Berriak

BizkaiaGara jendaurrean aurkeztu da Bizkaiko gizarteko arlo guztietako ehun ordezkari inguru bildu dituen ekitaldian. Unai Rementeria, Bizkaiko Ahaldun Nagusia; Xabier Sagredo, BBK-ko Presidentea; eta Jon Mancisidor, EDE Fundazioko Presidentea, izan dira ekitaldiaren buru. Bertan, bolunta-ren lekukoa hartu duen BizkaiaGara-ren helburu nagusiak azaltzea izan da xede nagusi. Iker Díez Iturralde, Alberto Marcos eta Ibon Koteron albokariek Bilboko Gran Via kalea zeharkatu dute, Moyua plazatik BBK Salara, BizkaiaGara-k martxan jarri nahi duen ekintza, herritarren parte-hartzea eta lurraldearen aktibazioari eginiko deia isladatuz.

BBKren aldetik, Nora Sarasola Gizarte Ekintzako zuzendariak azpimarratu du garai berrien garrantzia eta BizkaiaGara zein testuingurutan eraiki den: Proiektu honek Bizkaiko bazter guztietara iritsiko den herritarren mugimendu bat eraikitzera dei egiten digu; eragile publiko, pribatu, enpresa, hirugarren sektoreko erakunde eta pertsona indibidualetatik sortuko diren era guztietako ekimenei lekua emango diena; adin guztietako pertsonei, konpromiso egonkor edo puntualak hartzeko aukera duten pertsonei, gure lurraldearen erronkei heltzeko konpromisoa hartzeko aukera emanik.

Jon Mancisidor EDE Fundazioko Presidenteak azaldu duenez, beharrak aldatu egiten dira eta aukera berriak sortzen dira komunitate-lanerako, gizarte-partaidetzarako eta boluntariotzarako. Bizkaia haratago joateko gaitasuna erakutsi duten pertsona eta erakundeen ekosistema bizia da. Bi hamarkadatan bolunta-ren bidez lortutako heldutasun eta ikaskuntza guztiarekin, lekuko baliotsu hori hartzen da eta orain kohesio gehiago, berrikuntza sozial gehiago, pertsona gehiago eta konprometitutako erakunde gehiago amesteko gaitasuna dugu. BizkaiaGara lehenengo lerroan egongo da Bizkaiko ekosistema soziala indartzeko, aukerak eta ekintza sortzeko eta erronka berriei erantzuteko.

BizkaiaGara-k pertsonen, kolektiboen, erakundeen eta enpresen konektorea izan nahi du. Hala azaldu dute proiektuaren koordinatzaile diren Leire Ortiz de Zarate eta Danel Alberdik. BizkaiaGara-ren bidez herritarren konpromisoa indartu nahi dugu, guztia birpentsatzera gonbidatzen gaituen gizarte-eraldaketa sakoneko testuinguru batean. Gure erantzukizuna da, baita gure eskubidea ere, esan du Alberdik.Ekintza komunitarioa eta boluntariotza gizarte gisa partekatzen ditugun balioen isla dira. Boluntariotza elkartasunerako tresna boteretsua da, eta aldaketaren eragile bihurtzen gaitu. BizkaiaGara-n uste dugu egiten duguna garela: herritar solidarioak, aktiboak, kritikoak eta eraldatzaileak. Hori da gure esentzia, aipatu du Ortiz de Zaratek.

Bestalde, Unai Rementeria Bizkaiko Ahaldun Nagusiak nabarmendu duenez, benetako lana orain hasten da. Herriz herri; pertsonaz persona; ahoz aho eta entzuten, ondo entzuten. Hau da, elkar lan egiten eta proiektuak sortzen. Herri bakoitzean hazi bat landatzen, bakoitzean berea. Hau izan behar du BizkaiaGara, proiektu oso berezia lurralde eta gizarte berezi batentzat. Bizkaiarako.

BizkaiaGara-k, gaur kaleratu den http://www.bizkaiagara.eus webgune berriaren bidez, sare sozialetako profilen bitartez, baita aurrez-aurreko atentzioan ere, 360 graduko ingurunea eskainiko du, boluntariotza eta parte-hartze soziala sustatzeko, garatzeko eta balioesteko. BizkaiaGara-k herritarren energia eta herritar konprometituak behar dituzten proiektuak lotuko ditu, arlo guztietan: soziala, hezkuntzakoa, ingurumenekoa, kulturala, kirolekoa, etab. Gainera, BizkaiaGarak boluntariotzako eragileei zerbitzuak eta baliabideak eskainiko dizkie: prestakuntza, aholkularitza, ezagutza. Laguntza teknikoaren bidez, boluntariotzako ekintzak identifikatzen, garatzen eta martxan jartzen eta boluntarioen gaitasunak hobetzen lagunduko du.