Bizkaiko Foru Aldundiak eguneratu egin du 2024ko ekitaldirako diru-bilketaren aurreikuspena, eta 2025erako diru-bilketaren aurrekontua finkatu du. Urte honetarako aurreikusitako hazkundeak % 0,5 hobetzen du aurreko ekitaldian lortutakoa; 2025ean, berriz, diru-bilketa % 7,7 handitzea espero da 2024koaren aldean, eta % 3,6 ekitaldi bereko aurrekontuarekin alderatuta.

Zenbateko horiek nabarmen eragiten diete mutualistei egindako itzulketei; izan ere, 400 milioi euro baino gehiago ordaindu dira 2019tik 2023ra bitarteko ekitaldietan, ekitaldi honetako diru-bilketaren aurreikuspenetan sartzen direnak, eta 100 milioi baino gehiago 2025ekoetan. Itzulketa horien eraginik gabe, 2024rako diru-bilketaren aurreikuspenak % 4,8 gaindituko zukeen 2023an lortutakoa, eta 2024ko aurrekontua % 100,4 bete.

Elixabete Etxanobe pozik agertu da diru-bilketak gora egin duelako, nahiz eta itzulketa horiek inpaktua izan duten, eta kolektibo ahulenei zuzendutako azken krisien ondorioak arintzeko hartutako neurriengatik (200 euroko kenkaria, langile autonomoentzako forfait-en igoera, BEZaren murrizketa premia handiko produktuetan, etab.).

Ahaldun Nagusiaren ustez, Bizkaiak duen zerga-sistemak Bizkaiko gizartearen eta erakundeen beharrei erantzuten die; sistema horrek funtzionatzen du, eta hiru erakunde-mailei (Eusko Jaurlaritza, Aldundia eta udalak) gizartearen beharrei erantzungo dieten aurrekontuak egiteko gaitasun nahikoa bermatzen die.

2025erako aurreikuspenek kontuan hartzen dute Eusko Jaurlaritzak egindako koadro makroekonomiko berria, 2025erako BPG nominala % 4,3 handitzea aurreikusten duena.

2024ko zerga-bilketaren aurreikuspena

2024ko ekitaldiaren itxieran Bizkaian 9.457,7 milioi euro bilduko dira zerga itunduengatik.

2023ko ekitaldian lortutako zerga-bilketari dagokionez, 9.411,0 milioi euro, % 0,5eko igoera izango da.

2024ko ekitaldi honetako zerga-bilketaren aurrekontuarekin alderatuta, 9.829,5 milioikoa dena, diru-bilketa aurrekontuaren % 96,2ra iritsi da.

Hiru foru-aldundien baterako zerga-bilketaren aurreikuspena 18.300,9 milioi eurokoa da 2024an, 2023an lortutakoa baino % 0,5 gehiago eta bilketa-aurrekontuaren % 96,3 2024rako

2025ko zerga-bilketaren aurreikuspena

Zerga itunduen bidezko bilketa-aurrekontua, 2025ko ekitaldirako, 10.182,3 milioi eurokoa da Bizkaian.

2024ko aurrekontuarekin alderatuta (9.829,5 M €), % 3,6ko igoera izango da.

2024rako aurreikusitako zerga-bilketari dagokionez (9.457,7 M €), % 7,7ko igoera da.

Hiru foru-aldundien zerga itunduen bilketaren aurrekontua 19.718,6 milioi eurokoa da, 2024ko aurrekontua baino % 3,8 gehiago eta 2024ko ekitaldia ixteko aurreikuspena baino % 7,7 gehiago.

Zifra horietan aurreikusita dago aldi baterako neurriak luzatzea, zerga-berrikuspena onartu arte. Neurri horien artean, nabarmentzekoak dira PFEZaren kuota 200 euro murriztea ohiz kanpo, edo jarduera ekonomikoak egiten dituzten pertsona fisikoen errendimendu garbia kalkulatzeko forfait-ak edo gastuen ehunekoak handitzea.

Koefiziente horizontalak eta Eusko Jaurlaritzari egindako ekarpenak

Finantzen Euskal Kontseiluak eguneratu egin ditu foru-aldundiek 2025eko ekitaldirako Eusko Jaurlaritzari egin beharreko ekarpenen koefiziente horizontalak, eta Bizkaiaren kasuan % 50,37koa izan da. Beraz, 2025rako Bizkaiko koefiziente horizontala % 0,12 murriztu da 2024koaren aldean, hau da, % 50,49koa izan dena.

Koefiziente hori bi faktoreren araberakoa da: BPGren bilakaera (5 ehunen igo da, Bizkaiko BPG termino erlatiboetan hazi baita, gainerako Lurralde Historikoekin alderatuta) eta ahalegin fiskala (17 ehunen jaitsi da, koefizienteak ondoen biltzen duten lurraldeak saritzen baititu, hala nola Bizkaia).

2025erako hiru foru-aldundiek erakunde komunei 13.200,0 milioi euroko ekarpena egingo dietenez, Bizkaiari dagokion ekarpena 6.648,8 milioi eurokoa da.

Arabak 2025erako duen koefiziente horizontala % 16,04 da, eta Gipuzkoakoa % 33,59; bi aldundiek 2.117,3 eta 4.433,9 milioiko ekarpenak egingo dituzte, hurrenez hurren.

Egokitzapen Orokorrerako Funtsa

Egokitzapen Orokorrerako Funtsari dagokionez Finantzen Euskal Kontseiluak 178,0 milioi euroko aurreikuspena onartu du 2025rako. Kopuru hau Arabako Foru Aldundiaren (100,4 milioi) eta Gipuzkoako Foru Aldundiaren (77,6 milioi) artean banatuko da. Bizkaiak 26,2 milioi euro jarriko ditu Egokitzapen Orokorrerako Funtsaren zuzkiduran.