Etxanobe: Basauriko, Galdakaoko eta inguru osoko bizilagunakaz hartu dogun konpromisoa beteteko puntuan gagoz

Elixabete Etxanobe Bizkaiko Ahaldun Nagusiak eta Susana García Chueca Mugikortasun Jasangarriaren sailburuak eta Bilboko metroaren 5. linearen eraikuntza-obrak bisitatu dituzte gaur goizean. Lan horiek Usansoloko ospitalera eramango dute metroa, Galdakaotik igarota, eta etorkizunean Busturialdetik eta Durangaldetik datorren Euskotrenen linearekin lotuko da. Ahaldun Nagusiak eta sailburuak, Asier Iragorri Basauriko alkatearekin batera, in situ egiaztatu ahal izan dute bi erakundeek % 50ean finantzatzen dituzten lanen garapena, eta horien konplexutasuna egiaztatu dute, errepide lotune baten eta Euskotrenen eta merkantzien trenbideen artean gauzatzen ari baitira. 5. lineak 360 milioi euroko aurrekontua du, 6,3 kilometro luze da eta bost geltoki berri ditu.

Bariku honetan erakundeak Basaurira joan dira, metroaren 3. eta 5. lineek bat egin eta 2. linearekin konektatuko diren lekura. Bertan, Sarratu inguruan geltoki berri bat eraikiko da, 5. linearen eta 2. linearen artean bidaiariak trukatzeko, kota bereko nasa paraleloetan. Ekitaldian trenbide-sare konplexu horri bide emango dion soluzioaren berri eman dute. Planteamendu horrek Usansoloko ospitalerako lotura zuzenagoa ekarriko du, bidean atzera egin beharrik gabe. Horretarako, Etxebarritik Basaurira iristean 2. linearen trazadura zertxobait aldatuko duen 400 metro inguruko tunel berri bat eraikiko da, trenak etorkizuneko geltokira hurbiltzeko eta, horrela, 5. lineara aldaketa errazteko, ondoren Ariz eta Basaurirantz jarraitzeko. Obra-zuzendariak plano gainean zehaztu du linea biak lotuko dituen geltokiaren soluzioa, eta ETS hondeaketa-lanetan egiten ari den trazaduratik gertu dauden eraikinen jarraipen geoteknikoaren eta ikuskapenaren berri eman du.

Bai Ahaldun Nagusiak, bai sailburuak balioa eman diete Bizkaiarentzat eta Euskadirentzat azpiegiturak gizarte-egituraketari dagokionez ekarriko dituen onurei.

Mugikortasun Jasangarriaren sailburuak adierazi du Euskadiren mugikortasun jasangarrian eta kohesio sozialean aurrera egitea Eusko Jaurlaritzaren helburu utziezina dela, eta nabarmendu duenez 5. linea bezalako azpiegiturek pertsonen bizitza eraldatzen laguntzen dute, haien bizi kalitatea hobetuz, eta, aldi berean, deskarbonizazioa bultzatzen dute, ingurumena errespetatzen duen mugikortasuna sustatuz. Susana García Chuecak gaineratu duenez garraio publiko eraginkorrean eta irisgarrian oinarritutako mugikortasunerako eskubideak eguneroko zereginetan pertsonen bizitza erraztuko duten azpiegitura moderno eta integratuak behar ditu, eta, horretarako, beharrezkoa da administrazio publikoen lankidetza eta lerrokatzea.

Basauriko, Galdakaoko eta inguru osoko bizilagunakaz hartu dogun konpromisoa beteteko puntuan gagoz, adierazi du Elixabete Etxanobe Bizkaiko Ahaldun Nagusiak. Orobat nabarmendu gura izan du Usansoloko Ospitaleagazko etorkizuneko lotura: izan be Busturialdeko, Lea Artibaiko, Durangaldeko, Arratiako eta Nerbioiko eskualdeetako 200.000 persona ingururentzako erreferentzia-ospitalea da Usansolokoa. Bedian, Busturialdeko eta Durangaldeko Euskotrenen lineakaz konektauko da. Hobetuko dau, beraz, eskualde horreetako konektibidatea, Usansoloko Ospitaletik metro-maiztasunak eskainiko ditu-eta. 6,3 kilometroko linea txiki honek eragin izugarria izango dau operatibo dagoanean, gaineratu du Etxanobek.

Azalpen teknikoen ondoren, erakundeetako ordezkariak obran zehar ibili dira eta Larrazabalgo etorkizuneko trenbidera igo dira. Trenbide horrek beste pasabide bat du ETSren trenbideen gainean, 2. linearen etorkizuneko trenbideetara, eta Aceralia industria-enpresak bere merkantziak garraiatzeko erabiltzen duen trenbide propioaren gainean. Gaur egun, 30 metro inguruko luzera duten hiru habe aurrefabrikaturen gainean bermatzen da taula. Datorren udan irekiko da, oinezkoek eta ibilgailuek erabiltzeko, egungoaren ordez. Eremu horretan amaitu da Aceraliako kaxoiaren lehen fasea (lurperatutako tunel faltsu bat), 25 metro ingurukoa, eta hortik igaroko da Aceraliako behin betiko trenbidea, merkantzien behin betiko trazadurarekin lotu aurretik. Kaxoia, goiko eta beheko lauza batez eta 7,5 metroko bi hastialez osatuta dago. Bigarren fasea Larrazabalgo egungo zirkulazioa behin betiko trenbidetik desbideratzen denean hasiko da.

ETS duela gutxi hasi da merkantzien kaxoiaren (Basurtu-Ariz) zimendatze-lanak egiten. Lan horien bidez, 162 mikropiloteko bi lerro paralelo instalatuko dira, kargak azpiko arrokara transferitzeko. Zulaketa errazteko, hondeaketa nabarmena egin da azpiegitura horren hegoaldean dagoen lurzatian. Merkantzien kaxoia Sarratuko geltokiarekin paraleloan dago.

Beste lan bat Ibarro eraikin zaharra eraistea izan da, lan konplexua, Euskotrenen trenbideak gertu daudelako. Ezkerreko, aurreko eta eskuineko pantailak ere egin dira, Aperribairantz doan tunelaren ahokadura gauzatzeko. Pantaila horien gainean mikropiloteen buruak lotzen dituen habea enkofratu, armatu eta hormigoiztu da.

Segizioak in situ egiaztatu du, halaber, amaitu direla tunelaren erasoa egingo duten makinak sartzeko eta irteteko bideak, bai eta lanetan azaleratutako uren tratamendu osoaz arduratzen den araztegia ere.

Aperribaiko geltokiari dagokionez, etorkizuneko terminalaren goiko ezkerreko pantaila osatzen duten mikropiloteak zulatzeko lanak amaitu ditu ETSk. Gainera, auskultazio-plan bat ezarri da. Plan horretan, lursailean txertatutako bi inklinometro, gainazalean nibelatzeko sei mugarri eta ondoko eraikinetan hainbat diana sartzen dira, hondeaketatik eratorritako joan-etorriak monitorizatzeko.

Eraikitzen ari diren beste bi tarte

Aperribai-Galdakao tartea 2,8 kilometro da luze, eta etorkizunean larrialdi-irteera bihurtuko diren bi eraso-galeria ditu, Olabarrieta eta Abusu. Gaur egun, hondeaketa lanak eta Olabarrietako ahokaduraren euspena eginda daude, eta ezartzen ari dira datozen asteetan tunela hondeatzen hasteko obra-instalazioak. Abusun, euste-pantaila egin da, eta ahokadura hondeatu da.

Galdakao-Ospitalea tartea 1.930 metro da luze, eta dagoeneko 200 metro baino gehiago zulatu dira Puentelatorreko eraso-galeriatik. Behin lineako tunelera iritsita, talde batek 980 metro egingo ditu bigarren zatiaren amaieraraino, eta besteak 950 metro Usansolorantz.