Berriak

Bizkaiko Foru Aldundiak eskualdeko arreta integralerako seigarren bulegoa jarri du martxan Igorren. Bulego horretan udalerriko Eskualdeko Nekazaritza Bulegoan ematen ziren zerbitzua guztiak barne hartzen dira, bai eta foru-erakundearen gainerako sailen 150 izapide eta zerbitzu baino gehiago ere. Hori guztia 147 metro karratuko lokal bakarrean, berria eta xede horretarako egokitua, Agirre Lehendakariaren kaleko 19. zenbakian. Foru-erakundeak 434.722 euroko inbertsioa egin du dagoeneko 13 pertsonak lan egiten duten bulego berri hori martxan jartzeko, baina kopuru hori handitu egingo da Errenta eta Azaleren Aitorpenaren kanpainetan.

Dagoeneko martxan dagoen bulego berriak Arratia-Nerbioiko 16 udalerritako 24.000 pertsona baino gehiagori emango die zerbitzua. Hortaz, aurrerantzean, Aldundiarekin egiten dituzten kudeaketak eskualdean bertan gauzatu ahalko dituzte, Bilboraino mugitzeko beharrik gabe. Hala, zerbitzu integrala eskaintzen du leihatila bakar eta arreta aurrez aurrekoa batean. Horri esker, gertutasun handiagoa eta lurralde-kohesio handiagoa lortu da. Gainera, instalazio hauek, Durango, Bermeo, Gernika, Balmaseda eta Mungian dauden aurrekoek bezala, izapideak egiteko aukera emango die, ez bakarrik kokatuta dagoen eskualdean bizi diren pertsonei, baita bertara jotzen duen edonori ere, edonon bizi dela ere.

Elixabete Etxanobe Herri Administraziorako eta Erakunde Harremanetarako diputatuak nabarmendu duenez, Igorren eskualdeko arreta integralerako Gertu bulego berria martxan jartzearekin batera, lurraldeko sarean ezaugarri horiekin dugun seigarrena, Bizkaiko herritarrei arreta gehiago eta hobea emateko konpromisoan aurrera egiten jarraitzen dugu. Pertsonei eta kolektiboei baliozko zerbitzuak eman nahi dizkiegu, hurbiltasuna eta lurralde oreka kontuan hartuta.

Etxanobek adierazi du Bizkaiko herritarrentzako arreta-sarea handitu egingo dela bi aste pasatxoan, Markinan beste bulego berri bat irekiko baita; era berean, dagoeneko Bilboko eta Getxoko bi bulego berriren inguruan dihardute lanean: Konpromiso sendo hori hartu dugu: Aldundia bizkaitarrengana hurbiltzen jarraitzea, esan du amaitzeko.

Izapide eta zerbitzu berriak

2016an inauguratutako Durangoko bulegoan lehen aldiz ezarritako ereduari jarraituz, Igorreko eta laster Markinako ekipamendu berria funtsezkoa dira Bizkaiko Foru Aldundiak Bizkaiko herritarrei eskaini nahi dien arretaren barruan. Izan ere, Bizkaiko Foru Aldundiak sarrera-eredu bakarra da edozein pertsonak foru-erakundearekin izapidetu behar dituen kudeaketa guztietarako, eta, horrela, lehen erabilitako eskema alde batera uzten du (zerbitzu edo sail jakin batzuen arabera zatituta zegoena).

Lehen ENBn (Eskualdeko Nekazaritza Bulegoa) egiten ziren zerga-kudeaketez eta nekazaritzako izapideez gain, Igorreko ekipamenduak 150 zerbitzu baino gehiago eskaintzen dizkie herritarrei, eta horietako batzuk instalazio horietatik ematen dira lehen aldiz, hala nola:  Bizkaiko Foru Aldundiko sail guztietako zerbitzuei buruzko informazio orokorra, erakunde honi eta beste administrazio publiko batzuei zuzendutako idazkien erregistroa; jakinarazpenak entregatzea, Aldundiko hautaketa-prozesuetan izena ematea, Aldundiak kudeatutako gizarte-prestazioak kobratzeari/ez kobratzeari buruzko ziurtagirien jaulkipenak, identifikazio-datuen aldatzea, sinadura elektroniko aurreratuko ziurtagiriak bidaltzea, eta kexak eta iradokizunak aurkeztea.

Igorreko bulegoak harrera-gune edo -puntu bat du. Bertan, pertsona batek ongietorria emango die erabiltzaileei, eta haien beharrak eta zerbitzu mota detektatuko ditu, bulego berriak dituen sei arreta-puntuetako batera bideratzeko. Lokalak beste areto bat ere badu arreta pribatuagoa behar duten gaietarako.

Irekiera-ordutegia 8:30etik 14:00etara izango da astelehenetik ostiralera, udan izan ezik (ekainaren 14tik irailaren 10era), orduan 8:30etik 13:30era egongo baita zabalik.