Errenta 23 kanpaina apirilaren 10etik ekainaren 28ra egin da, eta amaieran aurkeztu diren PFEZ aitorpenak 670.086 izan dira; aitorpen horietatik % 75ren kasuan emaitza itzultzea izan da (zergadunen aldekoa), eta guztira 557,6 milioi euro itzuli dira. Gainerakoek, 166.445 aitorpenek, 427,5 milioi euroko diru-sarrera eragin dute; beraz, kanpainaren saldo orokorra zergadunen  aldeko 130 milioi eurokoa izan da (2022an baino 53,8 milioi gehiago).

Bai aurkeztutako aitorpen kopuruari dagokionez, bai egindako itzulketei dagokienez, maximo historikoa lortu den kanpainaren zifra nagusiak dira eta horrek, Itxaso Berrojalbiz Ogasuneko diputatuaren hitzetan 2020an ezarri genuen errenta eredu berriak oso ondo funtzionatzen duela eta herritarrek gero eta hobeto baloratzen dutela  egiaztatzen du.

Bere iritziz hainbat dira maximo historiko berri hau azaltzen duten arrazoiak: Ogasunak datu ekonomikoak dituen pertsona guztiei aitorpen-zirriborro bat bidaltzea, 2023an enplegu mailari eustea, Aldundiak inflazioaren ondorioak arintzeko hartutako neurriak (% 2ko deflaktazioa eta 200 euroko kenkaria urteko 35.000 eurotik beherako errentetan; neurri hauek, guztira, 108 milioi euroko likidezia-injekzioa eragin dute zergadun guztientzat, eta, bereziki, kaltetuenentzat) eta aitorpenaren zirriborroetan  1979. urtea baino lehen lan-mutualitateetan kotizatzen zuten pertsonek Gizarte Segurantzatik kobratzen zituzten erretiro- edo ezintasun-pentsioari buruzko murrizketen sartzea, kasu honetan beste 107 milioi euro itzulita. Kanpainaren balantze ekonomikoan zergadunek gizarte-kenkariengatik aplikatu dituzten 729 milioi euroak ere nabarmendu behar dira.

Aurreko urteetan bezala kanal digitala izan da aitorpena aurkezteko gehien erabili dena, hamar pertsonatik zortzik, hain zuzen ere. Ordea, telefono bidezko zerbitzua izan da kontsultarik gehien jaso duena. Zerbitzu horien batez besteko balorazioa 10etik 9,01 puntukoa izan da herritarren artean.

670.000 aitorpen eta 130 milioi euroko emaitza negatiboa

Errenta 23 kanpainan 670.086 aitorpen aurkeztu dira, horietatik % 84,54 (566.523) banakako modalitateari dagozkio eta % 15,46 (103.563) baterako modalitateari. Gainera aurkeztutako aitorpenen % 65etan (437.949) ez da aldaketarik izan, eta gainerako % 35etan zergadunak bakarrik sartu behar izan ditu datu gehigarriak edo Foru Ogasunak eskainitako zirriborroetan agertzen zirenetako batzuk aldatu ditu. Itzulketak aitorpenak aurkeztu direnetik 2,1 laneguneko batez besteko epean egin dira, Aldundiak hartutako 7 eguneko konpromisoa baino nabarmen epe laburragoan

729,1 milioi euro gizarte-kenkarietan deskontatuta

Bizkaiko zergadunek 729.129.734 euroko kenkariak aplikatu dituzte PFEZaren aitorpenetan. Pertsona gehienek aplikatu dituzten kenkariak ondorengoenak eta ohiko etxebizitza erostearena izan dira, eta desgaitasuna edo mendekotasuna, alokairua eta etxebizitzan inbertitzea izan dira batez besteko kenkari handiena eragin dutenak

Hamar pertsonatik zortzik aurkezpen digitala aukeratzen dute

Zergadunek hiru bide izan dituzte aitorpena aurkezteko: digitala, telefono bidezkoa eta aurrez aurrekoa. Hamar aurkezpenetatik zortzitan (% 78) digitala aukeratu dute. Telefono bidezkoa % 15,6k hartu du, eta bulegoetan, berriz, % 6,4k.

Hiru bide hauen bidez aurkeztutako aitorpenei beste 52.579 gehitu behar zaizkie, itzultzeko emaitza izan dutenak, hain zuzen ere Foru Ogasunak automatikoki izapidetu dituen aitorpenak, zergadunak inolako ekintzarik egin behar izan gabe.

9.273 pertsonari eman zaie arreta zuzena egunero, % 90ren kasuan telefonoz.

Guztira 528.557 kontsulta egin dira Foru Ogasunaren arreta pertsonalizatuko zerbitzuan. Horietatik ia % 91k telefono bidezko kanala aukeratu dute, eta % 9,3k, berriz, aurrez aurreko arreta emateko jarritako hamabi foru bulegoetako batera jo dute.

Arreta pertsonalizatua eskaintzen 445 pertsona aritu dira; 134 foru bulegoetako aurrez aurreko zerbitzuan eta 311 telefono zerbitzuan.

Batez besteko gogobetetzeak 10etik 9 puntu gainditu ditu lehen aldiz

Foru Ogasunak emandako zerbitzuen balorazioak gora egiten jarraitzen du eta 9,01 puntutan kokatu da 10etik eta horrek esan nahi du marka berria lortu dela.  Kanal digitalen kasuan (gehien igotzen direnak)  batez besteko nota 8,5 puntukoa da, eta telefono eta aurrez aurreko zerbitzuetan ia 9,3 puntukoa. Guztira 9.517 inkesta egin dira, 6.001 kanal telematikoan, 1.500 telefono bidez eta 2.016 aurrez aurre.

Konparazioa aurreko ekitaldiekin

7.188  aitorpen Ondarearen gaineko Zergan eta 44 Fortuna Handien gaineko Zergan

Errentarekin batera, Ondarearen gaineko Zergaren kanpaina eta, lehen aldiz, Fortuna Handien gaineko Aldi Baterako Elkartasun Zerga aurkezteko kanpaina egin dira.  Lehenengoari dagokionez aurreko ekitaldietako zergadunen kopurua igo egin da, 8.188ra arte, hau da, 93,7 milioi euroko diru-sarrera.

Fortuna Handien gaineko Zergari dagokionez 42 zergadun izan dira  eta  974.320 euro bildu dira.