Bizkaiko Foru Aldundiko Gizarte Ekintza Sailak 813,98 milioi euroko aurrekontua izango du 2027an, hau da, 2026an baino 46,83 milioi gehiago, hots, % 6,10eko gehikuntza. Gizarte Ekintza Sailaren aurrekontua foru-erakundeko sailetara bideratutako aurrekontu osoaren % 45,06 da.

Gizarte Ekintzako foru-diputatu Amaia Antxustegik kontu horien ildo nagusiak aurkeztu ditu gaur goizean Bizkaiko Batzar Nagusietan. Kontuok aurrekontu-ahaleginari eutsiko diote zainketak, konpainia-zerbitzua edo autonomia garatzeko baliabideak behar dituzten pertsonentzako arretaren eta laguntzaren arloan.

Antxustegik azaldu duen bezala, «konprometituta jarraitzen dugu iraupen luzeko zainketekin eta zainketen pertsonalizazio eta erantzukidetasunarekin, ikuspegi komunitario batetik. Gainera, aurrera egin nahi dugu laguntzeko eta esku hartzeko baliabideen kalitatean eta segurtasunean, eta zentroei eta euren profesionalei lagundu nahi diegu arreta hobetzeko ezagutza sortzen eta kudeatzen».

Gizarte Urgazpenerako Foru Erakundea (GUFE) eta Gaikuntza

Gizarte Urgazpenerako Foru Erakundeak 175 milioi euro jasoko ditu datorren urtean Gizarte Ekintza Sailetik bere jarduera gauzatzeko, 2026an baino ia 6 milioi gehiago. Haietatik 89,02 milioi euro (5,82 milioi gehiago) 887 profesionalek osatzen duten plantillaren pertsonal-gastuetara bideratuko dira. GUFEk, hala, funtsezko pieza izaten jarraitzen du Bizkaiko egoitza-zentroen sarean eta iraupen luzeko zainketen eredu bateranzko trantsizioan. Gainera, 74,13 milioi euro bideratuko dira adingabeak babesteko sistema indartzeko.

Gaikuntzak, berriz, 4,19 milioi euro izango ditu, aurreko ekitaldian baino % 12,55 gehiago. Plantilla 25 lanpostutik 27ra igaroko da, hartutako laguntza-neurrien eta kuradoretzen gehikuntzari erantzuteko, bai eta neurri horien berrikuspenari ere.

Umeak babesteko baliabide gehiago

Umeen programak 14,67 milioi euro izango ditu, 2026an baino % 7,85 gehiago. Babesgabezia-egoeran edo egoera horretan egoteko arrisku larrian dauden adingabe eta nerabeak babesteko jarduerak biltzen ditu programa horrek. Kopuru horri egoitza-harrerako etxe eta zentroetarako GUFEren bidez kudeatzen diren 74,13 milioiak gehitu behar zaizkio.

Partida nagusien artean, 5,37 milioi euro daude, babesgabetasun-egoeretan familiako esku-hartze espezializatua egiteko, banantzeak prebenitze eta, ahal denean, familia berrelkartzen laguntze aldera. Familia barruko sexu-abusuen biktima diren ume eta nerabeei arreta psikologikoa emateko baliabideak ere gehitu dira (617 320 euro), baita gizarte-gatazkan dauden nerabeekin gizarte- eta hezkuntza-arloan esku hartzeko programetarako baliabideak ere (852 500 euro).

Aurrekontuan 2,8 milioi euro gordeko dira familia-harreraren konpentsazio ekonomikoetarako, eta 1,33 milioi euro, berriz, hura babesteko eta jarraipena egiteko. Berebat, harrera espezializatuko programa sendotuko da, 551 130 euro izango baititu; aurreko ekitaldian, berriz, 420 000 euro izan zituen.

275 milioi baino gehiago mendekotasuna duten pertsonei laguntzeko

Mendekotasuna duten pertsonen arretak 275,67 milioi euro izango ditu, aurreko ekitaldian baino 11,77 milioi gehiago. Sailaren gastu-arlo nagusietako bat da, eta haren baliabideen heren bat baino gehiago biltzen du.

Egoitza-plazen finantzaketa 145,36 milioi euro izango da. 2 790 plaza arrunt jaso dira, 35 zainketen arloko konplexutasun handikoak eta 450 bizikidetza-unitateetakoak. Haiei udalekin hitzartutako 587 plazak gehitu behar zaizkie, 26,12 milioi euroko zuzkidurarekin.

Eguneko zentroek 20,1 milioi izango dituzte, iaz baino 1,6 milioi gehiago. Bestalde, unitate soziosanitarioek 3,78 milioi izango dituzte 69 plaza mantentzeko, lurraldeko zenbait baliabidetan banatuta. Aurrekontuak 5,16 milioi ere jasotzen ditu gaur egun zerbitzua ematen ari diren etxeTIC zentroen funtzionamendurako.

122 milioi baino gehiago desgaitasuna duten pertsonei arreta emateko

Desgaitasuna duten pertsonentzako programak 122,63 milioi euro izango ditu, 2026an baino % 5,39 gehiago, hau da, 6,27 milioi gehiago.

Kopuru horretatik 77,43 milioi euro egoitza-zentroak eta etxebizitzak finantzatzeko erabiliko dira, hirugarren sektore sozialeko zenbait entitaterekin egindako hitzarmenen bidez. Beste 38,32 milioi egoitzakoak ez diren zentro eta zerbitzuetako plazetara bideratuko dira.

Autonomia pertsonala sustatzeko zentroen finantzaketa ere handituko da, eta 1,41 milioi euro izango dituzte. Baliabide horien artean, honako hauek daude: ADEMBIk Ibarrekolandan duen zentroa eta entitate horrek Zornotzan duen zentro berria, esklerosi anizkoitza duten pertsonentzat; ATECEk San Ignazion duen zentroa, hartutako kalte zerebrala duten pertsonentzat; Arreta Inklusiboa (Down Sindrome Fundazioa); Gorabidek Muskizen duen zentroa, eta Bilbao Formarte zentro berria.

Etxean bizitzen jarraitzeko baliabide eta laguntza gehiago

Etxeko Arreta programak 117,10 milioi euro izango ditu, 2026an baino ia 13 milioi gehiago. Helburua zainketak behar dituzten pertsonei laguntzea da, euren ohiko ingurunean bizitzen jarraitu eta euren bizi-proiektua behar dituzten laguntzekin garatu ahal izan dezaten.

Familia-giroan zaintzeko prestazio ekonomikoak 81 milioi euro izango ditu, aurreko ekitaldiko 74,5 milioien aldean. Egoitza-zerbitzuari lotutako prestazioak 15,5 milioi izango ditu, eta beste 3 milioi atseden-zerbitzuari lotutako prestaziorako gordeko dira.

Horrez gain, 1,6 milioi euro bideratuko dira, araudi espezifikoa aplikatuz, 3+ graduko muturreko mendekotasuna duten pertsonei, nagusiki AEA duten pertsonei, finantzaketa ematera, laguntza pertsonala kontrata dezaten. Bestalde, laguntza pertsonala kontratatzeko prestazio arruntak milioi bat euro izango du.

Prestazio ekonomikoak eta autonomiarako laguntzak

Kotizazio gabeko pentsioetarako aurrekontua 70,59 milioi euro da, 2026an baino % 8,63 gehiago. Kopuru horretatik gehiena kotizazio gabeko pentsioei dagokie, bai eta LISMI prestazioei ere.

Laguntza-produktuei dagokienez, Gizatekek sistema misto baterantz egingo du aurrera, eta, horretarako, konbinatu egingo ditu, batetik, laguntza teknikoen kudeaketa eta erosketa eta, bestetik, ekipamendu berreskuragarriaren mailegua eta berreskuratu ezin diren produktuak erosteko eta etxebizitzak eta ibilgailuak egokitzeko dirulaguntzak. Horretarako, 1,1 milioi euro bideratuko dira laguntza teknikoak kudeatu eta erostera; 1,76 milioi ekipamendu berreskuragarrira, eta 1,75 milioi dirulaguntzen programara.

Orobat, 48 000 euroko dirulaguntza bat sortu da, Bizkaiko gorren bizitza independentea eta autonomia babesteko. Horrez gain, bere horretan eutsiko zaie bizitza independenteko eta lagun egiteko programak gauzatzen dituzten gizarte-entitateentzako laguntza-ildoei.

Ebaluazioa, orientazioa eta arreta goiztiarra sendotzea

Ebaluazio eta Orientazio Programak 14,43 milioi euro izango ditu, aurreko ekitaldian baino % 11,73 gehiago. Zuzkidura horren barruan sartzen dira desgaitasuna eta mendekotasuna ebaluatzeko baliabideak, txosten teknikoak eta eskuragarri dauden laguntza eta zerbitzuei buruzko orientazioa.

Arreta goiztiarrak 5,77 milioi euro izango ditu, 51 zentroren bidez emateko. Gainera, 900 000 euro gordeko dira gizarte-larrialdiko egoeren arreta koordinatzeko.

Bizi-luzetasuna eta erronka demografikoa

Bizi-luzetasunaren eta Erronka Demografikoaren Programak 1,43 milioi euro izango ditu datorren urtean. Jarduera-ildo nagusien artean daude Nagusi Intelligence Center garatzea; Bizi-luzetasunaren eta Zainketen Behatokia; Bizkaia adin guztietarako lurralde lagunkoia izan dadin bultzatzea (250 000 euroko zuzkidura), eta bizi-luzetasunaren eta zainketen inguruko ikerketa- eta berrikuntza-proiektuak babestea (beste 200 000 euro).

Prebentzioa, autonomia pertsonala, laguntzen pertsonalizazioa eta komunitateari lotutako zainketen garapena dira Gizarte Ekintza Sailaren zerbitzu eta prestazioen 2027rako plangintza bideratzen duten ildoetako batzuk.

​​​​​​​