Bizkaiko etorkizun handiko kirolariak detektatu eta horiei laguntza emateko programan izena emateko epealdia 2023ko urriaren 6tik 24ra arte izango da. Programa horren helburua, Bizkaiko Lurralde Historikoko etorkizuneko kirolariak detektatzea eta 2024 programan sartzea da.

Kirolaren munduan proiekzioa duten Bizkaiko Lurralde Historikoko kirolariak detektatzeko eta 2024 Programan sartzeko, Bizkaiko Foru Aldundiak kirol-merezimenduen ebaluazioa egingo du, eskatzaileek emandako dokumentazioaren eta datuen arabera, eta bi kirolari-kategoriaren zerrenda osatuko du, merezimendu horien arabera: Etorkizun Handiko Kirolariak eta Etorkizun Handiko Kirolaritzat jotzeko hautagaiak.

Baldintzak

Bizkaiko Foru Aldundiak 2024ko Etorkizun Handiko Kirolari izaera edo Etorkizun Handiko Kirolaritzat jotzeko hautagai izaera aitortzea nahi duten kirolariek baldintza hauek bete beharko dituzte:

1. 2023rako kasuan kasuko Bizkaiko federazioaren bitartez lizentzia izapidetuta izatea.
2. 2000. eta 2008. urteen artean (biak barne) jaioak izatea.

2008. urteaz geroztik jaiotako kirolarien kasuan, proba olinpikoetan lehiatzen diren kirolariek baino ezin izango dute promesa-aitorpena jaso, betiere merezimenduak goragoko kategoria batean (kadetea, juniorra edo seniorra) lortzen badituzte. Horrez gain, eskabideak aurkezteko epearen barruan, dagokion federazioaren txostena aurkeztu beharko du kirolariak, bertan parte hartu izana justifikatzeko.

Federazio txosten hori ez da loteslea izango. Kirol Zerbitzuak proposatu dezake txostena aurkeztu duten kirolariak ez sartzeko, beti ere zergatia arrazoitzen badu.

2022ko urriaren 1etik 2023ko irailaren 30era (egun biak barne), gutxienez 5. oinarrian datorren kirol merezimenduren bat lortu duten kirolarien eskabideak baino ez dira aztertuko.

Dokumentazioa eta epeak

Bizkaiko Foru Aldundiak 2024ko Etorkizun Handiko Kirolari izaera aitortzeko aurrez aurreko eskabideak eredu ofizialean (EK1 inprimakia) aurkeztu behar dira, behar bezala beteta. Eredua web-orri honetan eskura daiteke: https://www.ebizkaia.eus/eu/fitxategi-prozedura?procedimiento=2463

Bizkaiko Foru Aldundiaren egoitza elektronikoaren bidez aurkeztuz gero, Administrazio Publikoen Administrazio Prozedura Erkidearen 2015eko urriaren 1eko 39/2015 Legearen 66.6 artikuluan xedatutakoarekin bat etorrita betetzeko eta egoitzan aurkezteko dauden eredu berezien araberako eskabideak erabili beharko dira.

Kirolari adingabeen eskabideak aitak, amak edo legezko ordezkariak aurkeztuko ditu.

Eskabideekin batera dokumentazio hau aurkeztu beharko da:

1. 2023 urteari dagokion federazio lizentziaren kopia.
2. Kasuan kasuko kirol merezimenduak egiaztatzeko dokumentua, dagokion fede razioak emana.
3. Kirolaria dekretu honen 3.1.b) oinarrian ezarritako urteak baino ondoren jaio bada: sar dadin behar bezala justifikatzen duen kasuan kasuko federazioaren txostena.
4. Legezko edo borondatezko ordezkaritzaz jardunez gero, ordezkaritza zuzenbidean baliozkoa den edozein frogabide erabiliz egiaztatzea.

Eskabideak aurkezteko epea 2023ko urriaren 6tik 24ra bitartekoa izango da, egun bi horiek barne.