Zer aurkituko duzu orri honetan?

Mugitu bizikletan

Ezagutu Bizkaiko bizikleta bide guztiak (eraikitzen ari direnak barne). Bide horiek hiru dimentsiotan ikusi ahal izango dituzu aplikazio kartografiko baten bidez, bizikleta erabil dezazun errazteko beste baliabide batzuekin batera: bizikleta publikoaren mailegu puntu automatikoak, bizikleta mantentzeko edota garbitzeko lantegiak eta Bizkaiaz gozatzeko bizikleta ibilbide proposamenak.

Bizikleta sarea bistaratzeko irudia

Erakundeen babesa

Joan-etorrietako hierarkia aldatzeko eta garraiatzeko modu jasangarriei indar handiago emateko (hala nola bizikleta) gobernu eta administrazio publiko guztiak ( batez ere tokikoak eta eskualdekoak) batera ahalegindu behar dira, gizarte zibileko agente guztien konpromiso aktiboa dutela. Izan ere, bizikleta garraiobide gisa sustatzeak mugikortasun arazoak konpontzeaz gain, gure hiriak eta herriak bizigarriago egiten ditu, eta onuragarria da osasun kolektiborako eta indibidualerako. Gizartea garatzea laguntzen du, aurrerapen jasangarriaren eta kalitatearen ikuspegitik.

Bizikleta mailegua

Mailegu automatikoa

Bizkaian hainbat zerbitzu automatiko daude bizikletak maileguan eskaintzeko: erakunde publikoek (Aldundiak eta udal batzuk) sustatuta bat dago Bilbo Metropolitarrean. Beraz, honako herri hauetan eskeintzen da, gaur egun, mailegu zerbitzu hau: Barakaldo, Berango, Bilbo, Erandio, Getxo, Leioa, Portugalete, Santurtzi eta Sestao.

Hala ere, 2027tik aurrera, Bizkaiko udalerri guztiek bizikletak mailegatzeko zerbitzu publikoa izango dute (maila, baldintza eta prestazio desberdinekin, biztanle motaren arabera), "Bizkaibizi 2.0 Planaren" esparruan.

Bizkaibizi

Bizkaiko Foru Aldundiak eta metropoli-eremuko 9 udalek (Barakaldo, Berango, Bilbo, Erandio, Getxo, Leioa, Portugalete, Santurtzi eta Sestao) bizikleta elektrikoen mailegu zerbitzu publiko hau sustatzen dute. 824 unitate ditu (horietatik 9 mugikortasun urriko pertsonentzako trizikloak, bat udalerri bakoitzeko) 109 ainguraketa eta birkarga estaziotan banatuta, eta 85 km-rako autonomia. Bizkaibizi garraio publikoko zerbitzuak metropoli eremuaren zati handi bat hartzen du, eta udalerri beraren barruan edo parte hartzen duten udalerrien artean joan-etorriak egiteko erabil daiteke. 2027tik aurrera, zerbitzua Bizkaia osora zabalduko da: 38 udalerrik iraupen laburreko zerbitzu bat izango dute, egungoa bezalakoa (metropoli eremuko 9 udalerritan funtzionatzen duena), eta gainerako udalerrietan (75, dentsitate eta landa eremu txikiagoetakoak) iraupen luzeko bat jarriko da, ezaugarri propioekin: 12 estazio estaliak jarriko dira eskualde buruetan eta gainerako garraiobide publikoekin konektatzeko nodoetan. Zerbitzu berri hori 2026.02.12ko Foru Gobernu Kontseiluak onartu zuen, eta “BizkaiBizi 2.0 Plana” identifikagarriarekin bataiatu da. 1.300 bizikleta elektriko baino gehiago izango ditu, eta urteko 3,78 milioi euroko kostua (flotarentzat, geltokientzat, mantentze lanentzat eta operatiboarentzat).

Bilbaobizi

Bilboko bizikletak mailegatzeko udal zerbitzuak (Bilbaobizi) 48 mailegu puntu ditu (horiei 20 berri gehituko zaizkie 2026an, 68 mailegu-puntuetara iritsi arte), 790 bizikleta elektrikorentzat (1.250 unitate 2026an zehar). Zerbitzua herritar guztien eskura dago, baina Bilboko udal mugartera soilik mugatzen da (hala ere, BizkaiBizi udalaz gaindiko zerbitzuarekin osatzen da, hiriburuan dauden hainbat konexio punturen bidez, zehazki, San Inazio, Abando, Zorrotza eta Bilbo Intermodalean).

Eskuzko mailegua

TOKIKO EREMUA. Lau udalerrik bizikletak mailegatzeko edo alokatzeko eskaintza txiki eta mugatua dute, bizikleta sustatzeko programaren barruan edo aisialdirako eta ibilbide edo joan-etorri libreak egiteko euskarriaren barruan: Orozko (Bertako museoan, hamar bizikleta), Mundaka (Turismo informazio zentroan, sei bizikleta), Otxandio (Bizigunen, hogei bizikleta) eta Zeberio (sei bizikleta elelektriko, mailegu puntua Ermitabarrin).

ESKUALDEAN. Enkarterrin bizikletak alokatzeko zerbitzu propioa dago: “Enkarterri Bike”. Eskualdeko turismoa eta ekonomia sustatzen duen Enkartur elkarteak bultzatuta. Balmasedan duen egoitzaren bidez ematen da zerbitzua. Horretarako, 50 bizikleta baino gehiago ditu (errepide, MTB eta gravel lur orotarakoak), ohikoak zein elektrikoak. Baita web atari bat ere, ondorengo zerbitzuekin: ibilbide geolokalizatuak, bizikleta-gida, produktu espezializatuak (ostatuak, garraioa, turismo-baliabideetarako sarrerak, jatetxeak...) eta abar.

Urdaibaik ere, Urremendi Landa Garapenerako Elkarteak sustatutako "Urdaibai BIke Reserve" programaren barruan, mota guztietako bizikletak mailegatzeko zerbitzuak (ohikoak eta elektrikoak) biltzen ditu, txirrindularientzako ibilbide, ostatu eta zerbitzuen proposamenarekin batera.

Aparkaleku seguruen zerbitzuak

Bizkaian bizikletak modu seguruan zaintzeko eta gordetzeko hainbat aukera eskaintzen zaizkie herritarrei, hala nola bizikletentzako aparkaleku automatizatuak (itxiak dira eta zaintza kamerak dituzte, sartzeko modu automatikoan irekitzen da eta irteteko «contactless» sistema txertatuta du).

Intermodalitatea

Bizkaiko garraiobide guztiek aukera ematen dute bizikletarekin bidaiatzeko, baina bakoitzak araudi propioa du, pakete kopuruaren eta txartel motaren arabera. Era berean, egunetik egunera, gero eta korapilo edo garraio zentro gehiagotan daude bizikleta segurtasunez zaintzeko eta gordetzeko guneak, zure helmugara lekualdatzeko erabiltzen duzun garraio publikoko geltokira pedalei eraginez iritsi ahal izateko.

    • Metro Bilbao

      Metro Bilbaoko “Bidaiarien eskubideen gutuna" dokumentuan jasotakoaren arabera bizikleta kostu gehigarririk gabe garraia daiteke metroan, bertako langileek debekatu ezean (pertsona gehiegi daudelako edo gainerako bezeroei eragozpenak eragiten dizkietelako).

      Gehiago jakin

    • Renfe - Feve

      Pertsona eta txartel bakoitzeko bizikleta bat eraman daiteke aldiriko zerbitzuetan (distantzia ertain konbentzionaleko eta metro bateko zabalerako zerbitzuetan barne). Bizikleta daraman pertsona arduratuko da zaintzeaz eta trenera igotzeaz eta jaisteaz. Gainera, bizikletak eramateko lekuetan garraiatu beharko da (seinalerik ez badago, baimendutako trenen sarbideetan, hau da, ezin izango dira korridoreetan eta eserleku guneetan eraman). Bizikleta tolestu ahal izanez gero, eta luzerak, zabalerak eta altuerak ez badituzte 180 zentimetroak gainditzen, eskuko ekipajetzat hartuko da.

      Gehiago jakin

    • Euskotren eta Euskotran

      Bizikletak doan garraia daitezke, betiere pertsona eta txartel bakoitzeko bizikleta bakarra eraman daiteke. Horretarako, trenetan bizikletak garraiatzeko euskarriak daude (tren bakoitzean bi daude eta bakoitzak hiru bizikleta euts ditzake). Bestalde, tranbietan ez dago bizikletak eramateko gune zehatzik, haur kotxeak garraiatzeko gunean eraman behar dira (azken horiek lehentasuna izango dute, hortaz, gehienez ere, bi bizikleta eraman daitezke tranbia bakoitzean). Bizikletak ezin izango dira inoiz ere gurpil aulkientzako gunean garraiatu. Posible izango litzateke bizikleta gehiago eramatea, baldin eta bagoietan toki nahikoa badago. Hala eta guztiz ere, bizikleta sartzea eragotzi ahal izango da, hala badagokio (instalazioetan pilaketak edo matxurak daudenean eta pertsonen joan-etorria eta mugikortasuna zailtzen duten bestelako egoeretan). Tolestu ahal diren bizikletak (bai eta haurrentzako bizikletak ere) eskuzko ekipajea izango dira, eta horretarako ezarritako araudia bete beharko dute.

      Gehiago jakin

    • Funikularrak

      Artxandako funikularra Bilboko Udalak kudeatzen du eta Larreinetakoa (Trapagaran), aldiz, Euskotrenek. Bi funikularrek aukera ematen dute bizikletak garraiatzeko. Lehenengo kasuan, aldez aurretik ordaindu beharko da txartel pertsonalaz gain joaneko beste txartel bat, eta bigarren kasuan, ordea, doakoa da. Hala ere, Artxandako funikularraren araudiak bidaia bakoitzeko gehienez lau bizikleta ezartzen ditu, eta horiek bigarren konpartimentuan, behetik hasita, bidaiatu behar dute. Larreinetako funikularrean, berriz, unitatearen baldintzek eta okupazioak ahalbidetzen badute garraiatuko da.

    • Bizkaibus

      Zerbitzu eskuliburuaren arabera, Bizikletak soilik autobus artikulatuen plataforma nagusian garraia daitezke (hau da, artikulazioaren gunean) salbu eta bertan bidaiariak zutik badaude, hau da, puntako orduetan (7:30etik 9:30era; 13:30etik 14:30era eta 18:30etik 20:00etara). Salbuespenak egingo dira, eta, beraz, bizikleta autobusera sartzea baimenduko da, aireportuko linean (A3247) eta artikulatu gabeko pisu altuko autobus guztietan, maletak garraiatzeko lekurik badu, bizikleta barruan joan beharko da eta (ekipajea balitz bezala eta zorroan gordeta; izan ere, autobus horietan bizikletentzako bi zorro daude). Adierazitako baldintzetan bizikletak eramateagatik ez da beste txartelik ordaindu behar izango.

      Gehiago jakin

    • Bilbobus

      Probaldian, 2015-2016 urteetan, autobus batzuen kanpoaldean, atzeko aldean, bi bizikleta ere eraman ahal ziren. Neurri hori alde batera utzi zen, hortaz, Bilbobusek gaur egun ez du zerbitzu hori edo antzekorik eskaintzen. 2023ko otsailaren 23ko udalbatzan onartutako Bilbobusen Araudia aldatu ondoren, barruan bizikletak tolestuta garraiatzeko aukera eman zen.

      Gehiago jakin

    • Etxebarribus

      2016tik, Etxebarriko udalerriko tokiko autobusek kanpo euskarri horiek dituzte.

      Gehiago jakin

    • Pesa

      Zamategia duten autobusetan bizikletak garraiatu ahal izango dira, betiere bizikleta dagokion zorroan sartuta eta garraiatzeko espazio nahikoa dagoenean. Bizikletak ezin izango dira sartu ibilgailuko bidaiarientzako lekuan. Ekipajeek edo poltsek lehentasuna dute ibilgailuaren zamategian sartzeko.

      Gehiago jakin

    • Alsa

      Bizikletak garraiatzeko txartelaren prezioan gehigarri bat ordaindu behar da (distantziaren arabera). Nazioarteko zerbitzuetan bizikletak soilik garraia daitezke Espainia-Maroko linean, aldez aurretik erreserba egin eta dagokion zenbatekoa ordaindu behar da. Eskuragarri dagoen espazioa mugatua denez, gehienez ere lau unitate (bizikletak eta surf taulak, betiere txartel bakoitzeko unitate bakarra) garraia daitezke. Behar bezala gorde beharko dira garraiatzeko kutxan edo poltsan, eta, gutxienez, irten baino hamabost minutu lehenago egon behar da ontziratzean.

      Gehiago jakin

    • La Unión autobusak

      Bizikletak leihatilan fakturatu beharko dira, autobusean bidaiatu ahal izateko. Lehenengo, ekipajeak jarriko dira autobusaren zamategian eta, ondoren, bizikletak. Bertan lekurik ez badago, bizikleta joan daitekeen hurrengo lehen autobusean joango da. Bizikletari gurpilak kendu beharko zaizkio eta koadroa behar bezala gorde beharko da.

      Gehiago jakin

    • Bilman Bus

      Bizikletentzako tarifa berezi bat dago, eta leihatilan bertan kontsultatu behar da zamategian lekurik dagoen. Desmuntatuta garraiatu beharko da, ahalik eta espazio gutxien har dezan (gehienez, 140 cm luze), betiere babestuta (burbuilazko plastikoa edo antzekoa erabilita), norberaren eta gainerako bidaiarien ekipajean kalteak saihesteko.

      Gehiago jakin

    • SociBus

      Bizikletak ez dira ekipajetzat hartuko, hortaz, aparte fakturatuko da. Babestuta egon behar dira, eta ibilgailuaren zamategian libre dagoen lekuaren arabera garraiatuko dira.

      Gehiago jakin

    • IRB Castro

      Bizikletek tarifa berezi bat izango dute eta zamategian libre dagoen lekuaren arabera garraiatuko dira.

      Gehiago jakin

    • Ferry Bilbao

      Bizikletaz bidaiatzeko aukera ematen du erreserbatuz gero. Garajean sartu behar da gainerako ibilgailuekin (ez bidaiariekin), eta norbera arduratuko da ontzira igotzeaz eta jaisteaz.

      Gehiago jakin

    • Bizkaia zubia

      Bizikletak Bizkaia Zubiko ontzitxoan eraman daitezke, eta dagokien tarifa ordaindu beharko da (bizikletaren eramateko ordaindu beharreko prezioa txartel arrunta baino zertxobait merkeagoa da).

      Gehiago jakin

  • Hegazkina

    Bizikleta hegazkinean garraiatzeko paketatu behar da. Horretarako, desmuntatu eta babestu beharko da (normalean, tolestuta, eskulekuak alboetan finkatuta, pedalak kenduta edo barrualdera biratuta eta gurpilei airea kenduta), honako neurri hauek gainditzen ez dituen pakete bat izan arte: 220x90x90 cm. Aireko garraio lineen artean politikak oso bestelakoak dira bata bestearen artean bizikletei ekipaje gisa ematen zaien tratuari dagokionez. Batzuek kirol materialtzat jotzen dituzte eta, horregatik, gainkostu bat ordainarazten dute, eta beste batzuek, berriz, gehiago errazten dute joan-etorria. Baldintzak askotarikoak direnez, komenigarriena txartela erosi aurretik konpainia bakoitzean zuzenean galdetzea da. Hala ere, konpainia nagusietara jo dezakezue "Skyscanner" web estekan, erantsita.

    Gehiago jakin

Gidatu arduraz

Bizkaiak askotariko mugikortasunen arteko bizikidetza seguruaren aldeko apustua egin du, elkar ulertuta eta errespetatuta eta baliabide nahiko daudela. Lehentasuna dute garraio jasangarriek (modu aktiboak zein garraio publikoa).

  • Errespeta ditzagun zirkulazio arauak

    Arauak ezagutu eta bete behar ditugu, eta arau horiek betetzeko gu geu eredu izan behar gara gure jokabidearekin, bide publikoan errespetu eta elkarbizitza gune izan arte.

    Zirkulazio araudiaren laburpena

  • Arduraz zirkulatu

    Arretaz jokatu behar dugu gidatzen dugunean, eta arreta osoa jarri behar dugu gure kale eta errepideetan ibiltzen garenean: prebentziozko gidaritza eta zirkulazio estrategia seguruak.

    Mugitu arduraz (Eskuliburua)

  • Bizikleta bideak behar bezala erabili behar ditugu

    Ibilbiderik seguruena aukeratu behar dugu eta ustekabeko maniobrak saihestu, garrantzitsua da aurreikustea: deskuiduak saihestu, arduraz gidatu eta nork bere burua nabarmendu.

    Segurtasunez ibili bizikletan

Bizikleta mugikortasunari lotutako zalantza gehiagorik duzu?

  • Trafikoari buruzko Legearen 23.5 artikuluan jasota dagoenez, bizikleta bat gidatzen dutenek pasatzeko lehentasuna dute ibilgailu motordunen aldean:

    1. bizikletaz doazenek bakarrik erabiltzeko bideratuta dagoen bizikleta-bide batetik, txirrindularientzako pasabide batetik edo bazterbide batetik zirkulatzen ari direnean.
    2. beste bide batean sartzeko, motordun ibilgailuak eskuinera edo ezkerrera biratu behar duenean, baimendutako kasuetan, eta inguruan txirrindulari bat dagoenean.
    3. bizikletak taldean zirkulatzen ari direnean, unitate mugikor bakartzat hartuko dira pasatzeko lehentasun-ondorioetarako. Horrela, taldeko lehen bizikleta gurutzatzen hasi denean edo biribilgune batean sartu denean, taldea osatzen duten gainerako unitateei lehen bizikleta horri aitortzen zaizkion lehentasunak aplikatuko zaizkie. Horri dagokionez, hiri-zirkulazioan dagokion udal-ordenantzak xedatutakoa beteko da, beste irizpideren bat aukeratzen bada.

    Gainerako kasuetan, Trafikoari buruzko Legean ibilgailuen artean pasatzeko lehentasunari buruz jasotako arau orokorrak aplikatuko dira. Horien artean dago, halaber, edozein ibilgailurekin elkargune batean edo oinezkoentzako edo txirrindularientzako pasagune batean sartzeko debekua (pasatzeko lehentasuna izan arren), baldin eta zirkulazio-egoera hain handia bada, non, ziurrenik, ibilgailua geratuta gera baitaiteke eta zeharkako zirkulazioa eragotzi edo oztopatu.

    Arau-hauste larritzat joko da Legeak pasatzeko lehentasunari buruz xedatzen duena urratzea, betiere delitua ez bada.

  • Bizikletaz zoazenean, haren gainean eta, beraz, ibilgailua gidatzeko mekanismoa erabiliz, gidaria (txirrindularia) zara. Oinez gidatzen baduzu, bultzatuz, oinezko bihurtzen zara berehala.

  • Maiatzaren 9ko 339/2014 Errege Dekretua onartu ondoren, ordura arte indarrean zegoen Ibilgailuen Erregelamendu Orokorrak (2822/1998 Errege Dekretua, abenduaren 23koa) 22.6 artikuluan ezartzen zuen debekua aldatzen da, besteak beste, zikloek eta bizikletek atoiak edo erdiatoiak eraman ahal izateko. Debeku hori kontraesanean zegoen Zirkulazioari buruzko Erregelamendu Orokorrak egoera jakin batzuetan ezartzen duen baimenarekin.

    Gaur egun, argi eta garbi ezarrita dago bizikletak kargatzeko atoiak merkaturatzeko eta erabiltzeko aukera (salgaiak garraiatzeko, maskotak...), eta aldez aurretik homologatu behar dira. Hala ere, atoiak, erdiatoiak, pertsonak edo zama garraiatzeko beste elementu batzuk erabiltzea baino ez dago baimenduta, behar bezala ziurtatuta (Industria, Merkataritza eta Turismo Ministerioak garatzen dituen erregelamenduzko xedapenen arabera), betiere zirkulazioa herri barruko bideetan edo horrelako ibilgailuentzat gordetako bideetan egiten bada.

    Laburpena:

    • “Karga-atoia” (salgaiak, maskotak...) duten zikloak: hiri-zirkulazioan eta zikloetarako gordetako bideetan baimenduta, betiere herriz kanpokoak badira. Aldez aurretik homologatu behar dira.
    • Pertsonak garraiatzeko atoiak dituzten zikloak: hiri-zirkulazioan eta zikloetarako gordetako bideetan baimenduta daudenak. Aldez aurretik homologatu behar dira.

    Amaitzeko, 339/2014 Errege Dekretuarekin egindako azken erreformaren ondoren, Ibilgailuen Erregelamendu Orokorrari dagokionez, Zikloturisten Sareak hautemandako beste kontraesan baten berri emango dugu. Izan ere, legelari adituen sareak adierazten du “ez direla kontuan hartzen bizikleten errealitate guztiak eta pedalei eragiteko laguntza duten zikloak. Adibidez, trizikloak aurrean gurpil bat duela ulertzen du, eta ez alderantziz, banaketa-trizikloetan ohikoa den bezala, eta ez ditu gurpil bateko edo gehiagoko bizikleten atoiak erregulatzen. Arazoa da, Europar Batasunean homologatuta egonik, Espainian bere erabilera linbo juridiko batean mantentzen dela”.

Galdera guztiak