Berriak

Gaur hasita Bizkaiko Foru Aldundiak Prebentzio, Suhiltzaile eta Salbamendu Zerbitzuko profesionalek filmatu duten bideo bat zabalduko du. Filmazioak euren egunerokoan ager daitezkeen hainbat esku-hartze mota erakusten ditu. Deskribapena Begok egiten du, iaz foru zerbitzuan sartu ziren suhiltzaile eta suhiltzaile-gidarien azken promozioko suhiltzailea da. Esku-hartze horien artean trafiko-istripuetako erreskateak, egituren suteak, likidoen edo gasen ihesak, altuerako erreskateak, maskoten erreskateak eta abar agertzen dira, eta, era berean, prebentzioaren garrantzia azpimarratzen da.

Bideoa benetako tokietan filmatu da, adibidez Iurretako parkean eta Ispasterreko maniobra-eremuan. Bertan Bizkaiko Foru Aldundiko suhiltzaileek,  gizonezkoek eta emakumezkoek, "estereotipoak ahaztea" gomendatzen dute oso argi adierazten dute eurena gizonezkoek eta emakumezkoek osatutako "talde-lana" dela.

Sarjentuen hurrengo deialdia

Bizkaiko Foru Aldundiak laster hasiko du Prebentzio, Suhiltzaile eta Salbamendu Zerbitzuko sarjentu izateko 4 plaza, gizon zein emakume,  betetzeko hautaketa-prozesua. Deialdia 2023ko Lan Eskaintza Publikoaren 1. Fasearen barruan kokatzen da. Plaza horietarako Batxilergoko titulua edo titulu teknikoa eta II. hizkuntza-eskakizuna eskatuko dira. C gidabaimena ere eduki beharko da. Lau plazetatik bi txanda irekikoak dira eta bi barne-sustapeneko txandakoak. Plaza hauek betetzeak aukera emango du larrialdietan jarduteko prozesuetan eta protokoloetan eta zerbitzuan arian-arian gertatzen den belaunaldi-erreleboari aurre egiteko, betiere arreta hobea eta jarduketa seguruagoak eta eraginkorragoak lortzeko.

Bizkaiko Prebentzio, Suhiltzaile eta Salbamendu Zerbitzua zenbakitan

Bizkaiko Foru Aldundiko Prebentzio, Suhiltzaile eta Salbamendu Zerbitzua  Larrialdien Kudeaketarako eta Babes Zibilerako Zuzendaritzaren barruan dago eta 436 profesional ditu. Horien artean, jakina, uniformedunak eta uniformerik gabekoak daude, eta lurraldeko eskualde guztietan banatutako zortzi suhiltzaile-parke profesional ditu. Era berean, Bizkaiko larrialdiak kudeatzeko "Bizkaia Prest" zentro integrala eta ehun ibilgailu inguru ditu.

Aldundiaren suhiltzaileen zerbitzuarentzat 2022. urtea azken hamarkadan irteera gehien egin dituena izan da: 6.429 irteera, eta egunean batez  beste 18 abisu jaso zituen. Jarduketa motaren arabera iaz irteerak modu proportzionalean banatu ziren: 2.035 sute (% 32), 2.185 salbamendu (% 34) eta 2.209 laguntza tekniko -galtzadak garbitzea, prebentzio-operatiboak edo likido eta gasen ihesak, besteak beste- (% 34).