Ondarearen Europako Jardunaldiek urriko azken zatia ere proposamenez beteko dute, herritarrak Bizkaiak duen aberastasun kulturalera hurreratu ahal daitezen. Programazioaren lehenengo asteak beteta, oraindik ere doako 70 jarduera baino gehiago geratzen dira, lurralde osoan banatuta, Bizkaiaren ondarearen parte diren espazioak, historiak, ohiturak eta bizimoduak deskubritzeko aukera berriekin. Bizkaiko Foru Aldundiak koordinatutako ekimen honek, aurten, 270 kultur proposamen baino gehiago eskaintzen ditu, 77 udalerritan, antolaketan 172 erakundek parte hartzen dutela, eta horrek erakusten du jardunaldiok gure lurraldeko ondarearen zabalkunderako ekintza nagusietakoa direla, eta kultur eragile, elkarte, museo eta udalen arteko lankidetzaren adibide.

«Gure eskuetan» lelopean, 26. edizioan gonbidapena egiten zaigu hausnartzeko zeinen garrantzitsua den kultura-ondarea ezagutzea, zaintzea eta transmititzea, arreta jarriz ondare hori zaintzeko dugun erantzukizun partekatuan, baldin eta etorkizuneko belaunaldiek ere hartaz gozatuko badute.

70 aukera baino gehiago oraindik Bizkaiko ondarea ezagutzeko

Urriko bigarren hamabostaldian zehar, aukera hauek guztiak geratuko zaizkie herritarrei: espazio historikoak zein ondarez betetakoak ezagutzeko bisitaldi gidatuak, ibilbideak herrietan zein espazio naturaletan, tailerrak, hitzaldiak, lanbide tradizionalen erakustaldiak, familientzako jarduerak, eta Bizkaiak industrian, itsasoan, arkitekturan eta kulturan duen memoria ardatz duten topaketak. Programazioak bidea emango du, halaber, hain ezagunak ez diren edo jendearentzat itxita dauden tokietara sartzeko, kontserbazio eta zaharberritzerako proiektuak ezagutzeko, gure herrietako ohiturei eta bizimoduei lotutako ondare immateriala deskubritzeko, eta kultura-ondarea babesteko eta transmititzeko gaur egun ditugun erronken inguruan hausnartzeko.

Informazioa eta erreserbak

Programazio osoa, informazio zehatza eta oraindik egiteko dauden jardueretarako erreserbak hemen kontsulta daitezke: www.ondareabizkaia.eus webgunea. Berrikuntzak gune hauetan ere topa ditzakezu: Instagram (@ondareabizkaia), Facebook (Ondarea Bizkaia) eta WhatsAppeko Ondarearen Europako Jardunaldiak kanala.

Kolektiboki eraikitako ekimena

Aurten, Bizkaiko Ondarearen Europako Jardunaldien 26. edizioa egingo da. Kultur ekitaldi kontsolidatua da, eta Europako Kontseiluak Europar Batasunarekin lankidetzan 1991tik bultzatutako ekimen baten parte. Gizartea kultur ondarea ezagutu, baloratu eta babestearen garrantziaz sentsibilizatzea da helburua.

Bizkaian, Jardunaldiak ahalegin kolektibo zabal baten emaitza dira. 2026ko edizioan 172 entitatek hartuko dute parte, tartean 79 kultur entitatek, 33 museok eta 60 udalek. Denek lagundu dute lurraldeko 77 udalerritara iritsiko den programazioa osatzen.

Bere 26 edizioetan, ekimenak ondare-komunitate handia sortu du Bizkaian, eta eragile askoren inplikazioa ahalbidetu du: kultur elkarteak, ikastetxeak, museoak, profesionalak, artisauak, herritarrak eta udalak. Lankidetza horri esker, jardunaldiak Europa-mailako ekimen erreferentzial gisa kontsolidatu dira kultur ondarea jendarteratu, kontserbatu eta balioesteari dagokion arloan.

Edizio berriak izaera parte-hartzaile horri eutsiko dio, eta ondarea herritar guztiei hurbiltzen jarraitzearen alde egingo du. Aldi berean, hausnarketa bat sustatuko du, bai legatu horrek aurrean dituen erronka eta desafioei buruz, bai gaurko belaunaldien erantzukizunari buruz, etorkizunean esanguratsua eta irisgarria izaten jarraituko duela bermatzeko.

26 urte Bizkaiko jardunaldiak egiten

Dagoeneko 26 urte dira Bizkaia Ondarearen Europako Jardunaldiak antolatzen hasi zela. Denbora horretan, kultur programa horrek euskal kulturaren arloko ondare-ekitaldi garrantzitsuenetako bat izatea lortu du.

Edizio bakoitza pertsona eta entitate askoren ahalegin kolektiboaren fruitu da. Egun, 170 eragilek baino gehiagok aktiboki parte hartzen dute ekimenean. Horrek argi erakusten du konpromiso partekatu eta transbertsala dagoela kultur ondarea jendarteratu, kontserbatu eta balioesteko.

Bizkaiko Foru Aldundiak koordinatutako ahalegin kolektibo horri esker, lankidetza-sare sendoa osatu da. Sare horren laguntzaz, Bizkaia ondare-komunitate erreferentzial gisa kontsolidatu da, eta Europaren aitortza ere jaso du.

Jardunaldiok ondarea babesteko, ikertzeko, jendarteratzeko eta kontserbatzeko hainbat ekimenen sorrera eragin dute, eta eragile askoren arteko interakzioa sustatu dute, interes partekatu baten inguruan: ondare-balioak zaintzea eta jendarteratzea.

Edizio bakoitzean gai bat proposatuta, posible izan da ondarearen ezagutzan askotariko ikuspegietatik sakontzea: tipologiak, testuinguru historikoak, sortzaileen pentsamoldea eta kontserbazioaren garrantzia. Hautapen tematiko horrek ondare kontzeptuaren beraren eta hura osatzen duten elementuen bilakaera islatu du. Orain ohikoak diren hainbat kontzeptu, hala nola ondare immateriala, paisaia, lurraldea eta ondare-komunitateak, ezezagunak ziren duela 26 urte.

26 urte horietako gaiak:

Urrian, urtero-urtero, gai bat proposatzen dute, ondareari ikuspegi askotatik heldu ahal izateko, arreta berezia jarrita gizarte-inklusioan, jasangarritasunean eta parte-hartze komunitarioan. Industria ondarea (2001); Berreskuratutako ondarea (2002); Bizkaiko abadiak, komentuak eta monasterioak (2003); Burges etxebizitzak Bizkaian (2004); Ibilbidea Bizkaiko hiribilduetan zehar (2005); Burdinaren paisaiak (2006); Jaurerriko zelatariak: harresiak, dorreak eta gotorlekuak (2007); Baserriko bizimoduaren eta ofizio tradizionalaren ondarea (2008); Bizkaia bideetan zehar (2009); Sartu zeure historian (2010); Argiak eta aurrerapena (2011); Urria kultura garaia da (2012); Atzokoa biharko (2013); Etxez etxe (2014); Burdina (2015); Etxetik kanpo (2016); Paisaia Bizia (2017); Ondarea, emakumeen emaria (2018); Ondarea plazara! (2019); Kontaiguzu ondarea (2020); Guztion ondarea, denok parte! Ondare irisgarri eta inklusiboa (2021); Ondarea loratuz, gozatu! (2022); Ondarea bizirik! (2023); Kulturaren bideak (2024); Ondare arkitektonikoa (2025), eta, aurtengo edizioan, Gure eskuetan (2026), arriskuan dagoen ondareari buruz.