Bizkaiko Foru Aldundiak gaur hasiko ditu Begoña/Vecvnia proiektuaren indusketa arkeologikoaren aurreko egokitzapen-lanak. Lehenengo fase hau hegoaldeko nabean zentratuko da, basilikako altzariak babestuta, koadroak eta irudiak barne, espazio hau mugatuko duen itxitura eraikitzen hasi aurretik.

Proiektuaren izaera ireki eta dibulgatzailearen arabera, itxitura egurrezko egitura arina izango da, eta informazio-gune gisa ere funtzionatuko du. Bertako leihoek eta behaketa-puntuek aukera emango diete basilika bisitatzen dutenei ikerketa arkeologikoaren aurrerapena gertutik jarraitzeko.

Behin itxitura instalatuta, basilikako lurzoruko lehen geruzak kenduko dira: egungo oholtza eta oinarri-geruza. Azaroaren erdialdean hasiko dira arkeologia-maila interesgarriak induskatzen, tenpluaren aurreko faseak hobeto ezagutzeko.

Hegoaldeko nabearen indusketak basilikarako sarbidea eta barruko ibilbideak aldatuko ditu aldi baterako. Lanak eta tenpluaren ohiko funtzionamendua bateragarri egiteko, bankuen banaketa berri bat diseinatu da, prozesu osoan zehar ohiko jarduerari eutsi ahal izateko.