Berriak

Bizkaiko Foru Aldundiak lurraldeko euskararen sektorearekin egindako topaketen bigarren saioa antolatu du; jardunaldi honen xedea sektorea osatzen duten eragileek elkar ezagutzea, sinergiak sortzea eta estrategiak partekatzea da.

Lorea Bilbao Ibarrak, Euskara, Kultura eta Kirol foru diputatuak, gaur arratsaldean Bilboko Euskaldunan inauguratu duen bigarren topaketa honetan aurreko topaketan lehentasunezkotzat jo ziren bi alorretan euskarak dituen erronkei buruzko gakoak partekatu dira. Lehen arloa gazteak eta aisialdia da, eta bigarrena hizkuntzaren sustapenean inplikatutako eragileen sareko lana sustatzea. Saio honetan Bizkaiko euskalgintzako ehun eragile inguruk parte hartu dute.

Diputatuak azpimarratu duenez, topaketa hauen helburua ohiko sareetatik haratago doazen bideak bultzatzea da. Hala, diputatuak Bizkaiko euskalgintza zabaltzearen desioa agerian utzi du eta horretarako sektorea osatzen duten agenteei dei egin die: euskalgintza sektorea zabalagoa izan daiten eta euskararen erabilera gizarte osoan modu erangikorragoan aktibatu gura badogu, gizarte sektorearen inplikazioa behar dugu. Diputatuak adierazi duenez, zenbat eta eragin sarea gehiago zabaldu, eragin espazioak ere ugariagoak eta trinkoagoak izango dira.

Topaketan, talde-dinamika baten bidez, parte-hartzaile guztien arteko elkarrizketa sustatu da. Elkarrizketa horretan sektoreko eragileek dituzten baliabideen berri eman ahal izan dute eta gazteen aisialdian euskara sustatzeak dakartzan erronkak aztertu dituzte. Esparru ez formaletan eta digitaletan euskararen erabilera sustatzeko beharraz hausnartu da, baita euskaraz bizi ahal izateko eta hizkuntzaren inguruko komunitate-sentimendua sortzeko baliabideak eskaintzeaz ere. Ildo honetan, eskolatik hasi eta eremu ez-formaleko harreman sare guztietan, haur eta gazteen beharrak eta ahotsak erdian jartzea beharrezkotzat jo da, azken finean, gazteentzako euskararen ezagutza, motibazio eta erabilera areagotzeko ekosistema osoa birpentsatzea.

Halaber, euskararen sustapenean lan egiten duten eragileen sarea eratzearen beharra planteatu eta kontuan hartu da. Horretarako eragileen arteko elkar ezagutzea eta aitortzea, sinergiak sortzea eta Bizkaian euskarazko kultura inplikatzen eta sustatzen dutenen artean baliabideak trukatzea proposatu dira. Ildo horretatik, dinamikan parte hartu duten pertsonek neurri horiek guztiak ezartzeko ekintzak bilatu dituzte, neurri horien egingarritasuna aztertu dute eta elkarrekin ateratako ondorioak jaso dituzte. Agenteen arteko saretzea lortzeko helburuarekin, sektorea identifikatu eta praktikak eta baliabideak elkarganatzeko premia agerian utzi da. Izan ere, saretze horren bidez, sektorea eraginkorra izango da, helburuak hobeto identifikatuko dira eta ezagutza berri bat sortuko da.

Bigarren topaketa izan da, baina ez azkena

Bilera hau bigarrena izan da, baina ez azkena. Hala, datozen hilabeteetan beste saio batzuk egingo dira, Bizkaiko Foru Aldundiak antolatutako topaketa horiek osatzeko.

Joan den azaroan Foru Erakundeak antolatu zuen lehenengo topaketan, bertaratuek Bizkaian euskarak duen egoerari buruzko iritziak eta gogoetak partekatu zituzten, eta galdera honi erantzuten saiatu ziren: Nola jokatu behar dute, etorkizunari begira,  Bizkaian euskararen sustapenean inplikatuta dauden sektoreek? Era berean, datozen urteetarako erronkei aurre egiteko eta lankidetzarako aukerak aztertzeko estrategiei buruz hausnartu zuten.

Topaketa hauen helburu nagusiak Bizkaian euskararen erabilera sustatzeko funtsezko lan-ildoak zehaztea, hizkuntzaren egoera ezagutzea eta bere beharrak aztertzea dira.

Topaketako lehen saioan parte hartu zutenek zehaztu zituzten erronken artean administrazio, euskalduntze, gazteria eta aisialdiarekin lotutakoak eta euskara sustatzeko eragileen sare bat bultzatzea nabarmentzen dira. Bigarren saio honetan  erronka horiek berariaz lantzen hasi dira, eta ondorengo garapenak izango dituzte.