Bizkaiko Foru Aldundiko Prebentzio, Suhiltzaile eta Salbamendu Zerbitzuak (PSSZ) udazken honetan amaituko du bere ikasgela mugikorrak Bizkaiko eskualdeetatik egiten duen ibilbidea. Ikasgela hori ad hoc diseinatuta eta hornituta dago Bizkaiko herritarrak, eta bereziki, haurrak eta gazteak, suteen aurkako prebentzioaren garrantziaz sentsibilizatzeko.

Ibilbidea amaitzeko, foru-suhiltzaileak Enkarterri eta Uribe Kosta eskualdeetara joango dira. Irailaren 29an, ikasgela mugikorra Gueñesen egongo da, eta Uriosteko suhiltzaileek egingo dituzte jarduerak, eskualdeko erreferentziako suhiltzaile-etxeko (kasu honetan, Zalla) suhiltzaileen laguntzarekin. Ikasgela Galdotxa Arana plazan egongo da. Prestatutako programa goizeko 10:30etik 14:30era bitartean egingo da.

Edukiontzi eramangarria ikasgela bihurtuta, Bizkaiko suhiltzaileek suteen aurkako segurtasunaren eta autobabesaren printzipioak azaltzen dituzte, modu ludikoan eta didaktikoan, hitzaldi, adibide praktiko, tailer edo ginkanen bidez. Jarduerak garatzeko, edukiontzi eramangarri zabalgarriaz gainera, autoponpa-kamioi bat izango dute.

Gela mugikorraren hurrengo kokalekua Sopela izango da, urriaren 20an (igandea), eta horrela, Bizkai osoa zeharkatu duen ibilbidea amaitutzat joko da. Lehenago, Santurtzin, Igorren, Lekeition, Derion, Amorebieta-Etxanon eta Gernikan izan dira.

Suteen aurre egiteko heziketa

Funtsezkoa da herritarrek sute baten aurrean nola jokatu behar duten jakitea, pertsonen bizitza babesteko, eta, gainera, suaren hedapena geldiarazteko eta, ondorioz, izan daitezkeen kalteak minimizatzeko.

Bizkaiko Foru Aldundiko suhiltzaileak, suteen aurkako prebentzioaren eta portaeraren arloko hezkuntzak duen garrantziaz jabetuta, parte hartzen dute herritarrak sentsibilizatzeko eta kontzientziatzeko ekimenetan. Ekimen horietako bat edukiontzi eramangarria da, eta ikasgela bihurtuta, prebentzioaren arloko funtsezko mezuak zabaltzeko erabiltzen dute.