industrialdea (Gordexola), Bildosola industrialdea (Artea eta Aranzazu), Granada industrialdea (Ortuella), Trapaga Causo industrialdea (Trapagaran), Landabaso industrialdea (Bermeo), Erletxe industrialdea (Galdakao), El Paramo industrialdea (Balmaseda), Kareaga industrialdea (Barakaldo), Lezama Legizamon poligonoa (Etxebarri) eta Basauriko Denac-Enpresa Zentroa.