Foru Aldundiaren Gobernu Kontseiluak Bizkaiko udalerrietan abiadura handiko interneteko konexioak zabaltzeko prozesua ixteko lanak egingo dituzten telekomunikazioetako operadoreentzako laguntzen azken multzoa onetsi du. Aldundiak 1,5 milioi euro inbertituko ditu lan horien azken fasean. Dirulaguntzak norgehiagokaren araubidean emango dira.

Laguntza horiei esker banda zabal ultra-azkarra 44 herritako 328 higiezin sakabanatutara helduko da: Alonsotegi, Arrankudiaga, Arrieta, Arrigorriaga, Aulesti, Bakio, Bedia, Berango, Bermeo, Berriatua, Bilbo, Dima, Durango, Ea, Erandio, Ereño, Etxebarria, Galdakao, Galdames, Gatika, Gautegiz Arteaga, Getxo, Gizaburuaga, Güeñes, Ibarrangelu, Iurreta, Karrantza Harana, Lemoa, Lezama, Mallabia, Mañaria, Markina-Xemein, Mendata, Mendexa, Meñaka, Mungia, Munitibar, Muskiz, Muxika, Orozko, Sopuerta, Zaldibar, Zalla eta Zeanuri.

Atari horiekin amaitutzat joko da abiadura handiko interneteko konexioa 96 udalerritako 7.620 ataritara zabaltzeko prozesua, pandemiaren ondoren hasi zena.

Operadoreek bete beharreko baldintzak

Banda zabalaren aurreko hedapen guztian bezala, konexio hauek ezartzeko dirulaguntza jaso nahi duten operadoreek baldintza batzuk bete behar dituzte: konexioa gutxienez 300 megakoa izan behar da, eta simetrikoa (behera zein gora, hau da, datuak igotzeko zein deskargatzeko), eta datu-transferentziak ezin du mugarik eduki; prezioa jende asko bizi den tokietan aplikatzen diren merkatuko eskaintzen antzekoa izan behar da; alta-eskaerei hamar egun pasatu baino lehen erantzun behar diete. Gainera, laguntza jasotzen duten operadoreek diruz lagundutako azpiegiturak handizkari modura erabiltzen utzi beharko diete eskatzen duten operadore guztiei, Merkatuen eta Lehiaren Batzorde Nazionalak ezartzen duenarekin bat etorriz. Horrela, herritarrek operadoreen artean hautatu ahal izango dute norekin kontratatzen duten interneteko konexioa, beren ustez egokiena den eskaintzaren arabera .

Bizkaiko Foru Aldundiak azken urteetan digitalizazioaren alde egin duen apustua bat dator Europar Batasunak ezarritako lehentasunekin, eta horren asmoa da bizkaitarren arteko berdintasuna sendotzea, non bizi diren, herrian zenbat diren edo herrigunea zein handia den gorabehera. Abiadura handiko interneteko konexioaren zabalkuntza oso lagungarria da herritarrentzat, enpresentzat, ETEentzat eta autonomoentzat, eta hezkuntza eta bizi-kalitatea hobetzen ditu.