Osasun mentala XXI. mendeko osasun publikoaren kezka handienetako bat bihurtu da. Depresioa, bereziki, gero eta erronka handiagoa da mundu osoan, eta azken hamarkadetan etengabe areagotu da prebalentzia, maila benetan dramatikoetaraino: 8 pertsonatik 1 (970 milioi mundu osoan) osasun mentaleko nahasmendu batek jota dago, eta ia 2tik 1ek gaixotasun mentalen bat izango du bizitzan zehar (Singh et al., 2023). Testuinguru horretan, ariketa fisikoa esku-hartze eraginkor, irisgarri eta albo-ondorio positiboduna da, eta protagonista izan daiteke nahasmendu depresiboen prebentzioan eta tratamenduan.