Tributu itunduak direla eta, 6.831,0 milioi euro bildu dira abuztura arte, hau da, 2025ean epe berean bildurikoa baino 182,6 milioi euro gehiago; beraz,% 2,7 egin du gora zerga-bilketak. Datu hori 2026ko ekitaldirako aurrekontuan jasotako tributu-sarrera guztien % 62,7 da (10.891 milioi euro).

Zuzeneko zergapetzeak bilakaera positiboari eutsi dio, % 6,6 gehiago bildu baita; zeharkako zergapetzeak, berriz, % 1,9 egin du behera.  Tasak eta bestelako sarrerak % 18,1 hazi dira.

Zuzeneko zergapetzeak aurreko hilabeteetako portaera onarekin jarraitzen du, eta 3.846,9 milioi euroko ekarpena egin du, hau da, 238,6 milioi euro gehiago iazko aldi beraren aldean; hau da, % 6,6ko igoera izan du. Datuak PFEZaren kanpainaren emaitza positiboa adierazten du (kuota diferentziala % 17,2 hazi da), baita Ondarearen gaineko Zergarena ere (% 20,7 hazi da).

Atxikipenei dagokienez, datu positiboak dituzte oraindik ere lanaren gainekoek (+% 4,8), kapital higiezinaren gainekoek (+% 2,9) eta, batez ere, ondare-irabazien gainekoek (% 65,4 hazi dira). Alde negatiboan, hauek daude: batetik, kapital higigarriaren gaineko atxikipenak –berriro jaitsi dira, kasu honetan % 4,4–, eta, bestetik, sarienak, zeinak 6,8 milioi izan baitira –aurreko ekitaldian 42,6 milioi bildu ziren–. Zenbateko horiekin, PFEZ osoa % 5,4 hazi da (+141,8 milioi euro); sozietateen gaineko zergaren kasuan, berriz, zeinaren kuota diferentziala % 11,1 igo baita, zergaren kanpainan sartu beharreko kuotak aurkeztu ondoren, % 12,1 hazi da (+79,4 milioi).

Aurrekoaz gain, zuzeneko zergapetzean izandako datu positiboak osatzen dituzte ez-egoiliarren errentaren gaineko zergak (+% 3,8), kreditu-entitateen gordailuen gaineko zergak (+% 4,6) eta interes eta komisioen marjinaren gaineko zergak (+% 33,3). Bitartean, behera egiten jarraitzen dute oinordetza eta dohaintzen gaineko zergak (–% 10,3) eta energia elektrikoaren ekoizpenaren gaineko zergak (–% 20,1), Ekialde Hurbileko krisiari aurre egiteko hartutako neurriek eraginda.

Zeharkako zergapetzeari dagokionez, abuztura arte 2.361,5 milioi euro bildu dira, 2025ean baino 44,7 milioi gutxiago; hau da, zerga-bilketan % 1,9ko jaitsiera izan da. Horrela, jarraitu egiten du krisiaren aurkako neurrien eraginpean dauden zergen beherakadak: BEZa (–% 3,3), hidrokarburoen gaineko zerga (–% 14,2) eta elektrizitatearen gaineko zerga (–% 22).

Abuztuan, garagardoaren gaineko zergak (–% 3,1) eta ondare-eskualdaketen gaineko zergak (–% 2,8) ere behera egin dute.

Aitzitik, honako hauek zifra positiboak dituzte: alkoholaren gaineko zergak (+% 2,4), tabakoaren gaineko zergak (+% 2,7), finantza-transakzioen gaineko zergak (+% 28,3), zenbait garraiobideren gaineko zergak (+% 12,1), aseguru-primen gaineko zergak (+% 5,3) edo joko-jardueren gaineko zergak (+% 20,9).

Tasak eta beste diru-sarrera batzuk 52,1 milioi euro dira, hau da, 2025eko aldi berean baino 7,9 milioi euro gehiago. Joko-tasak % 0,8 jaitsi dira, baina hori konpentsatu egiten du premiamendu-errekarguen (+% 50,3) eta berandutze-interesen (+% 31,3) bilakaera positiboak.

Hilabete honetan ez da egin egokitzapenen ondoriozko fluxurik, ez Aldundien artean, ez Estatuarekin; beraz, uztailean adierazitako zenbatekoek beren horretan diraute. Horrek esan nahi du Kudeaketa Propioko Tributu Itunduen kopurua % 3,3 hazi dela abuztura arte, eta tributu itunduen kopurua, guztira, ohar honen hasieran aipatutako % 2,7 igo dela.