Gabarraren igoera arratsaldeko 16:30ean abiatuko da Getxoko Abrako Itsas Klubaren pantalanetik, eta 18:35ean iritsiko da Bilboko udaletxeko eskaileretara.

Ibilbidea honako hau izango da:

1. Areeta - Portugalete: 16:50
2. Lamiako - Labe Garaiak: 17:10
3. Erandio - Sestao: 17:30
4. Lutxana - Punta Zorroza: 17:45
5. Zorrotzaurre - Zorrotza: 18:00
6. Deustu - ItsasMuseum: 18:15
7. Campo Volantín - Uribitarte: 18:30
8. Bilboko Udala: 18:35

Nabarmentzekoa da, beraz, Zorrotzaurre uhartearen ondoko pasabidea Zorrotza aldetik izango dela.

Gabarra udaletxeko zubiaren ondoan 18:30etik 19:00etara egotea aurreikusi da. Bilboko alkate Juan Mari Aburtok, udal segizioarekin batera, talde txapelduna hartuko du udaletxeko harmailadietan. Omenaldi eta ongietorri aurreskuaren ondoren, harrera instituzionalak Arabiar Aretoan jarraituko du. Bertan, alkateak eta presidenteak, entrenatzaileak eta Athletic Clubeko kapitainak protokolozko hitzaldi laburrak emango dituzte. Azkenik, txapeldunak balkoian agertuko dira zaleak agurtzera.

Aurreikuspenen arabera talde txapelduna 19:30etik 20:00etara abiatuko da autobusez udaletxetik, Areatza eta Plaza Biribila zeharkatuz, Bizkaiko Foru Aldundira iristeko. Jauregian Elixabete Etxanobek harrera eskainiko dio taldeari. Foru Jauregiko harrera aretoan Ahaldun Nagusiaren eta Athletic Clubeko presidente, entrenatzaile eta kapitainaren hitzaldi laburrak entzun ahal izango dira. Ekitaldiaren amaieran txapeldunak Foru Jauregiko balkoira aterako dira zaleak agurtzeko. Talde txapeldunak zaleei egindako agur honekin amaitutzat joko da Athletic Club taldearen Kopako 25. titulua ospatzeko ekitaldien egitaraua.