Aurten, Bizkaiko Foru Aldundiak 24,8 milioi euro baino gehiago erabiliko ditu II. eta III. mendekotasun-gradua aitortua duten adinekoak zaintzeko hitzarmena duten 587 plaza  finantzatzearren. Plaza horiek udal titulartasuneko 15 egoitzatan banatzen dira, eta EUDELekiko lankidetzarako esparru-akordioan sartuta daude.

Gobernu Kontseiluak dagoeneko onartu ditu Getxo, Santurtzi eta Zallako udalekin sinatutako hitzarmenak, adinekoentzako udal-egoitzen titularrak baitira. Gainera, ostegun honetan bidea eman zaie Arratiako Mankomunitatearekin eta Basauriko, Sestaoko nahiz Zeanuriko udalekin sinatutako hitzarmenei.

Datozen asteetan sinatuko dira oraindik egiteke baina izapidetze-prozesuan  dauden hitzarmenak, honako udal hauekin: Bermeo, Dima, Erandio, Forua, Ondarroa, Urduña, Orozko eta Otxandio.

Plaza horiek mantentzeko inbertsioa 24.828.947 eurokoa da guztira, eta horrek agerian uzten du Aldundiak mendetasun-egoeran dauden adinekoen ongizatearekin duen konpromisoa.

Lankidetza-esparru estrategikoa

Hitzarmen horiek Bizkaiko Foru Aldundiaren eta EUDELen arteko lankidetzarako esparru-akordioaren barruan kokatzen dira, eta udal titulartasuna duten zentroen eta foru-erakundearen arteko harremanak arautzeko diseinatu dira. Lankidetza programaren xedea kalitatezko zerbitzuak eta arreta pertsonalizatua bermatzea da, Zorroari buruzko Dekretuarekin bat egiteko, Bizkaiko Gizarte Prestazio eta Zerbitzuen Maparen hedapenarekin batera. Metodologia elkartu horrek arretaren jarraitutasuna bermatzen du, eta adinekoen hautatzeko askatasuna errespetatzeaz gain, beren udal-inguruneetan foru-finantzaketarekin jarraitzeko aukera ematen die. Eredu horrek zerbitzuaren hurbiltasuna eta kalitatea indartu egiten ditu, erabiltzaileen eta haien familien lehentasunetara egokitzeko.