KIROLBIDE PRO EKARRIZKETAK: BAKUVA ESPERIENTZIA

1. Zer da Bakuva eta zeintzuk dira zuen helburuak?

Bakuva (Baloncesto Kultura Valores) 2007an sortu zen, kalteberatasun-egoeran dauden haur eta gazteen gizarteratzea errazteko helburuarekin. Bakuvak ahaleginak egiten ditu balioetan hezteko, aukera-berdintasuna lortzeko, gure familien pobrezia-zirkulua apurtzeko eta proiektuan parte hartzen dugun adingabeen gizarteratzea lortzeko.

2. Zergatik erabiltzen duzue kirola zuen lanaren motor gisa?

Saskibaloiarekin hasi ginen gure lanaren motor gisa, proiektu honen aitzindariek arlo honetan zuten ezagutzari esker. Oinarri hori izatea funtsezkoa izan da erabiltzaileek kirola egiteko konpromisoa ikus eta uler zezaten, helburu batzuekin, metodologia batekin, lehiakorretik haratago doazen balioekin, hala nola, erantzukizuna eta gauzak hobeto egiteko gogoa, partekatzekoa eta taldean lan egitekoa. Kirolak ematen dizkizun balioak bizitzarako garrantzitsuak direla uste dugu, eta, gainera, kirolak konfiantza sortzen duela norberarengan, eta ondo pasatzen duzula eta gustatzen zaizula egitea. Konturatu gabe ikasten duzu, gozatuz.

Bakuvan kirolak ematen dizkigun balio horiek guztiak hartzen ditugu, eta alderdi akademikora ere eramaten ditugu; han hartzen du indar handia proiektu honek, bilatzen duguna baita gizarteratze hori izatea prestakuntza egoki baten bidez, helduaroan aurkituko dituzten gizarte- eta lan-aukerak hobeto aprobetxatzeko.

3. Nola egin ditzake aldaketak kirolak lagundu nahi diezuen kolektiboetan?

Kirolak faktore zoragarria du pertsonak aldatzeko eragile gisa, izan ere, kirola egiten duzun bitartean osasungarria zara, zure gorputzak eskertzen dizu, baina, batez ere, zure buruak emozionalki prestatzen zaitu bizitzan edo egunerokotasunean izan dezakezun edozein erronkari aurre egiteko. Gainera, guk talde-kirolak egiten ditugu, eta, beraz, zure harremanetan, talde-lanean eta talde orok dituen roletan laguntzen dizu. Lehiaketak, aurkariek, arbitroek eta kirolaren inguruko eragile guztiek emozioak erregulatzen, egoera zailei aurre egiten, zure mugak ezagutzen, ahalegintzen eta egoera bakoitzaren alde positiboa ateratzen ikasarazten dizute. Hori guztia bizitzarako prestatzen zaituzten eguneroko ikaskuntzak dira.

Kirolak, gainera, beste ingurune edo jokabide arriskutsu batzuetatik prebenitzen zaitu.

4. Nolakoa da zuen lan-metodologia?

Edonor sar daiteke gure kirol taldeetan, doako jarduera da eta edonorentzat eskuragarri dago. Bertan, entrenamenduak, errefortzu akademikoa eta aisia eta denbora librea uztartzen dituzte.

Kirola egiteak kostua dakar, eta familia askok ezingo lukete beren seme-alabak kirol-talde batean sartu. Bakuvatik saiatzen gara haur guztiek esperientzia hori izan dezaten, maila sozioekonomikoa kontuan hartu gabe eta taldeetara sartzeko probarik egin gabe. Berdin dio dakizun edo ez dakizun, ona edo txarra zaren, pertsona guztiak sar daitezke.

Erakundearen barruan zaudela, ordutegi bat eta arau batzuk dituzu, astero jarduerak egiten dituzu erakundean eta beste haur batzuekin, begiraleekin eta boluntarioekin bizi zara. Familia txiki bat bezalakoa gara.

5. Zer ekarpen egiten die kirolak zuen gazteei?

Bizitzan zehar lagunduko dizuten balioak emateaz gain,  kirolak ohitura osasungarriak hartzera laguntzen zaitu, arrisku-giroetatik urruntzen zaitu eta zure autoestimua eta konfiantza hobetzen ere laguntzen dizu. 

Bestalde, ondo pasatzen duzu, lagunak egiten dituzu eta talde bateko kide sentitzen zara; pertenentzia-sentimendua garrantzitsua da.  Era berean, beste talde eta ikastetxe batzuekin harremanetan jartzen, kuxkuxean ibiltzen eta ingurunearekin erlazionatzen laguntzen dizu.

Gure entrenatzaile, ordezkari eta arbitro asko gure proiektuan hazi diren neska-mutil ohiak dira, eta orain kirola maite dute eta beste batzuei helarazi nahi diete; beraz, boluntarioak dira gure proiektuan. Oso polita da gure proiektua helduetatik txikietara nola transmititzen den ikustea. Haientzat guztientzat kirola oso garrantzitsua izan da beren bizitzan, eta asko eman die guztiei maila pertsonalean; oso baloratua da, eta asko ikasi dute pertsona gisa.

6. Zer oztopo aurkitzen dituzue zuen helburuak kirolaren bidez baldintza onenetan lortzeko?

Instalazio gutxi ditugu, eta, beraz, espazio eta ordutegi arazoak ditugu. Gainera, jarduera guztiak doakoak direnez, horiek finantzatzeko funtsak eta proiektuak aurrera ateratzen lagunduko diguten boluntarioak behar ditugu. Bestalde, kirolean, arrazakerian eta xenofobian diskriminazioa prebenitzeko proiektuetan ere parte hartzen dugu (SCORE proiektua).

7. Kirolarekin lotutako erronka edo garapen-ildo berriak dituzue?

Lehenik eta behin, parte hartu nahi duten eta orain plazarik ez duten pertsonen itxaron-zerrenda murriztu behar da. Horretarako, instalazio gehiago, boluntario gehiago eta funts gehiago behar ditugu. Jakina, beti gaude jardueren etengabeko hobekuntzan, entrenamenduak eta metodologiak hobetu behar dira, eta entrenatzaileei eta ordezkariei etengabeko prestakuntza eman behar diegu. Familiak tartean sartzeaz gain, proiektuaren parte izan daitezela eta gero eta gehiago etor daitezela beren seme-alaben taldeei laguntzera.

8. Ezagutzen al dituzue kirola integraziorako baliabidea den erreferentziazko beste fundazio batzuk?

Gutxi daude, baina batzuk bai: Otxarkoagako Otxartabe fundazioa, Madrilgo Balia fundazioa, Leioako Fidias fundazioa, besteak beste. Kirolak haur guztien eskura egon behar du, eskubide bat izan behar da eta ez pribilegio bat.

9. Ekarpenik edo iruzkinik egin nahiko zenuke?

Gure proiektua kirolaz haratago doa, kirola erabiltzen dugun tresna bat da eta oso indartsua dela uste dugu, azken helburua gure haur eta gazteen gizarteratzea erraztea da eta prozesu honetan modu pertsonalizatuan laguntzen diegu.

INFORMAZIO GEHIAGO

Bakuva (Baloncesto Kultura Valores) 2007an sortu zen, Juan Garteiz eta Juan Carlos Grijelmoren ekimenez, Bilbao La Vieja auzoan haurrei aisialdi eta kirol jardueren bidez laguntzeko asmoz. Fundazioaren helburua bazterketa- edo deserrotze-arriskuan dauden eta egoera ahulean dauden kolektiboetako pertsonak gizarteratzea da.

Hauek dira bere jarduerak: eskola-laguntza (Lehen Hezkuntza, DBH eta Batxilergoa), hizkuntza-gela (ingelesa eta euskara), aisia eta astialdia (lanegunak, asteburuak, oporrak, campusa, kultura-irteerak, igerilekuko txangoak, etab.), eskulanak, teknologia- eta kirol-gela (saskibaloia eta futbola).

KIROLA:

Saskibaloia

1. 7 eta 12 urte bitarteko haurren taldea entrenamendua.
2. DBH eta batxilergoa (entrenamenduak eta partidak).

Futbola

1. Athletic Fundazioarekin lankidetza.
2. Entrenamenduak El Fango kiroldegian eta partidak Lezaman.

Kontaktua:

• Mina de San Luis kalea 8, 48003, Bilbo

• Telefonoa: 946558480

• Facebook

• Instagram

• Twitter