Berriak

Bizkaiko Foru Aldundiak uda honetan ekingo dio Orconeran hondoratu zen lurpeko galeria birgaitzeari. Hasiera batean lan horiek 2,7 milioi euro inguruko aurrekontua dute eta sei hilabeteko exekuzio-epea aurreikusi da; beraz, lanak 2024. urtearen hasieran amaituko dira. Hala adierazi du Bizkaiko Batzar Nagusietan Iraunkortasuna eta Ingurune Naturala Zaintzeko diputatuak, Amaia Antxustegik. Azaldu duenaren arabera, aldi berean obra honek zonaldeko segurtasun-baldintzak hobetzea ahalbidetuko du, zuloa gertatu aurreko unean esparruak zituenak hobetuz.

Obren betearazpena Garbiker foru sozietate publikoak kontratatuko du eta lanak Iraunkortasuna eta Ingurune Naturala Zaintzeko Saileko Ingurumena Kudeatzeko Zerbitzuko langileen zuzendaritzapean egongo dira. Lanek aukera emango dute lurpeko galeria horren zatia birgaitzeko eta hondoratzeak kaltetutako lurra lehengoratzeko; era berean, haranaren drainatzea lehengoratu ahal izango da Triano, La Reineta eta Fuente el Buey errekek bat egiten duten lekuan eta galeriara sartzeko etorkizunean ikuskapenak egitea erraztuko duen putzu berria eraikiko da.

Zehatzago esanda egin beharreko jarduketen artean daude La Reineta eta Triano errekastoen ahokadura egokitzea, Fuente el Buey errekastoa bideratzea, bide bat induskatzea eta sarbide- eta betelan-putzu bat egitea -azken hau lan handiena da proiektatutako guztien artean , edo barruko arroko urak biltzeko eta galerian husteko hustubide bat egitea, eta galeria horretan unean uneko konponketak egitea.

Jatorrizko orografia lehengoratzean lehendik dagoen eta arriskua ekar dezakeen zuloa tamainaz handitzen jarraitzea saihestuko da. Era berean, kolapsotik gertu dauden eta unean uneko kalteak jasan zituzten galeriaren lehen zatiak indartzeak segurtasuna hobetuko du, galeriak inguru horretan zuen higadura kontuan hartuta, baita abiapuntuko egoerari dagokionez ere. Horrez gain, sarbide-putzua eginda ikuskapen-lanak egitea gaur egun zegoen sarbidea erabiliz baino are seguruagoa izango da. Gure usteen arabera eremua bere hasierako egoerara lehengoratzea lortuko da, baita hobetzea ere, 2024ko hasierarako, eta galeriako zaintza-sistema berrien normalizazioak eta ezarpenak aukera emango dute anomaliak arinago detektatzeko, halakorik gertatuz gero azaldu du Iraunkortasuna eta Ingurune Naturala Zaintzeko diputatuak bere agerraldian.

Antxustegik gogorarazi du, halaber, ingurune hau birgaitzeko formularik onenera iristeko bideak nolabaiteko konplexutasuna izan duela; izan ere, hasiera batean, lehen erortzea gertatu ondoren lursailaren baldintzek eta galeriarako sarbideak eragotzi egin zuten hura berrikustea eta konponketa-lanak abian jartzea, arriskua zegoelako bertan lan egin behar zutenentzat. Gainera 2021aren amaierako euriteen ondorioz hasiera batean galeriaren kolapsoa izan zena zulo bihurtu zen, eta, hala, erorketaren bilakaerak galeria sakonago berrikustea eskatu zuen eta konplexutasuna gehitu zion hartu beharreko irtenbide teknikoari.  Halaber, beharrezkoa izan zen galeria horren gainean hainbat erakundek duten erantzukizuna zehazteko akordioa lortzea; akordio hori  Ortuellako eta Trapagarango udalek, Iraunkortasuna eta Ingurune Naturala Zaintzeko Sailak eta Garbikerrek harpidetu zuten eta,  honen bidez, etorkizunari begira galeriaren zaintza hobetzen da eta kudeaketa errazten da, barne-ikuskapenen normalizazioa eta ur-korronteak kontrolatzeko gailu berriak ere adostu direlako.