Berriak

Derio BiziPark sarearen barruan egongo da, Bizkaiko Foru Aldundiko Garraioak eta Mugikortasun Jasangarria Sustatzeko Sailak bultzatuta.

Miguel Ángel Gómez Viar Saileko titularrak eta Esther Apraiz Derioko alkateak udalerrian bizikleta-aparkaleku seguru instalatzeko hitzarmena aurkeztu dute gaur goizean. Aparkalekua udalerriko tren geltokiaren ondoan eta Bizkaibusen geraleku batzuetatik hurbil egongo da kokatuta.

Bi erakundeen artean lortutako akordioaren arabera, Garraioak eta Mugikortasun Jasangarria Sustatzeko Sailak 60.000 euroko dirulaguntza emango du instalazio osoa jartzeko, eta Udalak aparkalekua egokitu eta hornitzeko lanak egingo ditu, baita berau kudeatu eta mantentzeaz arduratu ere kontratua indarrean den lau urteetan.

Esperientziak erakutsi digu erakundeen arteko lankidetza oso aproposa dela bizikletaren erabilera sustatzeko helburuan aurrera egiteko, hain zuzen ere, lurraldeko eskualde guztietan jarri ditugun BiziPuntuei esker egiaztatu dugun bezala adierazi du Gómez Viar diputatuak.

Bizikletak aparkatzeko hogei plaza izango ditu gutxienez, honako baliabide hauekin: sarrera-kontrola eta kudeatzeko softwarea, Interneteko konexioarekin; barrualdea beti argiturik egoteko sistemak; gutxienez suaren aurkako sei armairu, bakoitza bere elektrizitate-hargunearekin, erabiltzaileek beren gauzak seguru edukitzeko; zaintza-sistemak, eta Derioko Udaltzaingoaren segurtasun-zerbitzuekin konektatutako kamerak.

Horrez gain, Bizkaiko Foru Aldundiak Bizkaiko BiziPark guztietarako emandako jarraibideen arabera pertsonalizatuko da espazioa.

Hamasei urtetik gorako pertsona orok, Derioen bizi zein ez, plaza horiek erabiltzeko eskaera egin ahal izango du. Eskaera-kopurua plaza-kopurua baino handiagoa bada, zozketa egingo da.

Hasiera batean aurreikusitakoaren arabera, aparkalekuak eguneko 24 orduetan funtzionatuko du, urteko 365 egunetan, eta hauexek izango dira aparkalekua erabiltzeko tarifak: 4 € hilabetea; 10 € hiruhilekoa; 20 € seihilekoa eta 40 euro urte osoa. Hamalau egunik behin erabili beharko da bizikleta, aparkalekua ez dadin bizikletak gordetzeko toki batean bilakatu.

Aparkalekua 2023ko abenduaren 31 baino lehen martxan jartzeko konpromisoa hartu da.

Abenduan, bizikletentzako estalitako lehen aparkalekua jarri genuen Eskola inguruan, 32 plazarekin. Eta gaur, proiektu berri bat aurkezten dugu bizikletentzako beste aparkaleku seguru bat jartzeko hemen, tren geltokitik gertu. Bi jarduera horiek Derioko Udalak mugikortasun iraunkorra bultzatzeko eta bizikleta garraiobide osasungarri gisa erabiltzeko duen konpromisoaren adibide dira. Instalazio berri honek gainera, garraiobideen arteko intermodalitatea sustatu nahi du, ibilgailu pribatuaren kaltetan. Gero eta gehiago gara herrian zehar bizikletaz mugitzeko hautua egin dugun derioztarrak eta, zentzu honetan, instalazio hauek erosotasun eta segurtasun handiagoarekin egiteko aukera ematen digute, adierazi du Esther Apraiz Derioko alkateak.

Foru sarea

Ekimen hau foru sailak martxan jarritako plan baten parte da. Horren bidez, lurralde osoan bizikleta-aparkaleku seguruen sare bat zabaldu nahi da, mugikortasun aktiboa eta intermodalitatea sustatzeko asmoz.

Horretarako, 360.000 euro bideratuko dira guztira eta Bizkaiko sei Udalekin akordioak sinatuko dira beste hainbeste aparkaleku jartzeko.

Hauek dira Derio udalerriaz gain ekimenarekin bat egin duten udalerriak: Barakaldo, Güeñes, Abadiño, Bermeo eta Zalla.

Uztailean Ermuan inauguratutakorekin batera, aparkaleku seguruen foru-sareak zazpi BiziPark izango ditu martxan 2023aren amaieran.