Laespada: "Zuek Bizkaiaren etorkizuna eraikitzen ari zarete".

ZIRGARIAK Eskola Feministak gaur ekin dio ofizialki bere jardunari, Bizkaiko Emakumeen Partaidetzarako Kontseilua osatzen duten ia berrogeita hamar erakundeetako kideentzat prestakuntzarako eta gizarte-eraldaketarako gunea izateko.

Kontseilu hau erakunde horiek parte hartzeko eta erakunde publikoekin hitz egiteko organoa da, eta 4/2018 Foru Arauan xedatutakoaren arabera sortu zen. Arau horrek, besteak beste, genero-ikuspegia eta ikuspegi intersekzionala kontuan hartzen dituzten politika publikoen alde egiten du. Zehazki, lurraldeko ia berrogeita hamar emakume-elkartez eta kolektibo feministez osatutako organo horren helburua da hausnarketa-, prestakuntza- eta ekintza-zentro bat eskaintzea, Bizkaian feminismoa indartzeko eta gizarte berdinzaleagoa eraikitzeko bidean aurrera egiteko.

Teresa Laespada Enplegua, Gizarte Kohesioa eta Berdintasuna Sustatzeko foru-diputatua Emakumeen Partaidetzarako Kontseiluaren eskola feminista hau martxan jartzeko ekitaldian izan da, eta ZIRGARIAK eskolaren izaera estrategikoa azpimarratu du: ZIRGARIAK Eskola Feminista ez da soilik prestakuntza-espazio bat, botere-espazio bat ere bada, non gizarte-eraldaketaren gakoa garela onartzen baitugu. Berdintasuna ez da amets bat; egunero dugun erronka bat da, eta, erronka horri aurre egiteko, funtsezkoa da Kontseiluan egiten duzuen lana. Zuek Bizkaiaren etorkizuna eraikitzen ari zarete; etorkizun bat zeinean emakumeek, politika publikoez baliatzeaz gain, politika horiek gidatu, diseinatu, ezarri eta bere egingo baitituzte.

Halaber, Laespadak eskerrak eman dizkio Kontseiluari politika publiko eraldatzaileen eraikuntzan betetzen duen zereginagatik, bai eta erakundeen eta lurraldeko emakume antolatuen arteko zubi gisa diharduen espazio plurala, belaunaldiartekoa eta ordezkatzailea sortzeagatik ere.

Eskolaren izenak, ZIRGARIAK, Bilboko itsasadarrean beren indar fisikoarekin ontziak atoian eramaten zituzten emakumeak, hau da, zirgariak ditu erreferente. Emakume horiek historian zehar egindako lan ikusezina aldarrikatzeaz gainera, emakumeen borroka kolektiboaren eta eraldatzeko gaitasunaren ikur da. Izen hori Uribitarte pasealekuan emakume horiek irudikatzen dituen eskultura-multzoan oinarritzen da. Monumentu hori aldarrikapen feministen eta berdintasunaren aldeko borrokaren sinbolo bihurtu da, eta Laespada buru duen sailak bultzatu eta finantzatu zuen.

Teresa Laespadaren hitzak: Eskola hau izatea nahi dugun guztia islatzen dute zirgariek: indarra, lan kolektiboa, memoria feminista eta estereotipoen haustura. Espazio honen bidez, emakumeei pentsatzen, prestatzen, tresna berriak eraikitzen eta beren artean errekonozitzen lagundu nahi diegu. Hala, ZIRGARIAK eskola ez da soilik prestakuntza-espazioa izango; gizarte-aldaketaren eragile eta Bizkaiko feminismoaren erreferente ere izango da.

ZIRGARIAK eskola prestakuntzarako eta hausnarketa dinamikorako gune gisa garatuko da, eta era askotako jardueraz betetako programazioa izango du: tailerrak, hitzaldiak eta eztabaida-espazioak, besteak beste. Guztiak diseinatuko dira parte-hartzea ahalbidetzeko, eta egungo beharretara eta erronketara egokituko dira; feminismoaren eta berdintasunaren funtsezko gaiak jorratuko dira, ikuspegi kritiko eta eraldatzaile batetik. Prestakuntzaren bidez, eskolaren asmoa da emakumeei tresnak ematea botere-egiturak zalantzan jartzeko, benetako berdintasuna sustatzeko eta gizartea eraldatzen laguntzeko.