Bizkaiko Foru Aldundiak beste urte batez jendearen eskura  jarri du Gorbeiara igotzeko doako autobus-zerbitzua uztailaren 31n, San Inazio eguna ospatzearekin bat egitearren. Ekimen honen helburua da Arratia eta Nerbioi eskualdeetan jai hau ospatzeko dagoen tradizioari eustea eta horrekin batera, Natura 2000 Sareko Kontserbazio Bereziko Eremua (KBE) den parke natural hau behar bezala babestea.

 ‘Gorbeibus’ uztailaren 31ko goizeko seietan hasiko da  ibiltzen, Areatzatik Pagomakurreraino lehen bidaia egiten duenean, eta arratsaldeko zazpietan egingo du azken bidaia, Parke Naturaletik itzultzeko.

Ingurunea babesteko asmoz jartzen da martxan garraio publikoaren zerbitzu hau eta, ondorioz, mendiko aparkaleku guztiak itxiko dira eta egun osoan ezin izango dira ibilgailu pribatuak hara sartu (lurren jabeen, abeltzainen eta inguruko aterpeen erabiltzaileenak barne). Debeku hori bizikleta eta zaldien zirkulazioari ere aplikatuko zaio, Aldundiak antolatutako autobusak erabiliko duen zirkuituan.

Areatzara autoz doazen pertsonentzat aparkalekuak eskaini dituzte Aldundiak eta Areatzako Udalak udalerrian bertan. Aparkalekuak leku estrategikoan daude autobus zerbitzuaren abiapuntura erraz heldu ahal izateko.

Gainera, eta ibilgailuen eta pertsonen pilaketak  Parke naturaleko ingurumenean eragin ditzakeen ondorio negatiboak ekiditeko, debekatuta dago uztailaren 27an, 28an, 29an, 30ean eta 31n Parke Naturalean kanpatzea edo gaua igarotzea.