Bizkaiko Ahaldun Nagusiak, Elixabete Etxanobek, krisalidak erabiliz proteina birkonbinatzaileak ekoizten dituen munduko lehen planta industriala inauguratu du gaur; plantaren arduraduna Cocoon Bioscience da eta Bizkaiko Parke Zientifiko eta Teknologikoan dago. Proiektu berritzaile honen lehen urratsak BIC Bizkaian garatu ziren eta Bizkaiak bioteknologiaren sektorean eta inbertsiorako lurralde erakargarri moduan duen zeregina indartzen du.

Etxanobek azpimarratu duenez inbertsio honek indarra emoten dio gaur bioteknologiaren garapenari Bizkaian. Zergatik? Gure lurraldearentzat sektore estrategikotzat jotzen dugulako, eta Euskadiko espezializazio adimendunaren estrategian lehentasuna duen sektorea dalako, gure gaitasun zientifiko-teknologikoengatik eta jarduera ekonomikoa eta kalidadezko enpleoa sortzeko potentzialagatik. Instalazio hau adibide argia da. Oso ondo erakusten du nola erakartzen dituen Bizkaiak inbertsioa eta talentua, nola sendotzen duen gure lekua munduan, berrikuntzaren eta iraunkortasunaren arloan dugun posizioa. Cocoon-ek Bizkaia garatzen lagunduten du, ekonomia aurreratuago eta dibersifikatuago baterako bidean.

Etxanobekin batera inaugurazioan, besteak beste, Ainara Basurko, Ekonomia Sustatzeko foru diputatua, Josh Robinson eta Romy M. Dalton, hurrenez hurren  Cocoon-eko zuzendari nagusia eta eragiketa-zuzendaria; eta Javier García, Columbuseko bazkidea, izan dira.

Cocoon Biosciences intsektuen bidez proteina eta entzima birkonbinatzaileak fabrikatzen espezializatu den enpresa da eta bere jarduna haragi landua eta txertoen ekoizpena bezalako aplikazioetara bideratzen du. Planta berriak 4.000 metro karratu ditu eta farmazia-industriarako proteina alternatiboen eta entzimen eskari gero eta handiagoari erantzutea ahalbidetuko du. Ahaldun Nagusiak adierazi duenaren arabera, instalazio hau funtsezko urratsa da ekonomia dibertsifikatuagoa eta jasangarriagoa lortzeko bidean aurrera egiteko eta Bizkaiak zentro teknologikoekin, unibertsitateekin, ekimen pribatuarekin eta Bizkaiko Foru Aldundia bezalako administrazio publikoekin lankidetzan eraiki duen berrikuntza-ekosistemaren arrakasta islatzen du.