Sexu-harrapariei ez zaie zaila egiten nerabe bat engainatzea benetan nahi ez duen zerbait egiteko, baldin eta eskatzen dion pertsona hurbileko norbait bada eta, gainera, erreferentetzat hartzen badu. Kirolaren mundua ez dago pertsona helduek adingabearen borondatea deuseztatzea lortzen duten kasuetatik kanpo. Abantaila gehigarri batekin jokatzen dute: hainbat urte igaro arte ez dira horrelako jokabideak salatzen. Delayed disclosure (salaketa atzeratua) esaten zaio. Izan ere, hainbat arrazoi direla medio, biktima gehienak helduak direnean baino ez dira gai abusuak prozesatzeko, hitzez adierazteko eta salatzeko. Beraz, delitugilea hatzaz seinalatzeko unea iristean, baliteke delitua preskribatu izana. Jarrera isil hori iraganaren parte da dagoeneko, horrelako egoeren aurrean dauden jarduera-protokoloei esker. Hala ere, asko kostatzen da lehen pausoa ematea. Premiazkoa da kirol-erakundeak, gizartea eta sistema judiziala inplikatuko dituen ikuspegi global bat izatea, adingabeak babesteko eta egiten duenak ordaindu egingo duela bermatzeko.