Aurrerapauso kualitatibo handia egin du Bizkaiak arte eszenikoetarako, zinemarako eta ikus-entzunezko erreferente gisa.

New Yorkera joandako Foru Aldundiaren ordezkaritzaren xedea izan da astearte honetan hainbat bilera egitea ikus-entzunezko, zinemako eta arte eszenikoetako eragileekin.

Azken urteotan, aurrerapauso kualitatibo handia egin du Bizkaiak arte eszenikoetarako, zinemarako eta ikus-entzunezko erreferente gisa, azpimarratu du Elixabete Etxanobe Bizkaiko Ahaldun Nagusiak.  

Estatu Batuetara egin dugun bidaia honetan bilerak izan ditugu arte eszenikoetan eta zineman erreferenteak diren erakundeekin, aurrez aurre ezagutu nahi baitzuten zer eskaintzen duen gure lurraldeak zerga-neurriez gain. Izan ere, Bizkaian lehen mailako konpainiak eta profesionalak ditugu. Espero dut kontaktu hauek Bizkaiak kultura arloan duen posizioa indartzeko balio izatea, gure konpainiek eta profesionalek aukera gehiago eta hobeagoak izan ditzaten beraien karrera garatzeko, eta kalitatezko enplegua sor dadin zineman eta arte eszenikoetan, nabarmendu du Bizkaiko Ahaldun Nagusiak.

Warner Br. Discovery eraikinean,  Elixabete Etxanobe Bizkaiko Ahaldun Nagusia eta Leixuri Arrizabalaga Euskara, Kultura eta Kiroleko foru-diputatua Motion Pictures Association elkarteko Brian O’Leary aditu fiskalarekin bildu dira, ezagutzera emateko Bizkaiko lurralde historikoa filmaketak egiteko leku erakargarri gisa, lurraldeak eskaintzen dituen zerga-pizgarriez haratago.  

Motion Pictures Association Estatu Batuetako merkataritza-erakundeak Hollywoodeko zinema eta telebistako estudio nagusienak ordezkatzen ditu: Walt Disney Studios, Netflix Studios, Paramount Pictures, Sony Pictures Entertainment, Universal Pictures eta Warner Bros. Discovery.

Motion Pictures erakundeko adituarekin izandako bileran, foru-ordezkaritzak azaldu egin du Bizkaiko lurraldeak industria zinematografikoa sustatzeko duen estrategia. Bileraren helburua izan da Bizkaia ikus-entzuneko ekoizpenetarako lurralde erakargarria dela erakustea; nabarmendu da filmaketarako eszenatoki gisa duen potentziala eta sektorean enplegua sortzeko ahalmena.

Proposatu egin da Euskalduna Jauregia ISPAren Kongresuaren egoitza izatea 2028an

Motion Pictures Association erakundeko aholkulariarekin izandako bilera New Yorkera joandako ordezkaritzaren gaurko azkenengo bilera izan da. Goizean ISPA (International Society for the Performing Arts) elkartearekin bildu dira;  erakunde horrek arte eszenikoen liderrak eta profesionalak biltzen ditu, eta bere xedea da arlo honetako nazioarteko komunitatea sendotzea eta babestea.

ISPArekin izandako bileran, Bizkaiak datorren urtean New Yorken izango den ISPA Kongresuan parte-hartzeari buruz hitz egin da; Bizkaiak parte hartuko luke Euskalduna Jauregia eta BOS -Bilbao Orkestra Sinfonikoa bezalako proiektuekin. Eta, bide batez, proposatu dute Euskalduna Jauregia izatea 2028an egingo den kongresurako egoitza.

Esparru horretan, Etxanobe eta Arrizabalaga bildu dira David Baile Isparen CEOrekin eta Americas Society-ren jatorri argentinarreko Sebastián Zubieta musika zuzendariarekin. David Rockefeller filantropoak sortu zuen 1965ean sortutako Americas Society-ren xedea da kultura zabaltzea Latinoamerikako nazioarteko harremanez bidez.

Topaketak euskal komunitate artistikoarekin

Ikus-entzunezko sektorearekin eta eszena-sektorearekin izandako bileren aurretik, foru-ordezkaritzak Dia Bacon museoa bisitatu du, eta New York hiriko euskal jatorriko arte- eta kultura-komunitatearekin bildu da.  Ildo horretan, Etxanobe eta Arrizabalagak bilera informal bat izan dute Estatu Batuetako hirian bizi den Kirmen Uribe idazlearekin, eta Itziar Barrio disziplina anitzeko artista bilbotarraren estudioa bisitatu dute.

Bihar bilera izango dute New Yorkeko Solomon R. Guggenheim museoan

Bizkaiko ordezkaritzaren erakunde-bidaiak bihar jarraituko du euskal agintariei New Yorkeko Solomon R. Guggenheim Museoan egongo zaien harrerarekin. Han, Imanol Pradales lehendakaria buru duen Eusko Jaurlaritzaren ordezkaritza batuko zaio foru-misioari, eta bilera bat izango dute, Guggenheim Bilbao Museo Fundazioko fundatzaile eta patronatu-kideekin batera, Mariët Westerman Solomon R. Guggenheim Museoko zuzendariarekin eta Tom Ellis Fundazioko Patronatuaren lehendakariordearekin batera.