Bizkaiko kirol-federazioekin batera gaur arratsaldean Kirol Etxean egindako ekitaldian, Bizkaiko Foru Aldundiak aitorpena egin die lurraldeko bost kirol-federazioren berdintasun-planei, hain zuzen, boxeokoak, saskibaloikok, kirol egokitukoak, txirrindularitzakoak eta arraunekoak egindakoei. Euskara, Kultura eta Kiroleko diputatu Leixuri Arrizabalagak kirolean genero-berdintasunak duen garrantzia eta Bizkaiak kausa horrekin duen etengabeko konpromisoa nabarmendu ditu.

Bost federazio horiek ASFEDEBIrekin batera garatu dituzte berdintasun-planak eta, hartara, gainerako federazioekin konpromisoa hartu dute haiei laguntzeko, bi urteko epean Bizkaiko federazio guztiek berdintasun-planak izan ditzaten. Era berean, aldi horretan, programa bat garatuko da berdintasun-planak federazioen egunerokoan ezartzeko prozesuaren jarraipena egiteko, plan horiek kirolaren zerbitzurako tresna errealak izan daitezen.

Arrizabalaga diputatuak eskerrak eman ditu ahalegin horiengatik eta nabarmendu du konpromisoak ez duela soilik kirol-errendimendua bilatzen, baizik eta giro inklusiboa sortzea, non pertsona guztiek, beren generoa gorabehera, ongietorriak eta errespetatuak direla sentituko duten, azpimarratu du.

Arrizabalagak azken urteotan Bizkaian kirolean genero-berdintasuna sustatzeko egin diren aurrerapen esanguratsuak aitortu ditu, eta emakumeak eta gizonak baldintza berdinetan lehiatzearen garrantzia nabarmendu du, baita kirolak zeregin horretan duen funtsezko eginkizuna ere.

Era berean, diputatuak Bizkaiko kirol-sarea osatzen duten erakunde guztiak animatu ditu berdintasun-planak aurkeztu dituzten federazioen eredua jarraitzera, eta azpimarratu du kirolean berdintasuna lortzea elkarrekin lan eginez lor daitekeen helburua dela.

Ekimen hau Bizkaiko Foru Aldundiko kirol-taldeak aurreko legegintzaldian garatutako EMAKI (Emakumea eta Kirola) foroan definitu ziren ondorioen azterketaren ondoren sortu zen; foro horretan Bizkaiko hainbat emakume kirolarik parte hartu zuten eta Bizkaiko kirol federatuan benetako berdintasuna lortzeko jarduketa-ildo nagusiak ezarri ziren.

Bizkaiko Foru Aldundiak lanean jarraituko du kirol-diziplina guztietan emakumeen parte-hartzea sustatzeko eta kirolean aukera-berdintasuna bermatu eta errespetuaren kultura sustatzeko.