Bizkaiko Foru Aldundiko Ondare Aretoak Iñaki Miramon aktore eta argazkilari bilbotarraren La trastienda erakusketa zabaldu du gaur. Antzerkiaren, zinemaren eta telebistaren espazio ezkutuetan murgiltzera gonbidatzen gaitu, 50 argazki baino gehiago biltzen dituen argazki-sortaren bidez. Erakusketa 2027ko urtarrilaren 23ra arte egongo da zabalik.

Erakusketaren aurkezpenean izan dira Iñaki Miramon artista bera, Juan Carlos Moya erakusketako komisarioa eta Begoña de Ibarra Bizkaiko Foru Aldundiko Kulturako zuzendari nagusia.

Begoña de Ibarra Bizkaiko Foru Aldundiko Kulturako zuzendari nagusiak adierazi duenez, "arte eszenikoen alderik intimoenean eta ezezagunenean murgiltzeko aukera paregabea da erakusketa, beti imajinatzen duguna, baina oso gutxitan ikusten duguna. Argazki horiek leku pribilegiatuan jartzen gaituzte, eta interpretazioaren mundura are gehiago hurbiltzeko aukera ematen digute. "

La trastienda fotoliburuko berrogeita hamar irudi inguru biltzen ditu erakusketak. Calmak eta Sosiego argitaletxeak editatu zuen argitalpen hori, eta Miramonek hamarkadetan zehar agertoki, plato eta filmaketen inguruan egindako 160 argazki biltzen ditu guztira. Lanbidearen barrutik eta gertutasunak ematen dion posizio pribilegiatu batetik hartuta, ikusleen begiradatik kanpo egon ohi diren uneak erakusten dituzte irudiek: kamerinoetan izandako elkarrizketak, agertokira irten aurreko kontzentrazio-uneak, entseguetako etenaldiak edo hartualdien arteko atsedenaldiak.

Bere kameraren bidez, ikuskizunaren atzean dagoen bizitza dokumentatu du Iñaki Miramonek. Aktore eta argazkilari den aldetik, begirada hurbila eta benetakoa eraikitzeko aukera izan du, eta taldekideekiko konplizitatea argazki bakoitzaren hari bihurtu da. Emaitza interpretazioaren lanbidearen giza erretratu dokumentala da.

Argazkiak tinta pigmentatuz inprimatuta daude, kotoizko paperean, koloretan eta zuri-beltzean, eta artistaren ibilbidean zehar harekin agertokiak eta filmaketak partekatu dituzten pertsona guztiei egindako omenaldia dira ere. Ikusizko testigantzatik harago, Miramonek antzezpena gelditu eta itxaronaldia, kontzentrazioa eta giza harremanak azaleratzen dituzten espazioen balioa erakusten du. Lan horren atzean «atzealde» ugari daude, lan berri bakoitzarekin gertatzen direnak.

La trastienda lanean, protagonista bihurtu dira kamerinoak, makillajerako espazioak, korridoreak eta atsedenlekuak. Hala, erakusketak esperientzia berezi bat proposatzen dio bisitariari: kanpotik behatu ahal izatea normalean osatzen dutenentzat gordeta egon ohi den unibertsoa.

Erakusketa-proiektuak, gainera, lotura estua du Bilborekin eta antzerkiarekin. Erakusketaren oinarri den fotoliburua Arriaga antzokian egindako bi argazkirekin hasten eta amaitzen da: lehenengoa agertokitik hartuta dago, eta azkena, besaulki-patiotik. Ibilbide sinboliko horrek aktorea ikusleekin lotzen du, eta, era berean, omenaldi bat egiten die, batetik, Miramon jaio zen hiriari eta, bestetik, antzerkiari, artistaren ibilbide artistikoaren zatirik handiena hartu duen eremuari.

Bilbora iritsi aurretik, La trastienda 2025eko maiatzean aurkeztu zen Fuenlabradako CEART zentroan (Centro de Arte Tomás y Valiente), eta, gero, 2026ko otsailean, AISGEren egoitzan bisitatu ahal izan zen, Madrilen. Ondare Aretoko programan sartu ondoren, erakusketa artistaren jaioterriari iritsi da orain.

Iñaki Miramoni buruz

Iñaki Miramon Bilbon jaio zen, 1957an. Santutxu auzoan bizi izan zen lau urte bete arte, eta, orduan, San Adrian auzora aldatu zen gurasoekin eta anai-arrebekin batera. Eskola publikoan eta Bilboko Institutu Zentralean ikasi zuen hamabi urte bete zituen arte. Ondoren, Chesteko eta Eibarko unibertsitate laboraletan egin zituen ikasketak. Azken horretan, Juan Ortegak zuzendutako Narruzko Zezen antzerki-taldean sartu zen, eta lehenengo urratsak egin zituen interpretazioaren munduan.

Geroago, Zientzia Zehatzak ikasten hasi zen Euskal Herriko Unibertsitatean (EHU), baina lehen ikasturtean karrera utzi, eta Madrilera joan zen, 1976an. Han, Real Escuela Superior de Arte Dramático (RESAD) eskolan sartu zen. 1977an, aktore-lanetarako lehen kontratu profesionala lortu zuen, eta, harrezkero, ibilbide etengabea egin du eszenatokietan, zineman eta telebistan.

Argazkigintzarekiko interesa gaztetatik izan du; orduan erosi zuen lehen reflex kamera, Zenit bat. Laurogeita hamarreko hamarkadan, eskulturaren esparrura zabaldu zuen jarduera artistikoa, eta brontzezko lan ugari egin zituen. Ondoren, hainbat espaziotan erakutsi zituen, hala nola Madrilgo Centro Cultural de la Villa de Madrid zentroan eta Alacanteko Espacio 14 gunean.

2011n, Bilbao Madrid erakusketa aurkeztu zuen Fuenlabradako CEART zentroan. Proiektu horretan, lehen aldiz bildu zituen espazio berean bere argazki- eta eskultura-lanak.

Aktore gisa izan duen ibilbide luzean, erreferentziazko profesional askorekin egin du lan. Zineman eta telebistan, Fernando Fernán Gómez, José Luis Garci, Antonio Giménez Rico, Manuel Gutiérrez Aragón edo Pedro Olea zuzendarien aginduetara lan egin du, besteak beste. Hala ere, batez ere antzerkian garatu du bere ibilbide artistikoa, eta muntaketa askotan parte hartu du: Los 80 son nuestros, Arte, Dice ayer, Gorda, Héroes, Tras de la lluvia, Laponia edo Victoria. Gaur egun, azken horretan ari da lanean, Amparo Larrañagarekin, Mar Abascalekin eta Juli Fábregasekin.

Jarduerak:

Iñaki Miramonen La Trastienda erakusketa dela eta, Ondare Aretoak doako zenbait jarduera programatu ditu, erakusketako kontzeptu eta prozesu sortzaileetan sakondu ahal izateko. Programazioaren barruan, topaketak egingo dira artistarekin, urriaren 26an, azaroaren 23an, abenduaren 14an eta urtarrilaren 18an, bai eta familia-tailerrak ere, adin-talde ezberdinetarako. Urriaren 10ean, Destellos egingo da (3-8 urte); erakusketa ikusteko bisita eta argazkien eta erretratuen inguruko sormen-tailer bat uztartuko ditu. Urriaren 17an, Ispiluan egingo da (4-11 urte), ispiluan agertzen den islatik abiatuta irudi harrigarriak sortzeko jarduera. Gainera, astelehenetik ostiralera, bisita iruzkinduak eta jarduerak eskainiko dira talde itunduentzat, eta erakusketak eta erakusketa horiek ondarearekin duten harremana ulertzen laguntzeko dinamikak egingo dira. Jarduera guztiak doakoak dira, eta aurretik izena eman behar da.