Laespada: "Lan-aukerak ez ezik, autonomia eta gizarteratzea ere hobetzen ditu"

Enplegu eta Ekintzailetzarako ANEZKA izeneko programako anezkek gutxienez 701 langabe laneratzen lagundu dute Bizkaian, gure lurralde historikoan duela bederatzi urte abian jarritako 66 lantaldeen bitartez.

Azken hiru taldeek joan den astean amaitu zuten beren jarduera, lan intentsiboko lau hilabeteren ondoren, eta gaur, asteartea, topaketa bat egin dute. Bertan, Teresa Laespada Enplegu, Gizarte Kohesio eta Berdintasuneko foru-diputatu eta ahaldun nagusiordeak hartu du parte.

Laespadak adierazi duenez, Enplegu eta Ekintzailetzako Anezken helburu nagusia langabeen lan-aukerak hobetzea da, lan-merkatuan sar daitezen lagunduz.

Ildo horretan, azpimarratu duenez, prozesu horrek, gaitasun profesionalak indartzeaz gain, tresnak ematen dizkie oztopo pertsonalak eta testuingurukoak gainditzeko, haien autonomia eta gizarteratzea sustatuz.

Enplegu eta Ekintzailetzarako ANEZKA programa foru-sail horren ekimena da, eta Enplegu eta Ekintzailetza Foru Agentziaren (DEMA) bidez kudeatu eta garatu da.

Azken hiru anezkak

ANEZKA programaren baitan garatu diren azken hiru Enplegu eta Ekintzailetzako anezkak duela lau hilabete sortu ziren, eta enplegagarritasuna hobetzeko lanean aritu diren 61 langabek (40 emakume eta 21 gizon) parte hartu dute bertan. Zehazki, orain arte 31 pertsonak lortu dute lanpostu bat, eta programaren bederatzi urteko esperientziak erakusten du laneratze-prozesuak anezka amaitu eta hilabete batzuetan jarraitzen duela.

Guztiz doakoa eta borondatezkoa da Enplegu eta Ekintzailetzarako ANEZKA programa, eta funtsezko tresna bihurtu da Bizkaiko langabeen lan-aukerak hobetzeko. Prestakuntza praktikoa eskaintzeaz gain, ANEZKAk etengabeko laguntza eman du, eta harreman-sare profesionalak sortzea sustatu du. Ikuspegi proaktibo, kolaboratibo eta solidarioa izanik, Lurralde Historikoan laneratzeko ekimen nagusietako bat izan da.

Programaren onuradunek prestakuntza-pilulak jaso dituzte, aurrez aurreko saioak eta birtualak konbinatuta, banakako jarraipenarekin osatuta. Edukiek lan-gaitasunak indartzeko  funtsezko arloak jorratu dituzte, hala nola autoezagutza, marka pertsonala, lan-aukerak identifikatzea eta enplegua bilatzeko tresna digitalak erabiltzea.

Gainera, arreta berezia jarri da lan-elkarrizketak prestatu, curriculumak egin eta komunikazio eraginkorrerako trebetasunak garatzeko. Helburu nagusia parte-hartzaileen gaitasunak optimizatzea eta lan-merkatuan sartzeko aukerak areagotzea izan da.

Laguntza jaso dute, halaber, enpleguaren eta laneratzearen hainbat arlotako espezialistek emandako tailer praktikoen bidez. Gainera, networking-foroak antolatu dira tokiko enpresekin, eta horrek aukera eman die parte-hartzaileei beren harreman-sareak zabaltzeko eta merkatuan dauden lan-aukerak sakon ezagutzeko.

Talde tekniko espezializatu baten etengabeko laguntza izan da edizio honen beste ezaugarri nabarmenetako bat, laguntza pertsonalizatua, orientazioa eta programaren jardueren dinamizazioa izan baititu. Lankidetza-ikuspegi hori eta elkarri laguntzeko giroa funtsezkoak izan dira inplikatutako pertsonen konfiantza indartzeko eta haien enplegu-bilaketa aktiboa errazteko.

ANEZKAren lidergoa Bizkaiko laneratzean

Anezkak langabe boluntario aktiboen talde heterogeneoak dira. Koordinatzaile baten laguntzarekin antolatzen dira, besteren konturako nahiz norberaren konturako enplegu-bilaketa sustatzeko, lan-merkatuan sartzeko bide eta modu guztiak aztertzen baitituzte. Anezka bakoitzean 20 parte-hartzaile egoten dira, eta gutxi gorabehera 4 hilabeteko jarduketa zuzena egiten da  parte-hartzaileekin.

Enplegu eta Ekintzailetzarako ANEZKA programa Lurralde Historikoko ekimen garrantzitsuenetako bat da. 2016ko otsailetik gaur arte 66 anezka jarri dira martxan, 1.129 langaberentzat.

Langabe horietako 701ek lortu dute lan-merkatuan sartzea, hau da, % 62ko laneratze-tasa (hirutik bi emakumeak izan dira). Ehuneko hori handituko da hurrengo hilabeteetan, irekita dauden hautaketa-prozesuak ixten direnean. Urteetan zehar hainbat erronka izan dira; pandemiaren ondorioz, esate baterako, programa online formatura egokitu behar izan zen eta, edukiera murriztearen ondorioz, parte-hartzaileen kopurua ere murriztu behar izan zen. Hala ere, Enplegurako eta Ekintzailetzarako anezkek enplegagarritasuna indartzeko eta sare profesional berriak sortzeko konpromisoari eutsi diote.