Berriak

Bizkaiko Foru Aldundiak hasierako onespena eman dio Lezamako Trenbide Zaharreko oinezkoentzako eta bizikletentzako bidea sortzeko proiektuari. Bide horrek 7,5 kilometroko luzera izango du eta Bilbo, Sondika, Loiu eta Zamudio udalerriak zeharkatzen ditu; bideak Bilbo eta gaur egun garapen-fasean dagoen Txorierriko bizikletentzako ardatza lortuko ditu. Proiektu hau gauzatzeko epea 24 hilabetekoa da eta lizitaziorako oinarrizko aurrekontua 7,3 milioi eurokoa da, Estatuko Aurrekontu Orokorren kargura, Foru Aldundiak eta Nekazaritza, Arrantza eta Elikadura Ministerioak proiektu hau Natur Bideen Estatuko programan sartzeko lortutako akordioan oinarrituta.

Akordio hau betez Foru Aldundiaren erantzukizuna da eraikuntza-proiektua idaztea eta ukitutako lurrak Ministerioaren esku jartzea, eta obrak amaitutakoan, erakunde honen ardura izango da mantentze lanak burutzea. Trukean Estatuko erakundea arduratuko da Bilbo eta Lezama arteko trenbide zaharraren trazadura aprobetxatzen duen bide horren obren kostua finantzatzeaz; izan ere  1901ean utzi zioten trenbide hori erabiltzeari -hau da, 120 urte baino gehiago daramatza erabili gabe-.

Oinezkoentzako eta bizikletentzako bide mistoak 3,20 metroko zabalera izango du lehenengo sei kilometroetan, eta 3,50 metrokoa gainerako atalean. Bide hau zagor artifizialez zolatuta egongo da eta, eraikitzeko maldei dagokienez indarrean dagoen araudira egokitu beharreko eremuak induskatu eta bete egingo dira, baita ibilbideko zati batzuei jarraipena emateko diseinatu diren plataforma zaharretik kanpoko zati berriak ere.

Proiektuak, era berean, trenbide zaharrean dagoen tunela egokitzea ere jasotzen du; tunelak 446 metroko luzera du eta erabiltzeko segurtasun-maila egokiak zuzkitzeko iragazgaizte lanak burutuko   dira eta LED luminariadun argiztapena jarriko da. Egokitzapen honen barruan hormigoizko horma atxiki bat eraikiko da tunelaren barruan iragazgaiztearen behealdea babesteko eta hormen irregulartasunak estaltzeko eta, horrela, barruan ezkutatzea ahalbidetuko duten espazioak sortzea saihesteko.

Gainera trazaduran zehar egonkortze-obrak egingo dira bidearen plataforma behar besteko zabalerarekin egokitzeko egungo topografiak ezponda egonkorrekin betetzea edo induskatzea ahalbidetzen ez duen eremuetan.

Egin beharreko lanen artean proposatutako ibilbidean zehar zenbait atsedenleku jartzea ere aurreikusten da.

Ingurumen-ebaluazio sinplifikatuaren prozedura egin eta hasierako onespena eman ondoren, bizikletentzako-oinezkoentzako bide hau eraikitzeko proiektua jendaurrean aurkeztuko da berriro, 20 egun balioduneko epean, Bizkaiko Aldizkari Ofizialean (BAO) eta Bizkaiko Foru Aldundiaren webgunean argitaratzen den egunetik zenbatzen hasita,  eragindako pertsonek edo interesdunek alegazioak aurkeztu ahal izan ditzaten. Aldi berean eragindako toki-korporazioei entzunaldia emateko prozesua irekiko da. Prozedura hauek proiektua behin betiko onartu aurrekoak izango dira.