Tributu itunduak direla-eta, Bizkaiko Lurralde Historikoan uztailean bildutako kopurua 2.065,4 milioi euro izan da: aurreko ekitaldiko hilabete berean bildutakoa baino 104,5 milioi gehiago, hau da, % 5,3ko ehuneko positiboa. Uztailera arte zerga itunduen bidez bildutako zenbateko osoa aurreko ekitaldikoa baino % 2,5 handiagoa da, eta horrek dakarrena da 153,0 milioi gehiago, eta ekitaldiko aurrekontuaren % 63,2.

Zuzeneko ezarpenak, PFEZaren kanpaina amaitu eta sozietateen gaineko zergaren auto-likidazioak aurkeztu ondoren, 3.404,9 milioi euroko ekarpena egin du, % 4,9ko hazkundearekin 2023ko metatuarekin alderatuta. PFEZa % 4 hazi da,  mutualistei egin zaizkien itzulketak gorabehera, zergaren kanpaina markatu dutenak eta kuota diferentzialaren zenbateko negatiboa % 35,0 handitu dutenak  (303,6 milioi, 2023an baino ia 80 milioi gehiago). Lanaren (+% 5,6) eta kapital higigarriaren (+% 61,8) atxikipenen bilakaera positiboak soberan konpentsatzen du itzulketen eragin negatiboa. Enpresa- eta lanbide-jardueren zatikako ordainketak ere % 8,3 igo dira; loteria- eta apustu-sarien gaineko karga-tasa bereziak, berriz,  ia % 50eko jaitsierari eutsi egin dio. Ondarearen gaineko Zerga, Fortuna Handien gaineko Elkartasuna barne, % 15,5 hazi da 2023ko datuekin alderatuta.

Sozietateen gaineko Zerga % 11,5 hazi da, kuota diferentzialaren % 5,7ko igoerari esker, 2023ko ekitaldiari dagozkion auto-likidazioen ondoriozko diru-sarrerak aurkeztu eta kontabilizatu ondoren.

Ez-egoiliarren errentaren gaineko zergaren bilketan zifra negatiboak mantendu dira, 32,3 milioi euro gutxiago bildu baitira (ehunekotan: %-34,6); izan ere, aurreko ekitaldian ezohiko diru-sarrera egon zen.

Zeharkako zergapetzeari dagokionez, bilketa 2.286,1 milioira iritsi da, eta horrela beherakadaren susperraldiaren bideari eutsi zaio, orain -% 1,1ekoa baita (ehuneko 3,7 puntu txikiagoa ekainean metatutakoa baino). BEZa % 8,6 jaitsi da (ekainean baino hiru puntu gutxiago), eta zerga bereziek, behin doituta, bilakaera desberdina izan dute: Hidrokarburoen gaineko Zerga (+% 0,1) mantendu egin da, Tabakoaren zerga (+% 2,3) eta Elektrizitatearen zerga (+6,7 milioi) igo egin dira, eta Alkoholena eta Garagardoarena, berriz, % 13,4 eta % 5,1 jaitsi dira, hurrenez hurren. Zeharkako zergen gainerako kontzeptuek bilakaera positiboa izan dute. Hortaz, hazi egin dira Ondare Eskualdaketen gaineko Zerga (+% 4,7) eta Egintza Juridiko Dokumentatuak (+% 31), Zenbait Garraiobide (+% 25,7), Aseguru Primak (+% 3,6), Joko Jarduerak (+% 7,2) eta Zerbitzu Digital Jakin batzuk (+% 12,3). Finantza-transakzioen gaineko zergak, ordea, % 23,7 egin du behera.

Tasetan eta bestelako diru-sarreretan 35,8 milioi euro bildu dira, alegia, 2023an baino 5,6 milioi gutxiago (oro har, %9,6 jaitsi dira). Atzerapen-interesak (-% 20,6) eta zehapenak (-% 47,9) aurreko ekitaldiko ezohiko diru-sarreraren eraginpean geratu izanak justifikatzen du beheranzko bilakaera hori, nahiz eta % 54,8 igo diren premiamendu-errekarguak eta % 1,5 joko-tasak.

Kudeaketa propioaren bidezko diru-bilketa, azken batean, % 2,3 hazi da, aurreko urteko uztailarekin alderatuta.

Uztailean egokitzapenen bigarren epea ere kontabilizatu da, bai lurralde historikoen arteko harremanei eragiten dietenena, bai Estatuarekin egiten direnena.

Lehenengoei dagokienez, BEZaren egokitzapenagatik Bizkaian metatutako ordainketa % 30 jaitsi da (322,8 milioi, 2023an ordaindutako 461,1 milioien aldean); horietatik 76,4 milioi Arabari dagozkio (-77,6 milioi) eta 246,4 milioi Gipuzkoari (-60,7 milioi). Zerga bereziei dagokienez, Bizkaiak 270,8 milioi ordaindu ditu; horietatik 51,0 milioi Arabari dagozkio eta 219,8 milioi Gipuzkoari. Gas fluordunen gaineko zergaren eta finantza-transakzioen gaineko zergaren doikuntzak ere likidatu dira. Bizkaiko guztizko ordainketa garbiak 608,5 milioi izan dira (2023an baino 129,7 milioi gutxiago), Arabari (132,4 milioi) eta Gipuzkoari (476,1 milioi) ordaindutakoak.

BEZaren ondoriozko Estatuarekiko egokitzapenek % 1 egin dute gora, barne-eragiketek bilakaera ona izan dutelako (+% 15,3), nahiz eta  inportazioek behera egin duten (-% 5,7). Estatuari zerga bereziengatik egindako ordainketak % 11,5 jaitsi dira (2023an baino 18,2 milioi gutxiago), eta % 8 gehiago jaso da berotegi-efektuko gas fluordunengatik.