Berriak

"Inoiz ezagutu gabeko mugetara luzatu dugu bizitza. Orain, erronka bizitza hori hedatzea da”.

Bizkaiko Foru Aldundiaren Gizarte Ekintza Sailak bizikidetza-unitateen bidez iraupen luzeko zainketen arreta pertsonalizaziora bideratutako jardunaldi ireki bat egin du astelehen honetan. Topaketan 300 parte-hartzaile inguru elkartu dira eta, bereziki, beren eguneroko lanean mendekotasun-egoeran dauden pertsonei bizi-kalitate hobea emateko lan egiten duten profesionalei zuzenduta egon da: Bizkaiko Lurralde Historikoan erantzukizun publikoko gizarte-zerbitzuak kudeatzen dituzten erakundeetako profesionalei. Jardunaldi honetan, Foru Aldundiak iraupen luzeko zainketen pertsonalizazioa bultzatu nahi duen aurrerapen berriaren giltzarriak aztertu ditu, arlo horretan esperientzia handia duten adituekin batera.

Jardunaldiaren hasieran, Sergio Murillo Gizarte Ekintzako foru diputatuak adierazi du gaur egungo errealitateak hau da, bizi-itxaropenaren eta osasun-sistemako aurrerapenen hazkunde jarraituak, lurraldearen garapenaren adierazle onak diren arren, iraupen luzeko zainketen erronkari ikuspegi multidimentsionaletik eta epe luzera heltzeko beharra planteatzen duela: Bizitza luzatzeko gaitasuna izan duten politika publikoen oinordekoak gara. Hori da Bizkaiko gizartearen gaur egungo lorpen nagusietako bat. Inoiz ezagutu gabeko mugetara luzatu dugu bizitza. Orain, erronka bizitza hori hedatzea da.

Sergio Murillok Bizkaiko Foru Aldundiaren planak partekatu ditu egoitza-zentroetan iraupen luzeko zainketen birbilakaera aztertzeko: Iraupen luzeko zainketak dibertsitatearen arretan eta bizitza-proiektua garatzeko laguntza behar duten pertsonen premia, itxaropen eta lehentasunen bilakaeran aurrera egitea ahalbidetuko duen pertsonalizazio baterantz bideratzeko asmoa dugu. Aurrerapauso garrantzitsua da, eta gaur beste mugarri bat jarri dugu.

Alde horretatik, Bizkaiko Gizarte Ekintzako foru diputatuak adierazi du Foru Aldundiak adineko pertsonen egoitzetan (titulartasun publikokoak zein pribatukoak) sustatuko dituen bizikidetza-unitateak estrategia bat direla egoitza-zentroetako arreta pertsonalizatzeko: Zaintza denboran zehar luzatzen denean, zaintzaren esentzia eraldatu egin behar da, oinarrizko beharrizanei edo beharrizan instrumentalei erantzutetik pertsonei laguntzera eta beren bizitza-proiektu pertsonala nahi duten moduan bizi ahal izateko aukerak maximizatzera igaroz. Hala, tamaina txikiko bizikidetza-unitateek lagundu egin behar dute arreta pertsonalizatua ematen, komunitatera irekitzen, eta aukera eman behar dute zentroak etxe bihurtzeko edo bertan bizi diren pertsonak etxean bezala egoteko, azpimarratu du.

Murillok nabarmendu duenez, prozesu mailakatua eta progresiboa izango da, borondatezkoa, lagundua eta partekatua, arreta-ikuspegiaren bilakaera horrek kultura-aldaketa garrantzitsua baitakar, eta orain arte finkatutako prozesuak eta dinamikak egokitzea eskatzen duelako. Erronka hori egungo errealitatetik abiatuta eta orain arte ildo horretan egin diren aurrerapenetatik abiatuta landuko dugu, esan du.

Jardunaldia Bilboko Euskalduna Jauregian egin da, eta bertan izan dira Javier Yanguas "La Caixa"-ko Gizarte Ekintzako Adinekoen Programako zuzendari zientifikoa; Marije Goikoetxea Deustuko Unibertsitateko ikertzailea eta gizarte- eta osasun-zerbitzuetako etika asistentzialaren garapenean kolaboratzailea; eta Lourdes Zurbanobeaskoetxea Foru Aldundiko Ebaluazio eta Orientazioko burua eta koordinatzailea soziosanitarioa. Halaber, desgaitasuna duten pertsonentzako eta adinekoentzako egoitza-zentroetan (hala nola Abadiñoko Gorabideren Atxarte egoitzan eta Soriako Los Royales egoitzan) egiten ari diren kasu praktikoak eta esperientziak azaldu dira.