Berriak

Adineko Pertsonen Kontseiluak Osoko Bilkuraren ohiko bilera egin du gaur goizean. Oraingo honetan Bilboko Euskalduna Jauregian izan da topaketa, eta hitzordua aurrez aurre burutu da. Konfinamenduan zehar, Covid-19ak eragindako osasun-krisiaren ondorioz, lan-bilerak modu birtualean egin dira.

Manuel Merino izan da Kontseiluko burua eta, adinekoen elkarteei dagokienez, Nagusiak, Hartu Emanak, Secot eta Nagusilan elkarteetako ordezkariek hartu dute parte. Foru erakundearen aldetik Sergio Murillo, Gizarte Ekintzako foru diputatua, izan da, Gizarte Ekintza Saileko zuzendaritza taldearekin batera.

Autonomia Pertsonala eta Adinekoen Arreta Sustatzeko Plan baterantz

Kontseiluaren Osoko Bilkurako kideek otsailaren amaieran world kafe formatuan egindako 5 topaketa irekiren zikloaren ondoriozko txostena aztertu dute. Topaketak Adinekoen Kontseiluko batzordeetako kideek dinamizatu zituzten. Dinamika horietan, Basaurin, Barakaldon, Bilbon, Getxon eta Durangon egindako saioetan borondatez parte hartu zuten belaunaldi desberdinetako 261 pertsonaren esperientziak, iritziak eta proposamenak jaso ziren.

Txosten hori gaur aztertu da, eta Bizkaiko Foru Aldundiak sustatzen duen etorkizuneko Autonomia Pertsonala eta Adinekoen Arreta Sustatzeko Planaren oinarri diren dokumentuetan sartuko da.

Gaurko bilera baliagarria izan da, halaber, partaidetza- eta ordezkaritza-organo horrek urteko bigarren seihilekoan egingo duen lana zehazteko. Organo hau kide anitzekoa da, aholkularitza-, kontsulta- eta proposamen-arlokoa, eta Bizkaiko Foru Aldundiko Gizarte Ekintza Sailari atxikita dago; lurraldeko 60 profesional eta adineko pertsona baino gehiago biltzen ditu, lurraldearen zahartze-politikak bultzatzeko konpromisoa dutenak.