Berriak

Laespada: "Eraldaketa soziala, berdintasunezkoa eta inklusiboa, nahi dugu"

Teresa Laespadak, Enplegua, Gizarte Kohesioa eta Berdintasuna Sustatzeko  foru diputatuak eta Bizkaiko Ahaldun Nagusiordeak, kudeatzen duen arloko legegintzaldi honetarako estrategia aurkeztu dute gaur Batzar Nagusien Batzordean; estrategia berri horretan sexu-erasoen biktimei laguntzeko zentroa eta Ekintzailetza Eskola nabarmentzen dira.

Sailaren nomenklatura ere berria da gizarte kohesioaren kontzeptuari dagokionez eta, hain zuzen ere, zabaldu egiten du gizarte kohesioaren arloan esku hartzeko eremua gazte-politikekin, ekintza komunitarioarekin eta bakardadearen arretarekin. Sailak mantendu egiten ditu enplegu, gizarte inklusio, berdintasun, aniztasun eta garapenerako lankidetzako aurretiazko eskumenak.

Laespadak adierazi duenez, urteko azken hiruhilekoan zehar sexu-indarkeriaren biktimei arreta integrala emateko lehen zentroa irekiko da pertsona horien lehengoratzean eta erreparazioan lan egiteko. Zentro horrek hurrenez hurreneko ezarpena eta garapena izango ditu.

Era berean, diputatuak adierazi du bere Sailak eskumen eta tresna berriak dituela gizarte-erronkei, gizarte-ondoez zahar eta berriei erantzuteko. gure artean mantentzen diren eta dagoeneko ondo ezagutzen  ditugun ondoezak, horien kausak ez direlako desagertzen; baina baita arazo berriak ere, gizarteak desberdintasun bihurtzen diren arrakalak sortzen jarraitzen duelako, azpimarratu du.

Gainera bere esku-hartzean indarkeria matxistaren gorakada gaitzetsi du  eta adierazi du Bizkaiko Indarkeria Matxistaren Behatokian 2022an indarkeria matxistaren kasuak % 25,5 igo direla baieztatu dela.

Ahaleginak areagotuko ditugu prebentzioaren arloan, emakumeen eta gizonen berdintasunaren aldeko ekintzen arloan, baina baita indarkeria matxistaren biktima diren emakumeak babestearen eta erreparatzearen arloan ere. Gure lehentasunetako bat da eta izango da, azpimarratu du.

ZUZENDARITZAK

Berdintasunaren eremuan Sailaren helburua genero-estereotipoak desagerrarazteko eta indarkeria matxistaren aurka borrokatzeko Bizkaiko politika publikoen zeharkako elementu eta konfiguratzaile izateko apustua egiten jarraitzea da. Zehatzago esanda, herritarrak sentsibilizatzeko kanpainak, emakumeak ahalduntzeko eta parte hartzeko politikak, rolen aldaketa eta indarkeria matxistaren aurkako borroka finkatuko dira.

Enpleguaren arloan bigarren Enplegu Plana garatuko da, lehenengoa ebaluatu ondoren, eta arreta lan-merkatutik urrunen dagoen jendearen enpleguan eta ekintzailetzan jarriko da, enplegua eskatzen duten sektoreetara birkualifikatzeko.

Enplegu eta Ekintzailetzako Foru Agentzia -DEMA- izango da, aurrerantzean ere, Sailaren enplegu-politikak abian jartzeko tresna finkatu nagusia. Gainera  Laespadaren Sailaren eskumenekin bat egiten du Seed Capital Mikro Foru Sozietatearen kudeaketak, enpresa txiki eta ertainentzako ekintzailetza-politikaren zerbitzura jarriko dena.

Jada sortutako desberdintasunen arteko aldeak ixteko politika garatzen duen Gizarte Inklusioari dagokionez, lau zutabe nagusi azpimarratzen dira: indarkeria matxista desagerrarazteko eta biktimak eta bizirik irauten dutenak babesteko eta artatzeko foru-apustua indartzea; kalteberatasun handiko egoeran dauden familiak babesteko jarduerak garatzea; gazteen gizarte-bazterkeria prebenitzeko eta horren aurka borrokatzeko estrategia indartzea; eta gizarte-bazterketa egoera larrian dauden pertsonei arreta emateko sarea bultzatzea, inor atzean ez uztea eta inor sistematik kanpo ez uztea bermatzen duten dispositibo, laguntza eta prestazioen bidez.

GIZARTE KOHESIOA

Gizarte Kohesioa Sustatzeko Zuzendaritza berriari dagokionez  erantzukizunak gehitzen dizkio nazioarteko lankidetzari eta aniztasunaren kudeaketari, gizarte kohesioaren arloko lana gazte-politikekin, gizarte-ekintzako politikekin eta bakardadeari arreta emateko politikekin garatuko delako. Zuzendaritza hau Bizkaiko Foru Aldundiak pertsonak kudeaketa publikoaren erdigunean jartzeko lantzen duen beste tresna bat da, berdintasun, aniztasun eta inklusio gehiago sortuz eta Lurralde kohesionatuagoa eta solidarioagoa eraikiz.