Ekaineko bilketaren bilakaera ona izan da, eta, ondorioz, bildutako zenbateko metatua 4.142,2 milioi eurora iritsi da: 2023an lortutakoa baino % 1,2 gehiago, hots, 2024ko ekitaldi osoko zerga-sarreren (9.829,5 milioi) aurrekontuaren % 42,1. Horrela, bada, apurka-apurka txikitu egin dira ekitaldi bietako ezohiko eragiketen ondorioz sortutako aldeak.

Zuzeneko zergapetzeak joera ona izaten jarraitu du ekainean zehar, eta 1.987,4 milioi euroraino iritsi da: % 7,7ko igoera (+ 141,4 milioi), iazko hil berarekin alderatuta. 1978a baino lehenagoko mutualitateetarako kotizazioetatik eratorritako prestazioei buruzko epaien ondoriozko itzulketek gora egin duten arren, PFEZa, oro har, % 4,3 hazi da (+ 63,7 milioi), eta sozietateen gaineko zergak bilakaera positiboa izaten jarraitzen du: % 49,1 hazi da (+ 112,2 milioi). Lan-atxikipenak % 4,7 hazi dira (82,5 milioi), eta kapital higigarriaren etekinen gaineko atxikipenak eta lanbide- eta enpresa-jardueren ordainketa zatikatuak ere hazi egin dira (+ % 64,4 eta + % 11,4, hurrenez hurren).

Aitzitik, ez-egoiliarren errentaren gaineko zergaren bilketan zifra negatiboak mantendu dira, 34,7 milioi euro gutxiago bildu baitira (- % 38,3), aurreko ekitaldian izandako ezohiko diru-sarreraren ondorioz.

Zeharkako zergapetzeari dagokionez, 1938 milioi euro bildu dira, eta jaitsierak moteltzen jarraitu du, honezkero % 4,8raino murriztu baita (aurreko hilean baino 5,5 puntu gutxiago, eta duela bi hilabete baino 10,7 gutxiago). Dena dela, energiaren sektoreko bilketaren bilakaerak oztopo izaten jarraitzen du, bai BEZari dagokionez, zeina % 11,6 jaitsi baita (maiatzean baino 5 puntu gutxiago), bai hidrokarburoen gaineko zerga bereziari dagokionez, zeina % 0,2  jaitsi baita.

Gainerako zerga berezi eta tributu doituek, oro har, bilakaera positiboari eutsi diote. Elektrizitatearen gaineko zergak ia-ia laukoiztu egin du 2023ko bilketa; berotegi-efektuko gas fluordunen gainekoak % 142,3 egin du gora; berrerabili ezin diren plastikozko ontzien gainekoa % 207,8 hazi da, eta tabako-laboreen gainekoa, berriz, % 4,0. Ordea, alkoholen gaineko zergaren bilketak behera egiten jarraitzen du (- % 34,6). Ekitaldi honetan, bestalde, finantza-transakzioen gaineko zerga bildu da lehenengo aldiz, eta 25,3 milioi jaso dira.

Zeharkako gainerako zergetan, joko-jardueren gaineko zerga (+ % 12,5), egintza juridiko dokumentatuen gainekoa ( % 31,4) eta zenbait garraiobideren gaineko zerga berezia (% 27,2) nabarmentzen dira.

Tasetan eta bestelako diru-sarreretan 35,8 milioi euro bildu dira, alegia, 2023an baino 5,6 milioi gutxiago; eta aurreko ekitaldian izandako ezohiko sarrerak haiei ere eragin die.