Berriak

Laespada: “Zorretan gaude emakume haiekin”

Bizkaiko Foru Aldundiak omenaldia egin dio gure Lurralde Historikoko burdinazko mendietan meatzaritzaren historian emakumeek izan zuten funtsezko protagonismo ezezagunari eta ikusezinari.

Abanto-Zierbenako Euskal Herriko Meatzaritzaren Museoan gaur inauguratutako oroitzapenezko plaka bat erakusketa bati (Meatzaldeko herrietan zehar ibiliko dena eta, azkenik, aipatutako museoan kokatuko dena), eta argitalpen bati gehituko zaie. Ekimen honen izenburua Burdinazko emakumeak: historia eta memoria da.

Ekimena Batzar Nagusiek aho batez adostutako agindu batetik abiatzen da eta Historian doktorea den Pilar Pérez Fuentesen laguntza jasotzen ari da. Teresa Laespadak, Enplegua, Gizarte Inklusioa eta Berdintasuna Sustatzeko foru diputatuak estalgabetu du plaka gaur goizean Meatzaritza Museoan, inguruko hainbat alkateren presentzia ere izan duen ekitaldian.

Laespada diputatuak omenaldi-plaka estalgabetu ondoren egindako hitzaldian adierazi duenez Bizkaiko meatzaritzaren historian eta gure Lurralde Historikoko langileen eta sindikatuen mugimenduaren sorreran emakumeen errealitatea ezkutuan egon da.

Eta gizonen istorio epikoa kontatu digute eta kontatzen diogu elkarri… gizonena. Gizon protagonistak meategietan lanean; gizon protagonistak sindikatuetan, alderdietan, udaletan, meategien jabe ziren enpresetan; grebak geldiarazteko iritsi ziren armadetan, gizonak gobernu zibiletan eta gobernu militarretan,… gizonak, gizonak, beti gizonak….  Eta, bai, hala izan zen. Baina ez bakarrik. Epika eta aldaketa historikoaren hamarkada haietako protagonistak ez ziren bakarrik gizonak izan, ohartarazi du.

Laespadak adierazi duenez, orain ataza ezkutuko hori agertaraztea da, eta hori da adibidez itsasadarrean itsasontziak indarrez atoian zeramatzaten zirgarien irudiarekin egin dena Bilbon multzo eskultoriko bat eskainiz. Zirgariak Bizkaiko Foru Aldundiak eta BBKk ematen dituzten berdintasun-sarien protagonista dira urtero.

Ildo horretatik, adierazi du burdinazko emakumeak meategietan lan egin zutenak izan zirela, nahiz eta gutxi izan ziren, baina baita euren bizkar gainean etxe ziztrin haien iraupena eraiki zutenak ere, pertsonentzat baino gehiago animalientzat pentsatuta zegoen ustiapen ekonomikoaren sistema bati lotuta.

Omenaldi hau burdinazko emakume guzti haiei egiten zaie. Burdinazkoak ziren, burdinaren meatzaritzak markatutako lur batean bizi, sufritu eta hil zirelako. Eta burdinazkoak, aldi berean, emakume indartsu borrokalariak izan zirelako, mineral hau bezain erresistenteak, azpimarratu du.

Gaur goizean Gallartan egindako ekitaldian Pilar Pérez Fuentesen hitzaldia ere izan da.

Burdinazko emakumeak: historia eta memoria izeneko proiektu honetarako aipatutako Meatzaritzaren Museoaren (argazki-artxiboak eta objektuak) eta AHOAren (ondare immaterialaren artxiboa, erakusketan garai hartan bizi izan ziren azken pertsonei egindako elkarrizketen audioak ere egongo direlako) laguntza jaso da.