Elixabete Etxanobek, Bizkaiko Ahaldun Nagusiak, Leixuri Arrizabalaga, Euskara, Kultura eta Kirol diputatuarekin batera, Bizkaiko Eskola Kirolaren 2023-2024 denboraldia aurkeztu du gaur goizean Miribilla Eskolan.

Etxanobek nabarmendu duenez, Eskola Kirola, nabarmendu edo azpimarratu behar dugu, lantzen ditugun egitarauen artean, jardueren artean, atseginik handiena ematen dutenetako bat delako. Atseginik handiena Bizkaiko umeen artean kirolaren bidez ohitura osasungarriak sustatzea bezain helburu polita duelako. Ariketa fisikoa egiten, bai, baina baita kirolaren balioetan hezten ere. Elkartasuna, talde-lana, ahaleginak, pozak eta etsipenak partekatzea. Lagunak egitea - taldekideak egitea baino gehiago- eta aurkaria errespetatzea. Kirolaren balioek lagundu egiten dute Bizkaiaren etorkizuna diren haurren heziketa eta prestakuntza lantzen.

Denboraldi honetarako Foru Erakundeak kirol-eskaintza handitu du, guztira 62 lehiaketa-jarduera eta 229 hastapen- eta jolas-ikastaro eginez; eskuragarri dauden plazak 8.119 dira. Datu horien arabera, iazkoarekin alderatuta, 389 plaza gehiago daude hastapenetan, % 5 gehiago, ume gehiagok eskola kirolean parte hartzeko aukera izan dezaten.

Ahaldun Nagusiak Eskola Kirolaren arrakasta eta parte-hartze handia azpimarratu du, iaz 42.000 ikasle baino gehiago erakarri baitzituen. Ildo horretatik Etxanobek Eskola Kirola programaren garrantzia azpimarratu du. Foru Aldundiak 1.630.000 euro bideratuko ditu programa hau garatzeko.

Bizkaiko ikasleen artean kirol-ohitura sortzea Bizkaiko Foru Aldundiaren helburu bat da; horregatik gazteen artean jarduera fisikoa eta kirola sustatzeko konpromisoari eusten dio, hezkuntza-balio positiboak eta bizimodu osasungarria sustatuz. Gainera Foru Erakundeak ikastetxeen eta kirol-kluben arteko lankidetza sustatzen du, familietatik hurbil dagoen ingurune batean askotariko kirol-eskaintza eskuragarria eskainiz. Horrela, federazio, udal eta erakundeekiko lankidetzak bermatu egiten du kirol-eskaintza inklusiboa eta genero-berdintasunarekiko errespetuzkoa izango dela.

Datorren urriaren 7an hasiko dira Eskola Kiroleko lehiaketak, errendimenduko futboleko infantilen eta alebinen lehiaketei hasiera emanez.

Eskola Kirola programari buruzko informazio gehiago bizkaia.eus/eskolakirola webgunean edo Eskola Kirolaren APPan lor daiteke; aplikazioa doan deskarga daiteke Play Store-n (Android) eta App Store-n (iOS) .

Eskola Kirolaren 2023-2024 Programa

Eskola-kirolaren programak hiru ardatz ditu: kirolaren hastapena, hastapen- eta lehiaketa-jarduerak eta lehiaketa-jarduerak.

Kirolaren hastapenak

Kirolean hasteko programaren helburua kirolaren munduan pixkanaka murgiltzea da, eta Lehen Hezkuntzako lehen lau mailetako ikasleei zuzenduta dago. Aurreko denboraldietan izan duen arrakastagatik HEZIKI proiektua nabarmentzen da (Lehen Hezkuntzako 1. eta 2. mailak); programa honen bidez umeengan mugitze-trebetasunen garapena bultzatu nahi da, euren ekintzen kudeaketa autonomoa erraztuz, eta, ondorioz, etorkizunean egin nahi dituzten kirolen irakaskuntzan proposatuko zaizkien mugimendu motore guztiak garatuz. Hori guztia egin beharreko ekintzak atseginez biziko diren giroan egingo da, kirola egiteko eta jarduera fisikoa egiteko zaletasuna sustatuz.

Izen-ematea ikastetxeen eta/edo horiei lotutako gurasoen elkarteen edo kirol-erakundeen bidez egiten da.

Hastapen-ikastaroetan izena emateko epea urriaren 23an amaituko da eta www.bizkaia.eus/eskolakirola helbidearen bidez egin behar da.

Hastapen- eta jolas-jarduerak

Era berean, hastapen- eta jolas-jardueren helburua Bizkaiko kirol-eskaintzaren errealitatea ikasleei hurbiltzea da.

Izena emateko epea zabalik dago eta hastapen- eta jolas-jarduerei buruzko informazioa eskuragarri dago.

Lehiaketa-jarduerak

Lehiaketa-jarduerei dagokienez Bizkaiko Foru Aldundiak lehiaketako 62 jarduera eskaintzen ditu guztira, aurreko denboraldian baino bat gehiago, hiru kirol-ibilbide desberdinen bidez: kirol-partaidetza, errendimendurako hastapena eta kirol-talentuak eta -promesak identifikatzea. Ibilbide hauek ikasle bakoitzaren beharretara eta nahietara egokitzen dira, eta hainbat mailatan kirola egiteko aukerak ematen dituzte.

Izena emateko epea zabalik dago.

Ikasleen babesa eta ongizatea

Bizkaiko Foru Aldundiak konpromisoa hartzen du kirolari gazteenen ongizatea bermatzeko. Denboraldi honetatik aurrera Eskola Kirolean parte hartzen duten erakunde guztiek adingabeen ongizatea zaintzeko pertsona bat izendatu beharko dute, eta arlo horretan jarduteko protokolo bat izateko konpromisoa hartu beharko dute. Neurri honek are gehiago indartzen du Eskola Kirola egiten duten umeak babesteko konpromisoa.

Kirol Lanbideen Euskal Legera egokitzea

Bizkaiko Foru Aldundiak, halaber, Eskola Kirola pixkanaka Kirolaren Lanbideen Euskal Legera egokitzeko konpromisoa hartzen du. 2023/24 denboralditik aurrera, saskibaloian, R futbolean eta futbolean parte hartzen duten erakundeetako teknikariek eta kirol-arduradunek titulazio egokia izan beharko dute, kirol-irakaskuntzaren kalitatea eta segurtasuna bermatuz.

Txartel Beltzaren erabilera zabaltzea

Bizkaiko Foru Aldundiak saskibaloiko, eskubaloiko eta errugbiko diziplinetara zabalduko du Txartel Beltzaren erabilera. Txartel honek kirol-espazioetan hezkuntzakoak ez diren portaerak kontrolatzen ditu.

Eskola Kiroleko jardueretan, jardunaldietan parte hartzen duten pertsonek (kirolariek, teknikariek eta/edo ikusleek) ezin dute hezkuntza-lanaren aurkako ekitaldirik egin. Kirolen aurkako ekintzak Eskola Kirolaren Programako ekitaldietan gerta ez daitezen Bizkaiko Foru Aldundiak 2013-2014 denboraldian sortu zuen Txartel Beltzaren figura, hasiera batean futboleko diziplinan baino ezarri ez zena.

Txartel honek "zigortu" egiten du ikasleek, jokaleku barruan edo kanpoan, parte hartzen duten kirol-lehiaketa batean gerta daitekeen ekintza oro, baldin eta ikasle horien hezkuntza integralean laguntzen ez badu. Bereziki, hitzezko indarkeria edo indarkeria fisikoa edo kiroltasunaren aurkako jarrerak zigortzen ditu.