Berriak

Aldundiak Batuz sistema nahitaez ezartzeko prozesua malgutzen duen Foru Arau bat izapidetzen hasi da. Hasiera batean 2024ko urtarrilaren 1erako aurreikusita zegoen sistema hori jarduera ekonomikoak garatzen dituzten zergadun guztientzat. Egokitzeko denbora gehiago eskaini behar dela egiaztatu ondoren, Foru Ogasunak egutegi bat ezarri du, nahitaez sartu beharreko bost leiho irekitzen dituena zergadun motaren arabera.

Itxaso Berrojalbiz Ogasun eta Finantzetako foru diputatuak azpimarratu du Batuz proiektu estrategikoa dela, eta epeak malgutzea justifikatzen du, haren ezarpenak aldaketa sakona dakarrelako enpresek eta profesionalek hartu behar dituzten negozioen kudeaketa-ereduan, azken krisien ondorioek oraindik ere arrastaka eraman arren, kostuen eta diruaren prezioaren igoerak larriagotuta. Adierazi duenez, zergadunekin errealitate hori egiaztatu, egoera aztertu eta hainbat aukera baloratu ondoren, Batuz ezartzeko epeak malgutzea erabaki dugu, zailtasun gehien dituzten zergadunei denbora gehiago emateko.

Horrela, 2024ko urtarrilaren 1a Batuz enpresa handientzat bakarrik izango da derrigorrezkoa. Enpresa txiki eta ertainak, mikroenpresak, langile autonomoak, kooperatiba txikiak edo irabazi-asmorik gabeko erakundeak pixkanaka sartzen joango dira sei hilean behin irekiko diren leihoetan. Batuzen ezarpen progresiboa 2026ko urtarrilaren 1ean osatuko da irabazi-asmorik gabeko erakundeekin, profesionalekin eta lehen sektoreko, hezkuntzako eta kultura-zerbitzuetako enpresekin. (ikusi erantsitako dokumentua)

Epea hedatzeaz gain, Foru Ogasunak Batuzen borondatezko egokitzapena sustatzen jarraituko du, gaur egun gertatzen den bezala. Horrela, Batuz ezarri duten 15.000 zergadunek dagoeneko jasotzen duten kenkaria aplikatzeko epea luzatu da. Horiek eta borondatez sartzen direnek, oro har, % 10eko konpentsazioa izango dute PFEZn edo Sozietateen gaineko Zergan.

Pizgarri fiskalarekin batera, 2024ra eta 2025era zabaltzen da PFEZaren kuotan edo sozietateen gaineko zergan Batuzen ezarpenak eragindako gastuen % 30eko kenkaria aplikatzeko aukera. Era berean, aldi baterako TicketBai betetzetik salbuesteko eskaera egiteko aukera ezartzen zaie kargua uztetik edo erretirotik gertu dauden zergadunei, baldin eta Batuzera egokitzearen ondoriozko kostuak ez badira proportzionalak kargua uzteko geratzen zaien denborarako.

Batuz ezartzeak berekin dakar jarduera ekonomikoak garatzen dituzten pertsona guztiek beren negozioen kontabilitatea Foru Ogasunaren egoitza elektronikoan eramateko betebeharra, Eragiketa Ekonomikoen Erregistro Liburuaren bidez. EEELn zergadunek Ogasunari jakinarazten diote beren salmenten (TicketBai sistemaren bidez fakturatzen dituztenak) eta diru-sarreren berri, bai eta beren jarduerarekin lotutako erosketen eta gastuen berri ere.

Horrela, Batuzek zerga-iruzurraren aurkako borroka indartzeko beharrezkoa den informazioa osatzen du, Ogasunari ezkutatutako diru-sarrerak edo zerga-oinarriak higatzeko fikziozko gastuak detektatzeko aukera ematen baitu. Era berean, informazio horrekin, Foru Ogasunak enpresei eta profesionalei ematen dien laguntza hobetzen du, PFEZaren, Sozietateen gaineko Zergaren eta BEZaren aitorpenen zirriborroak eskainiz.