Gaur goizean inauguratu da Dantzaldia 2024, Bilbo-Bizkaiko Nazioarteko Dantza Jaialdiaren XXV. edizioa, Bilboko Arte Ederren Museoan. Bertan izan dira: Leixuri Arrizabalaga Bizkaiko Foru Aldundiko Euskara, Kultura eta Kirol foru diputatua; Andoni Iturbe, Eusko Jaurlaritzako Kultura Sailburuordea eta Gonzalo Olabarria Bilboko Udaleko Kultura eta Gobernantza Zinegotzia Dantzaldiaren antolatzaileekin batera.

Ondoren, "La declamación muda" pieza ikusteko aukera izan dute bertaratutakoek, Melania Olcinarena, egungo Dantzako Sari Nazionala (Interpretazio modalitatean). Bertan, Olcinak berak (Bartzelona, 1982) tronboi-jotzaile batekin bat egiten du, musika zuzenean jotzen duena eta, aldi berean, dantzariaren eta koreografoaren mugimenduekin eta arnasketarekin bat datorrena.

2000. urtean sortu zen jaialdi bizkaitarraren 25. urtebetetze hau ediziorik nazioartekoena izango da. Italia izango da herrialde gonbidatua, Tempi di danza Italiako dantza garaikidearen hedapenaren alde lan egiten duen erakundearen konplizitateari esker, azaldu du Laura Etxebarriak, Dantzaldiako zuzendarikideak.

Horrela, Alpeetako hiru konpainiak ikuskizun bana estreinatuko dute Estatuan: Nicola Galiren "Deserto tattile" (azaroaren 7an, Azkuna Zentroan), Luna Cenereren "Shoes on" (azaroaren 17an, La Fundicion-en) eta Jacopo Jennaren "Some Choreographies" (azaroaren 21ean, Azkuna Zentroan). Dantzaldia 2024k Estatuan eskainiko duen laugarren estreinaldia azaroaren 30ean iritsiko da Portugaldik ("Feedback", CRL, La Fundición).

Baina nazioarteko bisitak ez dira aipatutakoekin amaitzen. Hurrengo hitzordua (urriaren 1a, asteartea) Bilboko Arte Ederren Museoan izango da berriz ere. Bertan, Icaza hall handian eta Juan Muñozen 'Hanging Figures' eskulturen azpian, Hang Tho Creative (Vietnam/Herbehereak) eta Small Axe (Grezia) konpainien emanaldiak izango dira. Doako sarrerarekin (gonbidapena erreserbatuz pinakotekaren webgunean), muntaia labur bana aurkeztuko dute: "False Memories" eta "Farisa", hurrenez hurren, Kanarietako Masdanza dantza garaikideko pieza laburren jaialdi nagusiko Nazioarteko Epaimahaiaren Lehen Sariaren irabazleak 2022an eta 2023an.

2024ko Dantzaldiaren programazioa flamenko berriari eskainitako bi jardunaldik osatuko dute. José Maldonado katalanak "Galería" estreinatuko du Euskadin, flamenkoa eta denbora errealeko sorkuntza piktorikoa uztartzen dituen proposamena, lau eszenatan garatzen dena, bakoitza lau artista ikonikoren omenez: Manuel de Falla, Federico García Lorca, Salvador Dalí eta Carmen Amaya. Guggengeim Bilbao Museoa (azaroak 23) eszenatoki bikaina izango da dantza, musika eta pintura uztartzen dituen proposamen paregabe baterako. Hurrengo astean, azaroaren 29an, Malagako Rocío Molina dantzari ospetsuak (2010eko Sari Nazionala, Interpretazio modalitatea; Max 2015, koreografia onenari, 2022ko Arte Ederretako Merezimenduari Urrezko Domina eta 2023ko Talia, emakumezko dantza interprete onenari) "Variaciones de Lo Inefable" ikuskizuna ekarriko du Barakaldo Antzokira.

Dantzaldiaren XXV. edizioaren ospakizun borobil honek ere hainbat jarduera paralelo izango ditu. Dantza-zinema egongo da, "La Singla" (Paloma Zapata, 2023) dokumentalaren proiekzioarekin, 18 urte bete aurretik flamenkoa irauli zuen baina 30 urte bete aurretik agertokietatik desagertu zen dantzari gorrari buruzkoa. Gainera, aipatutako José Maldonadok profesionalentzako masterclass bat emango du Leioako Andoni Aresti Dantza Eskolan, eta Sharon Fridman koreografoak La Fundición bisitatuko du abenduan, dantza inklusiboko tailer bitxi bat proposatzeko. Bertan, publiko orokorrak bere gorputz-mugimenduarekin esperimentatuko du itsu-itsuan, itsutasun garaikidea (metaforikoa) irudikatzeko.

Xehetasun guztiak, dantzaldia.org webgunean